Subodhinipaddhati 37.1

37.1

oṃ dhruvamasi dhruvāhaṃ patikule bhūyāsaṃ devadattaśarmaṇaḥ śubhadā
“oṃ arundhatyasi ruddhāhamasmi devadattaśarmaṇā śubhadā” iti
athaināmanāmikayā spṛṣṭvā'numantrayet mantreṇa | dhruvā dyaurityasya
prajāpatiranuṣṭubāśāsyamānā anumantraṇe viniyogaḥ
oṃ dhruvā dyaurdhruvā pṛthivī dhruvaṃ viśvamidaṃ jagat
dhruvāsaḥ parvatā ime dhruvā strī patikule iyam
tadanantaraṃ bhartṛgotreṇa svapatimabhivādayet | "amukagotrā
śubhadā ahaṃ bho abhivādayāmī"tyabhidhāya namaskuryāt | ayaṃ
vadhvā vāgvisargo yaḥ pūrvamāsīt | tato vadhūsahito varastathaivāgneḥ
paścādupaviśya, vyāhṛticatuṣṭayaṃ punastrapañca hutvā, samidhamādhāyānu
paryukṣya, yajñavāstu kṛtvā, vasvāhutiṃ hutvāgniṃ parikramya, camasaṃ
ninīya, punaḥ purayet | tataḥ samācārātsumamprokṣitamastvityādi
kṛtvā, brahmaṇe pūrṇapātradānaṃ dattvā, brāhmaṇabhojanādisaṅkalpānkuryāt | tato vāmadevyaṃ gītvā, agniṃ vṛddhāṃśca praṇamet
ityuttaro vivāhaḥ
atha samaśanīyacaruḥ
atha vivāhakarmaṇa ūrddhaṃ dampatī trirātraṃ sarjikādikṣāra-saindhavādilavaṇavyatiriktānnabhojanau maithunarahitau bhūmāvekatra saha
śayīyātām | tato yadi mahāniśādidoṣavarjitaḥ kālaḥ prātaḥ
samaśanīyacarukaraṇāsambhavastadā śuddhe pātre odanādi haviṣyamannaṃ
yatprathamaṃ pariviṣṭaṃ tadvidhā kṛtvā, ekaṃ bhāgaṃ dakṣiṇahastena spṛṣṭvā
abhimantrayenmantreṇa | annapāśeneti prajāpatiranuṣṭubannaṃ, yadetaditi
prajāpatiranuṣṭubāśāsyamānāḥ abhimantraṇe viniyogaḥ
oṃ annapāśena maṇinā prāṇasūtreṇa pṛśninā
badhnāmi satyagranthinā manaśca hṛdayaṃ ca te