Rajanitiprakasha (Mitramishra) 4.p20.4

4.p20.4

kālanemivadhe yadvadyadvātripuraghātane || hiraṇyakaśiporyuddhe'tha sarvāsureṣu ca | śobhitāsi tathaivādya śobhasva samayaṃ smara || nīlān śvetānimān dṛṣṭvā naśyantvāśu nṛpārayaḥ | vyādhibhirvividhairghoraiḥ śastraiśca yudhi nirjitāḥ || pūtanā revatīnāmnā kālarātrīti paṭhyate | dahatvāśu ripūṃnsarvān patāke tvāmupāśritā || iti patākāmantraḥ | asirviśasanaḥ khaḍgastīkṣṇadhāro durāsadaḥ | śrīgarbho vijayaścaiva dharmācārastathaiva ca || ityaṣṭau tava nāmāni svayamuktāni vedhasā | nakṣatraṃ kṛttikā tubhyaṃ gururdevo maheśvaraḥ || rohiṇyāśca śarīraṃ te daivataṃ tu janārddanaḥ | pitā pitāmaho devastvaṃ pālaya sarvadā || iti khaḍgamantraḥ | śarmapradastvaṃ samare carman sainyāya me hyasi | rakṣa māṃ rakṣaṇīyo'haṃ tavānagha namo'stu te || iti carmamantraḥ | dundubhe tvaṃ sapatnānāṃ ghoṣāddhṛdayakampanaḥ | navabhūmipasainyānāṃ tathā vijayavardhanaḥ || yathā jīmūtaghoṣeṇa hṛṣyanti śikhicāraṇāḥ | tathā ca tava śabdena trasyantvasmaddvipo raṇe || iti dundubhimantraḥ | sarvāyudha mahāmātra sarvadevārimarddana | cāpastvaṃ sarvato rakṣa sākaṃ śaravaraiḥ sadā || iti cāpamantraḥ | daivavitprayato bhūtvā rājā vātha purohitaḥ | teṣāṃ sampūjanaṃ kṛtvā daivajñaṃ samupasthitam || dhanena pūjayedrājā dakṣiṇābhirdvijottamān | tataḥ puṇyāhaghoṣeṇa dvijānāṃ hatakalmaṣaḥ || maṅgalālambhanaṃ kṛtvā mantrametaṃ niśāmayan | ādityā vasavo rudrā viśvedevā marudgaṇāḥ || lokapālāḥ sagandharvā nadyaḥ śailā mahī dvijāḥ | agniḥ svāhā svadhā skando homo brahmā prajāpatiḥ ||