Samskararatnamala (Gopinatha Dikshita Oka) 32.p1

32.p1

dattakaputrasya janmamaraṇayoḥ pūrvāparapitrostrirātraṃ sapiṇḍānāmekāham [āśaucam] | yadyasāpiṇḍaḥ putrīkṛtaḥ—
‘‘baijikādabhisaṃbandhādanurundhyādaghaṃ tryaham’’ iti vacanāt ,
‘‘parapūrvāsu bhāryāsu putreṣu kṛtakeṣu ca
bhartṛmātrostrirātraṃ syādekāhastu sapiṇḍagaḥ’’
iti mādhavīye hārī̍tavacanācca | tādṛśena dattakena pitrādimaraṇe trirātraṃ
kāryam —
‘‘dattakaśca svayaṃ dattaḥ kṛtrimaḥ krīta eva ca
sūtake mṛtake caiva tryahāśaucasya bhāginaḥ’’
iti śuddhitattve brāhmavacanāt
sapiṇḍasya putrīkaraṇe tu sapiṇḍamaraṇādinimittaṃ dattakasya tanmaraṇādinimittaṃ sapiṇḍānāṃ daśarātrameva nirvivādam | sāpiṇḍyaṃ ca pūrvoktarītyā vyavasthitamāśaucahetuḥ
dattakaputrasya jananamaraṇayoḥ pūrvāparapitrostrirātraṃ sapiṇḍānāmekāhamiti
kaustubhīyavākyasyāyamarthaḥ| dattakaputrasyetyatra saṃskārānantaraṃ gṛhītasya dattakasya
putro dattakaputra iti tatpuruṣeṇa pūrvāparapitrorjananāśaucasya saṃśayanivṛttirbhavatītyarthaḥ
tathā''ha marīciḥ—
‘‘sūtake mṛtake caiva trirātraṃ parapūrvayoḥ
ekāhastu sapiṇḍānāṃ trirātraṃ yatra vai pituḥ’’ iti
yadā tu pitustrirātraṃ tadā sapiṇḍānāmekāham̐ ityarthaḥ
“ anauraseṣu putreṣu jāteṣu ca mṛteṣu ca
parapūrvāsu bhāryāsu prasūtāsu mṛtāsu ca
trirātrādiṣyate śuddhiḥ ”
tathā ca prajāpatiḥ—
“ anyāśriteṣu dāreṣu parapatnīsuteṣu ca
gotriṇaḥ snānaśuddhāḥ syustrirātreṇaiva tatpitā ” iti