Samskararatnamala (Gopinatha Dikshita Oka) 48.p1.9

48.p1.9

bhūtkiṃ tu svakāla eva sapiṇḍako mahālayaḥ kartavya ityevaṃ tasya sārthakyasaṃbhavāt | sapiṇḍīkaraṇagrahaṇaṃ navaśrāddhaṣoḍaśaśrāddhopalakṣaṇam | mātāpitroriti kṣayāhaviśeṣaṇaṃ havirubhayatvavadavivakṣitaṃ tena bhrātṛpitṛvyādivārṣike'pi
piṇḍadānaṃ kāryameva
baudhāyano'pi—
‘‘ vivāhe copanayane caule caiva yathākramam
varṣamardhaṃ tadardhaṃ ca netyeke tilatarpaṇam ’’ iti
etatpratiprasavastu tarpaṇaprakaraṇe vakṣyate
madanaratne smṛtyantare—
‘‘ piṇḍānsapiṇḍā no dadyuḥ pretapiṇḍaṃ vinā'tra tu
pitṛyajñe ca yajñe ca gayāyāṃ dadyureva te ’’ iti
pitṛyajñe piṇḍapitṛyajñe | yajñe pitryeṣṭyāṃ saumike makhe ca | te sapiṇḍāḥ
satyavrataḥ—‘‘pitroreva mṛtāhe tu gayāyāṃ ca mahālaye
kṛtodvāho'pi kurvīta piṇḍanirvapaṇaṃ sutaḥ ’’ iti
jyotirnibandhe—‘‘ abhyaṅge sūtake caiva vivāhe putrajanmani
māṅgalyeṣu ca sarveṣu na dhāryaṃ gopicandanam ’’ iti
etacca māsaparyantam,—
‘‘ vivāhādau māsamekaṃ na dhāryaṃ gopicandanam ’’
iti jyotirnibandhavacanāt
smṛtyantare—‘‘ kṛtvā vivāhaṃ vratabandhanaṃ ca varṣaṃ tadardhaṃ na ca tīrthayātrām
kṣauraṃ ca piṇḍāṃstiyuktakarma na caiva kuryurhiṃ narāḥ sapiṇḍāḥ ’’ iti
jyotiṣpradīpe—
‘‘ snānaṃ sacailaṃ tilamiśrakarma pretānuyānaṃ kalaśapradānam
apūrvatīrthāmaradarśanaṃ ca vivarjayenmaṅgalato'bdamekam
māsaṣaṭkaṃ vivāhādau vrataprārambhaṇe(ṇaṃ) na ca
vratasyodyāpanaṃ naiva naiva kuryādupoṣaṇam
jīrṇabhāṇḍādi na tyājyaṃ gṛhasaṃmārjanaṃ tathā
ūrdhvaṃ vivāhātputrasya tathā ca vratabandhanāt
ātmano muṇḍanaṃ naiva varṣaṃ varṣārdhameva ca ’’ iti