Shraddhakaumudi 4.p129

4.p129

vastutastu yājñavalkyavacana--śaunakasūtrayorvirodhāt paitāmahaprapaitāmahapadaṃ saṃsravaparam | na ca svavākye pātrapadaśravaṇāttasyaivānvayo yukta iti vācyam | tatra paitāmahaṃ nyasedityatra tatrapadenoktasya pātrasya nyāsādhikaraṇatayollekhanākāṅkṣāyāṃ prathame pātre saṃsravān samavanīyeti pāraskaravacanaikavākyatayā paitāmahapade saṃsravaparatvasyaiva yuktatvādanyathāśrutidvayakalpanāpatteḥ | matsyapurāṇe— vastrottaraṃ gandhapūrvaṃ dadyāt saṃsravamāditaḥ | pitṛpātre nidhāyātha nyubjamuttarato nyaset || gandhapūrvyakaṃ gandhādipañcakaṃ vastrāntamityarthaḥ | ādito gandhādidānasyādau saṃsravaṃ pitṛpātre nidhāyetyanvayaḥ | ayameva pāṭho matsyapurāṇe dṛśyate | apipālenāpyevaṃ likhitam | śrīdattādayastu--saṃsravaṇādi ceti paṭhitvā cādipadenārghapātrāvaśiṣṭānāṃ tilapuṣpapavitrāṇāṃ grahaṇamiti vyākhyāya pavitrāṇi pitṛpātre sthāpayitvā nyubjaṃ kāryyamityāhuḥ | tanmandaṃ--saṃsravaṇādīti pāṭhe gandhādidānāt paraṃ nyubjīkaraṇaṃ pāraskara-gobhilīya-yājñavalkyādiviruddhaṃ sarvvadeśīyācāraviruddhañca syāt | bhavatu vā sa pāṭhastathāpi arghaśeṣapratipattyākāṅkṣāyāṃ saṃsravavat