Shraddhamanjari (Bapubhatta Kelakara) 4.1.p1.10

4.1.p1.10

kalikāyāmāśvalāyanaḥ—
yatra syurbahavaḥ piṇḍāstatra bilvaphalopamāḥ
yatra caiko bhavetpiṇḍastatra kharjūrasaṃnibhaḥ || iti
trayāṇāmuttarottaraṃ piṇḍapramāṇādhikyamiti maitrāyaṇīye | piṇḍapradānānantaraṃ darbhamūle karāvagharṣaṇamiti candrikāyām | teṣu darbheṣu taṃ hastaṃ
nimṛjyāllepabhāgināmiti manūkteḥ | ācāryo'pi smṛtirūpeṇā''ha—
pituḥ pitāmahādūrdhvaṃ ye trayaḥ pitaraḥ smṛtāḥ
te lepānnena tṛpyanti teṣāṃ kāryaṃ hi tarpaṇam || iti
tadanantaramatra pitara ityanumantraṇādi | asminprakaraṇe yadyapi piṇḍānāmevānumantraṇamupasthānaṃ prabāhaṇaṃ ca vidhīyate tathā'pi mantrāṇāṃ pitṛliṅgatvātpiṇḍā eva pitara iti kṛtvā pitara evaitairmantrairabhidhātavyā
iti vṛttikṛt | śundhantāṃ pitara iti dvitīyani nayanānte kartavyamāhā''cāryaḥ—
tataḥ samyagdvirācamya nīvīṃ visrasya vāgyataḥ
sūtraṃ tu asāvabhyaṅkṣvāsāvāṅkṣveti piṇḍeṣvabhyañjanāñjane vāso
dadyāddaśāmūrṇāstukāṃ vā pañcāśadvarṣatāyā ūrdhvaṃ svalometi kṛṣṇatilatailenābhyañjanam | traikakudenāñjanamiti sindhau | trikakunnāma parvataviśeṣaḥ
tatrodbhavamityarthaḥ | etadva iti vāsodānaṃ pratipiṇḍaṃ mantrāvṛttyeti
kecit | bahuvacanaliṅgātsarvebhyaḥ sakṛnmantreṇetyanye | pitrāditribhyaḥ
sakṛnmantreṇa vāsodānamiti vṛttikṛt | pratipārvaṇaṃ mantrāvṛttiriti
kārikākāraḥ | atra vāsaḥsthāne daśāmūrṇāstukāṃ vā dadyādityarthaḥ
daśā vastrasyāntapradeśaḥ | ūrṇāstukā meṣalomanirmitā rajjuḥ | pañcāśadvarṣordhvaṃ jīvansvīyameva loma vāsodhaṃ dadyāt | mantrastvayameva sarveṣu
dravyeṣviti vṛttikṛt
vyāghraḥ—gandhapuṣpāṇi dhūpaṃ ca dīpaṃ ca vinivedayet