Shraddhapradipa (Rudradhara) 1.p7

1.p7

ityādi smṛtiṣu devaśrāddhapūrvakaṣaṭpuruṣaśrāddhaviṣayatayaiva(1) vidhirupapadyate | anyathā parvavyatiriktakāle pārvaṇasyāsambhavādvidhiniṣedhānupapattiḥ | smṛtisāramahārṇavahalāyudhakalpatarupitrabhaktiṣu smṛtinibandheṣvapi ‘aurasakṣetrajābhyāṃ sāgnikābhyāṃ mṛtāhe pārvaṇaṃ karttavyam’ iti yallikhitaṃ tadapi saṅgacchate | anyathā tadvacanamasambhavādayuktameva syāt | loke'pi ca prāmāṇikāstvaparapakṣīyapratipadādiśrāddheṣvapi pārvaṇapadaṃ prayuñjate | śrāddhārambhe prathamaṃ śrāddhīyadravyasekaḥ— nāprokṣitaṃ spṛśetkiñcicchrāddhe daive ca karmaṇi | ityatra na spṛśenna dadyādityarthaḥ | anena vākyena prokṣaṇaprāptau tatpuṇḍarīkākṣoccāraṇeneti kvacinnibandhe likhitam | puṃḍarīkākṣasmaraṇeneti kvacit | tatra— śaṅkhacakradharaṃ viṣṇuṃ dvibhujaṃ pītavāsasam | prārambhe karmaṇāṃ vipra puṇḍarīkaṃ smareddharim || iti mūlavākyam | yadyapyatra smaraṇameva vihitamasti tathāpyuccāraṇasya smaraṇapūrvakatayoccāraṇe smaraṇamāyātyevetyavirodha evetyācārānugṛhītamuccāraṇaṃ kriyate | tatrāviruddhaphalakīrttanamapi kriyate'smatsampradāye | tena ‘puṇḍarīkākṣaḥ punātu’ ityuccāryya dravyasekaḥ | tataḥ saṅkalpaḥ | tatra ‘adya pārvaṇaśrāddhamahaṃ kariṣye’