Shraddhapradipa (Rudradhara) 5.p4.2

5.p4.2

mṛte patyau patiśvaśurādibhiḥ saha melanaṃ kāryam | patiputrarahitāyāḥ sapiṇḍanamevaṃ niṣiddham | tathā ca mārkaṇḍeyapurāṇe— sapiṇḍīkaraṇaṃ tāsāṃ putrābhāve na vidyate | atra putrābhāva ityupalakṣaṇaṃ patiputrābhāva iti draṣṭavyam | patikartṛkasya strīsapiṇḍanasya vidhānāt | evaṃ sapatnīputre vidyamāne striyāḥ sapiṇḍanaṃ bhavati | bahvīnāmekapatnīnāṃ yadyekā putriṇī bhavet | sarvāstenaiva putreṇa putriṇyo manurabravīt || iti | sapatnīputravatyāḥ putriṇītvātideśenāputratvābhāvāt | evaṃ traivarṇikajātasya śūdrasya sapiṇḍanaṃ niṣiddham | nīyate tu sapiṇḍatvaṃ yeṣāṃ śūdrakulodbhave | sarve śūdratvamāyānti yadi svargajito'pi te || iti śaṅkhalikhitavākyāt | yatra sapiṇḍanaṃ niṣiddhaṃ tatra brahmapurāṇoktaṣoḍaśaśrāddhaiḥ pretatvavimuktiḥ | tathā ca brahmapurāṇenṛṇāṃ tu tyaktadehānāṃ śrāddhāḥ ṣoḍaśasaṃkhyayā | caturthe pañcame caiva navamaikādaśe tathā || tato dvādaśabhirmāsaiḥ śrāddhaṃ dvādaśasaṃkhyayā | kartavyaṃ śucibhisteṣāṃ tato viprāṃstu bhojayet || iti | atra ca mṛtakāryeṣu maraṇadināvadhikadinamāsādigaṇanāccaturthadināditvaṃ maraṇadināvadhikameva jñeyam | tathā cāśaucābhyantare'pi caturthadinādiṣu śrāddhaṃ kartavyam | atra ca varṣa yāvatsapiṇḍanakāleṣu niṣiddhanakṣatrasambhave niṣiddhanakṣatre sapiṇḍananiṣedhāt tatrāpi brahmapurāṇīyaṣoḍaśaśrāddhāni kartavyānīti bahuṣu nibandheṣu likhitam | lokāstu niṣiddhanakṣatre'pi sapiṇḍanakaraṇe pitrādikaraṇe kuladoṣābhāvātsvamātragatāniṣṭasambhavānnakṣatrānurodhaṃ nācanti |