Tirthacintamani 13.p18

13.p18

snātvā gadādharadarśanamahaṃ kariṣye | iti saṅkalpya tatra savidhi snānaṃ karttavyam | gadādharaśca pratimārūpastadadhikaraṇībhūtamuṇḍapṛṣṭhādrirūpaśca iti | taddarśanānantaram— oṃ namo vāsudevāya namaḥ saṅkarṣaṇāya ca | pradyumnāyāniruddhāya śrīdharāya ca viṣṇave || iti paṭhitvā gadādharaṃ praṇamet pūjayecca | tata uttaramānasaṃ gatvā oṃ adya pitṛbrahmalokanayanakāmaḥ pañcatīrthyāṃ snānamahaṃ kariṣye | iti saṅkalpyottaramānase udīcyāṃ kanakhale dakṣiṇamānase phalgutīrthe ca yathākramaṃ savidhi pratyekaṃ snānatarpaṇe kuryyāt | tato gadādharasamīpaṃ gatvā dugdha-dadhi-ghṛta-madhukhaṇḍātmakena pañcāmṛtenāṣṭottaraśatapalamitena gadādharaṃ snapayitvā puṣpavastrālaṅkārairarcayediti | eteṣāñca karmmaṇāṃ madhye caramaṃ pañcāmṛtasnānamevāvaśyakam | akaraṇe 'nindārthavādāt | itarāṇi tu kāmyāni svatantrāṇi ceti yathāśakti kāryyāṇīti | iti pañcatīrthīkṛtyam