Tirthacintamani 14.p39

14.p39

trailokye yāni tīrthāni satkṣetrāṇi ca kṛtsnaśaḥ | sevante satataṃ gaṅgāṃ kāśyāmṛttaravāhinīm || daśāśvamedhe yaḥ snātvā dṛṣṭvā viśveśvaraṃ śivam | sadyaḥ pāpairvimukto'sau mucyate bhavabandhanāt || gaṅgā hi sarvvataḥ puṇyā brahmahatyā'pahāriṇī | vārāṇasyāṃ viśeṣeṇa yatra cottaravāhinī || varaṇāyāstathāsyāśca jāhnavyāḥ saṅgame naraḥ | snānamātreṇa sarvvebhyaḥ pātakebhyo vimucyate || kāśyāmuttaravāhinyāṃ gaṅgāyāṃ kārttike tathā | snātvā vimucyate māghe mahāpāpā'tipātakaiḥ || sarvvalokeṣu tīrthāni yāni khyātāni tāni ca | sarvvāṇyetānyaśeṣeṇa vārāṇasyāntu jāhnavīm || uttarābhimukhīṃ puṇyāmāgacchanti dine dine | nityaṃ parvvasu sarvveṣu puṇyairāyatanaiḥ saha || mahāpātakadoṣādiduṣṭānāṃ sparśasambhavam | vyapohituṃ svapāpañca janaḥ pāpāpanuttaye || janmāntaraśatenāpi svakarmaniratasya ca | anyatra ṛṣibhiścāpi' mokṣo labhyeta vā na vā || ekena janmanā cātra gaṅgāyāṃ maraṇena ca | mokṣastu prāpyate kāśyāṃ nareṇāniyatātmanā | tadārabhya mune kāśyāṃ khyāto dharmmanado hradaḥ