Tirthacintamani 9.p103
Tīrthacintāmaṇi 9.p103
- Language
- Sanskrit
9.p103
svakīyapitṛbhiḥ sārddhaṃ rudraloke mahīyate | tatastu jāyate vipro gaṅgātīre dhamānvitaḥ || ante tu brahmavidbhūtvā mokṣamāpnotyasaṃśayam | tathaiva gopradānañca vidhinā kurute tu yaḥ || golomasaṃkhyayā tāvatkalpānyarbudasaṃkhyayā | goloke śivaloke vā kāmadhenuprajānvitaḥ || bhuñjānaḥ sarvvakāmāṃstu divyān mānāvidhān bahūn | devānāmapyalabhyāṃśca sthitvā tu saha bāndhavaiḥ || pitṛbhiśca suhṛdbhiśca sarvvaratnavibhūṣitaḥ | jāyate satkule paścāt dhanadhānyasamākule || ratnakāñcanasampūrṇe śīlavidyāyaśo'nvite | sa bhuktā vipulān bhogān putrapautrasamanvitaḥ || sarvvaduḥkhavinirmuktaḥ sarvvakāmasamanvitaḥ | sarvvaprāṇipriyo bhūtvā tato mokṣamavāpnuyāt || kapilā yadi dattā syād vidhinā vedapārage | narakasthān pitṝn sarvvān svargaṃ nayati vai tadā || nivarttanadvayaṃ bhūmergaṅgātīre viśeṣataḥ || viprāya vedaviduṣe tithau tasyāṃ viśeṣataḥ | naro dadāti bhaktyā vai tasya puṇyaphalaṃ tvidam || tadbhūmiparamāṇūnāṃ saṃkhyayā'yutasaṃkhyayā | somendraviṣṇulokeṣu brahmaloke tathaiva ca || śivaloke tathā śrīmān bhogān bhuṅkte yathāvidhi | jāyate rūpasampannaḥ sarvvaśokavivarjjitaḥ | sarvvasampatsamṛddhastu saptadvīpapatirbhavet || bherīśaṅkhādinirghoṣairgītavāditranisvanaiḥ | stutibhirmāgadhānāñca supto'sau pratibudhyate || sarvvasaukhyānavāpyeha sarvvadharmmaparāyaṇaḥ | narakasthān pitṝn sarvvān prāpayitvā divantathā | svargasthitān pitṝn sarvvān mocayitvā mahādyutiḥ || ante jñānāsinā chittvā avidyāṃ pañcapūrvikām1 | paraṃ vairāgyamāpannaḥ paraṃ brahmādhigacchati
Linked texts (4)
- Skandamahāpurāṇa (vulgate) — Sanskrit
- Nāradapurāṇa — Vyāsa, Sanskrit
- Tīrthaprakāśa — Mitramiśra, Sanskrit
- Kṛtyasārasamuccaya (Amṛtanātha Jhā Śarman) — Amṛtanātha Jhā Śarman 1800, Sanskrit