Tirthaprakasha 1.p13

1.p13

tathā, kāmaṃ krodhaṃ ca lobhaṃ ca yo jitvā tīrthamāvaset | na tena kiñcinna prāptaṃ tīrthābhigamanādbhavet || tīrthāni tu yathoktena vidhinā sañcaranti ye | sarvadvandvasahā dhīrāste narāḥ svargagāminaḥ || devalaḥ, kṛtvā pāpamavijñātaṃ bhrūṇahatyādi tatpunaḥ | vinaśyati mahāyajñairatha vā tīrthacaryyayā || yājñavalkyaḥ, anupātakinastvete mahāpātakino yathā | aśvamedhena śuddhyanti tīrthānusaraṇena vā || devalaḥ, tīrthe puṇyatame yathāvaddehasaṃnyāsāt brāhmaṇo mahāpātakānmucyate | mahābhārate, ajñānenāpi yasyeha tīrthayātrādikaṃ bhavet | sarvakāmasamṛddhaḥ sa svargaloke mahīyate || sthānaṃ ca labhate nityaṃ dhanadhānyasamākulam | aiśvaryyajñānasampannaḥ sadā bhavati bhogavān || tāritāḥ pitaraṃstena narakāt prapitāmahāḥ