Tirthaprakasha 1.p15

1.p15

tadeva saṅkalpena saha cetsyāt tadā bhūyo'dhikaṃ bhavati | anyeṣu, niṣiddhabhojanādiṣu | puṇyakriyāsu, snānādiṣu | nanutīrthaṃ prāpyānuṣaṅgeṇa snānaṃ tīrthe samācaran | snānajaṃ phalamāpnoti tīrthayātrāphalaṃ na tu || iti śaṅkhavacanavirodhāt kathamajñānāttīrthayātrāphalamiti cet, na | yatra prayojanāntaramātramuddiśya gacchati tatra yātrāphalābhāvasya śaṅkhena bodhanāt | yatra tīrthameva tattvenājñātvā sāmānyajalabuddhayoddiśya gacchati tatrājñānatastīrthayātrāphalasya pūrvavākye bodhanenāvirodhāt | bhārate, tathā puṇyāni tīrthāni puṇyānyāyatanāni ca | upāsya puṇyaṃ labdhvā ca bhavatyamaralokabhāk || atra ca “na te śakyā daridreṇa” ityādivacanajātena dhanānapekṣāṇāṃ tīrthānāṃ yāgādyapekṣayā'tiśaya uktaḥ | na ca japopavāsāderapi dhananirapekṣatayā kathaman‍yāpekṣayā'tiśayaḥ tīrthānāmevetivācyam | upavāsasya kāyakleśasādhyatayā tato'pi tīrthasyātiśayāt | upavāsāsāhiṣṇūnāṃ tatrāsāmarthyācca | kiñcasaṃvatsaraśataṃ sāgraṃ nirāhārasya yatphalam | prayāge māghamāse'sya tryahasnātasya tatphalam || ityāditīrthaphalamuktam | na caitāvānupavāsarāśiḥ kartuṃ śakyo viśeṣataḥ kaliyuge| tasmādbahuvittavyayāyāsanirapekṣatayā tīrthasevā dharmāntarebhyo viśiṣyate | atha tīrthakīrtanādimāhātmyam | bhārate, kīrtanāccaiva tīrthasya snānācca pitṛtarpaṇāt | dhunvanti pāpaṃ tīrthe ye te prayānti sukhaṃ param || kaurmye, tīrthāni prakṛtya | yatra snānaṃ japo homaḥ śrāddhadānādikaṃ kṛtam | ekaikaśo muniśreṣṭhāḥ punātyāsaptamaṃ kulam || bhārate dhaumyatīrthayātrāyām, diśastīrthāni śailāṃśca śṛṇu me gadato nṛpa | yān śrutvā gadato rājan viśoko bhavitāsi ha || draupadyā cānayā sārddhaṃ bhrātṛbhiśca nareśvara | śravaṇāccaiva teṣāṃ tvaṃ puṇyamāpsyasi pāṇḍava || gatvā śataguṇaṃ caiva tebhya eva narottama | brahmapurāṇe, vārāṇasyāṃ mahātīrthe naraḥ snātvā vimucyate | evaṃ prayāgamadhikṛtya— darśanāttasya tīrthasya nāmasaṅkīrttanādapi | mṛttikālabhanādvāpi naraḥ pāpānpramucyate || gaṅgāmadhikṛtya— gaṅgāgaṅgeti yairnāma yojanānāṃ śatairapi | sthitairuccāritaṃ hanti pāpaṃ janmatrayārjitam