Tirthaprakasha 1.p38

1.p38

tathāpyanindyabhojanasyāniṣedhādatra tasyāpi niṣedhārthamadhikadoṣārthaṃ cedam | tathā, tīrthaṃ gacchan caret sandhyāstisra ekatra mānavaḥ | nāsnāto nāśucirgacchenna bhuktvā na ca sūtakī || tisraḥ sandhyā ekatra caredityanena prātareva kṛtadinakṛtyena calitavyamiti pratīyate iti vadanti | aśuciḥ, purīṣādikaṃ kṛtvā'kṛtaśaucaḥ caṇḍālādisparśe'kṛtasnānaśca | nanu— tīrthe vivāhe yātrāyāṃ saṅgrāme deśaviplave | nagaragrāmadāhe ca spṛṣṭāspṛṣṭirna duṣyati || iti vacanenāsya virodha iti cet, maivam | tīrthe vivāha ityanena anivāryatīrthādyadhikaraṇakāspṛśyasparśo na doṣāyetyabhidhānāt | spṛṣṭāspṛṣṭirna duṣyatītivacanaṃ pakvānnaśuddhau kalpatarukṛtā likhitaṃ tīrthe pakvānnasparśe na doṣa iti | ata eva puruṣottamakṣetrādau tathaiva śiṣṭācāra iti| anye tu “spṛṣṭāspṛṣṭirna duṣyati” iti vacanamanenāhaṃ spṛṣṭa iti jñānaṃ yatra nāsti tadviṣayamityāhuḥ | yātrāmadhye yadyāśaucaṃ patati tadā''śaucanivṛttau gantavyaṃ “na ca sūtakī”iti vacanāt| evaṃ rajasvalāyāpi| yadvādīkṣiteṣvabhiṣikteṣu vratatīrthapareṣu ca | tapodānaprasakteṣu nāśaucaṃ mṛtasūtake || iti vacanāt yātrottaraṃ sūtakādau na doṣaḥ | “na ca sūtakī” itivacanaṃ tu yātrāpūrvaṃ sūtake sati na gacchedityetatparam | dīkṣiteṣvityanena dīkṣaṇīyeṣṭyuttaraṃ yajamānasya yatkarma tatrāśaucaṃ nāstītidarśitam | garuḍapurāṇe,