Pramāṇa · Search · About · API

Tirthaprakasha 4.p107

Tīrthaprakāśa 4.p107

Language
Sanskrit

4.p107.1

śrīkaṇṭha uvāca | jaya vighnakṛtāmādya bhaktānirvighnakāraka | avighnavighnaśamana mahāvighnaikavighnakṛt || jaya sarvagaṇādhīśa jaya sarvagaṇāgraṇīḥ | gaṇapraṇatapādābja gaṇanātītasadguṇa || jaya sarvaga sarveśa sarvabuddhyaikaśevadhe || sarvamāyāprapañcajña sarvakarmāgrapūjita | sarvamaṅgalamaṅgalya jaya tvaṃ sarvamaṅgala || amaṅgalopaśamana mahāmaṅgalahetuka | jaya sṛṣṭikṛtāṃ vandya jaya sthitikṛtāṃ vara | jaya saṃhṛtikṛtpūjya jaya satkarmasiddhida || siddhavandyapadāmbhoja jaya siddhavināyaka | sarvāsiddhyaikanilaya mahāsiddhyarddhisūcaka || aśeṣaguṇanirmāṇa guṇātītaguṇāgraṇīḥ | paripūrṇacaritrārtha jaya tvaṃ guṇavarjita || jaya sarvabalādhīśa balārātibalaprada | balākojjvaladantāgra bālā'vālaparākrama || anantamahimādhāra dharādharavidāraṇa | dantāgraprotadiṅnāga jaya nāgavibhūṣaṇa || ye tvāṃ namanti karuṇāmayadivyamūrtte sarvenasāmapi bhuvo bhuvi muktibhājaḥ | teṣāṃ sadaiva harasīśa mahopasargān svargāpavargamapi sampradadāsi tebhyaḥ || ye vighnarāja bhavatā karuṇākaṭākṣaiḥ samprekṣitāḥ kṣititale kṣaṇamātramatra | teṣāṃ kṣayanti sakalānyapi kilbiṣāṇi lakṣmīḥ kaṭākṣayati tān puruṣottamān hi || ye tvāṃ stuvanti natavighnavighātadakṣa dākṣāyaṇīhṛdayapaṅkajatigmaraśme | stūyanta eva ta iha prathitā na citraṃ citraṃ tadatra gaṇapā yadaho tadeva || ye śīlayanti satataṃ bhavato'ṅghriyugmaṃ te putrapautradhanadhānyasamṛddhibhājaḥ | saṃśīlitāṅghrikamalā bahubhṛtyavargairbhūpālabhogyakamalāṃ vimalāṃ labhante ||

4.p107.2

tvaṃ kāraṇaṃ paramakāraṇa kāraṇānāṃ vedyo'si vedaviduṣāṃ satataṃ tvamekaḥ | tvaṃ mārgaṇīyamasi kiñcana mūlavācāṃ vācāmagocara carācaradivyamūrtte || vedā vidanti na yathārthatayā bhavantaṃ brahmādayo'pi na carācarasūtradhāra | tvaṃ haṃsi pāsi vidadhāsi samastamekaḥ kaste stutivyatikaro manasāpyagamyaḥ || tvadduṣṭadṛṣṭiviśikhairnihatānnihanmi daityān purāndhakajalandharamukhyakāṃśca || kasyāsti śaktiriha yastvadṛte'pi tucchaṃ vāñchedvidhātumiha siddhida kāryajātam || anveṣaṇe ḍhuḍhirayaṃ prathito'sti dhātuḥ sarvārthaḍhuṇḍitatayā tava ḍhuṇḍināma | kāśīpraveśamapi ko labhate'tra dehī toṣaṃ vinā tava vināyakaḍhuṇḍhirāja || ḍhuṇḍhe praṇamya puratastava pādapadmaṃ yo māṃ namasyati pumāniha kāśivāsī | tatkarṇamūlamadhigamya purā diśāmi tatt kiṃcidatra na punarbhāvitāsti yena || snātvā naraḥ prathayato maṇikarṇikāyāmud‌dhūlitāṅghriyugalastu sacailamāśu | devarṣimānavapitṝnapi tarpayitvā jñānodatīrthamabhilabhya bhajeta yastvām || sāmodamodakabharairvaradhūpadīpairmālyaiḥ sugandhabahulairanulepanaiśca | samprīṇya kāśinagarīphaladānadakṣaṃ moktavātha māṃ ka iha siddhyati naiva ḍhuṇḍhe || tīrthāntarāṇi ca tataḥ kramavarjito'pi saṃsādhayanniha bhavatkaruṇākaṭākṣaiḥ | dūrīkṛtastvahitaghātyupasargavargo ḍhuṇḍhe labhedavikalaṃ phalamatra kāśyām || yaḥ pratyahaṃ namati ḍhuṇḍhivināyakaṃ tvāṃ kāśyāṃ puri pratihatākhilavighnasāṅghaḥ | no tasya jātu jagatītaḷavarttivastu duṣpāpamatra ca paratra ca kiñcanāpi || yo nāma te japati ḍhuṇḍhivināyakasya tadvai jayantyanudinaṃ hṛdi siddhayo'ṣṭau |

4.p107.3

bhogān visṛjya vividhān vibudhopabhogyān nirvāṇayā kamalayā śriyate sa cānte || dūrasthito'pyaha rahastava pādapīṭhaṃ yaḥ saṃsmaret sakalasiddhida ḍhuṇḍhirāja | kāśisthiteravikalaṃ sa phalaṃ labheta naivānyathā na vitathā mama vāk kadācit || jāne vighnānasaṅkhyātān vinihantumanekatā | kṣetrasyāsya mahābhāga nānārūpairiha sthitaḥ || yāni yāni ca rūpāṇi yatra yatra ca te'nagha | tāni tatra ca vakṣyāmi śṛṇvantvete divaukasaḥ || prathamaṃ ḍhuṇḍhirājo'si mama dakṣiṇato manāk | āḍhuṇḍḍhe sarvabhaktebhyaḥ sarvārthān samprayacchasi || aṅgāravāsaravatīmiha yaścaturthīṃ samprāpya modakabharaiḥ parimodavadbhiḥ | pūjāṃ vidhāya vividhāṃ tava gandhamālyaistānapyamutra vidadhāsi gaṇān gaṇeśa || ye tvāmiha praticaturthi samarcayanti ḍhuṇḍhe vigāḍhamatayaḥ kṛtinasta eva | sarvāpadāṃ śirasi vāmapadaṃ nidhāya samyaggajānana gajānanatāṃ labhante || māghaśuklacaturthyāṃ tu naktavrataparāyaṇāḥ | ye tvāṃ ḍhuṇḍhe'rcayiṣyanti te'rcyīḥ syurasuradruhām || vidhāya vārṣikīṃ yātrāṃ caturthīṃ prāpya tāpasīm | tāpasīṃ māghīm | śuklāṃ śuklagileairbaddhā māśnīyāt laḍḍukān vratī || kāryā yātrā prayatnena kṣetrasiddhimabhīpsubhiḥ | tasyāṃ caturthyāṃ tvatprītyai ḍhuṇḍhe sarvopasargahṛt || tāṃ yātrāṃ nātra yaḥ kuryānnaivedyaṃ tilalaḍḍukaiḥ | upasargasahasraistu sa hantavyo mamājñayā || homaṃ tilājyadravyeṇa yaḥ kariṣyati bhaktitaḥ | tasyāṃ caturthyāṃ mantreṇa tasya mantraḥ prasetsyati || vaidiko'vaidiko vāpi yo mantraste gajānana ! | japtastvatsannidhau ḍhuṇḍhe ! siddhiṃ dāsyati vāñchitām || īśvara uvāca |

4.p107.4

imāṃ stutiṃ mama kṛtiṃ yaḥ paṭhiṣyati sanmatiḥ | na jātu taṃ tu vighnaughāḥ pīḍayiṣyanti niścitam || ḍhauṇḍhī stutimimāṃ puṇyāṃ yaḥ paṭhet ḍhuṇḍhisannidhau | sānnidhyaṃ tasya satataṃ bhajeyuḥ sarvasiddhayaḥ || imāṃ stutiṃ naro japtvā paraṃ niyatamānasaḥ | mānamairapi pāpaistu nābhibhūyeta karhicit || putrān kalatraṃ kṣetrāṇi varāśvān varamandiram | āpnuyācca dhanaṃ dhānyaṃ ḍhuṇḍhistotraṃ japannaraḥ || sarvasampatkaraṃ nāma stotrametanmayeritam | prajaptavyaṃ prayatnena muktikāmena sarvadā || japtvā stotramidaṃ puṇyaṃ kvāpi kārye gamiṣyataḥ | puṃsaḥ puraḥ sameṣyanti niyataṃ sarvasiddhayaḥ || iti ḍhuṇḍhirājavināyakastavaḥ | gacchettato viśvapatiṃ mahāmatiḥ pradakṣiṇīkṛtya sutāratīrtham |snātvā tato daṇḍapatiṃ praṇamya sampūjya nirvāṇagataṃca pañcakam|| sutāratīrthe jñānavāpīm | daṇḍapatiṃ daṇḍapāṇim | nirvāṇamaṇḍapagataṃ devatāpañcakaṃ kāśīkhaṇḍe prapañcitam | ādityaṃ draupadīṃ viṣṇuṃ daṇḍapāṇiṃ maheśvaram | iti

Linked texts (2)