Tirthaprakasha 4.p107.1

4.p107.1

śrīkaṇṭha uvāca | jaya vighnakṛtāmādya bhaktānirvighnakāraka | avighnavighnaśamana mahāvighnaikavighnakṛt || jaya sarvagaṇādhīśa jaya sarvagaṇāgraṇīḥ | gaṇapraṇatapādābja gaṇanātītasadguṇa || jaya sarvaga sarveśa sarvabuddhyaikaśevadhe || sarvamāyāprapañcajña sarvakarmāgrapūjita | sarvamaṅgalamaṅgalya jaya tvaṃ sarvamaṅgala || amaṅgalopaśamana mahāmaṅgalahetuka | jaya sṛṣṭikṛtāṃ vandya jaya sthitikṛtāṃ vara | jaya saṃhṛtikṛtpūjya jaya satkarmasiddhida || siddhavandyapadāmbhoja jaya siddhavināyaka | sarvāsiddhyaikanilaya mahāsiddhyarddhisūcaka || aśeṣaguṇanirmāṇa guṇātītaguṇāgraṇīḥ | paripūrṇacaritrārtha jaya tvaṃ guṇavarjita || jaya sarvabalādhīśa balārātibalaprada | balākojjvaladantāgra bālā'vālaparākrama || anantamahimādhāra dharādharavidāraṇa | dantāgraprotadiṅnāga jaya nāgavibhūṣaṇa || ye tvāṃ namanti karuṇāmayadivyamūrtte sarvenasāmapi bhuvo bhuvi muktibhājaḥ | teṣāṃ sadaiva harasīśa mahopasargān svargāpavargamapi sampradadāsi tebhyaḥ || ye vighnarāja bhavatā karuṇākaṭākṣaiḥ samprekṣitāḥ kṣititale kṣaṇamātramatra | teṣāṃ kṣayanti sakalānyapi kilbiṣāṇi lakṣmīḥ kaṭākṣayati tān puruṣottamān hi || ye tvāṃ stuvanti natavighnavighātadakṣa dākṣāyaṇīhṛdayapaṅkajatigmaraśme | stūyanta eva ta iha prathitā na citraṃ citraṃ tadatra gaṇapā yadaho tadeva || ye śīlayanti satataṃ bhavato'ṅghriyugmaṃ te putrapautradhanadhānyasamṛddhibhājaḥ | saṃśīlitāṅghrikamalā bahubhṛtyavargairbhūpālabhogyakamalāṃ vimalāṃ labhante ||