Tirthaprakasha 4.p113
Tīrthaprakāśa 4.p113
- Language
- Sanskrit
4.p113.1
ḍhuṇḍhirāja ! gaṇeśāna ! mahāvighnaughanāśana ! || pañcakrośasya yātrārthaṃ dehyājñāṃ kṛpayā vibho | viśveśaṃ triḥparītyā'tha daṇḍavat praṇipatya ca || modaṃ pramodaṃ sumukhaṃ durmukhaṃ gaṇanāyakam | praṇamya pūjayitvādau daṇḍapāṇiṃ tato'rcayet || kālarājaṃ ca purato viśveśasya jagadguroḥ | pūjayitvā tato gacchenmaṇikarṇīṃ vidhānataḥ || tatra snātvā mahādevaṃ maṇikarṇīśamarcayet | vināyakaṃ siddhidaṃ ca punarāgatya pūjayet || maṇikarṇītaṭe channaṃ gaṅgākeśavamapyuta | lalitāṃ ca tataḥ pūjya jarāsandheśvaraṃ vibhum || somanāthaṃ tataḥ pūjya dālabhyeśvarameva ca | śūlaṭaṅkaṃ mahādevaṃ vārāhaṃ pūjya ca vrajet || daśāśvamedhaliṅgaṃ ca vandīṃ tatraiva pūjayet | sarveśvaraṃ ca kedāraṃ tato hanumadīśvaram || saṅgarmeśaṃ tataḥ pūjya lolārkaṃ pūjayettataḥ | arkasaṃjñaṃ gaṇādhyakṣamasestīraṃ punarvrajet || kṣetraṃ pradakṣiṇīkurvaṃstilamātraṃ na santyajet | durgākuṇḍe tataḥ snātvā yajet durgavināyakam || durgāṃ saṃpūjya vidhivat vasettatra sukhāptaye | brāhmaṇān bhojayettatra madhupāyasalaḍḍukaiḥ || rātrau jāgaraṇaṃ tatra purāṇaśravaṇādikam | kuryācca pūjanaṃ bhaktyā paropakaraṇādi ca || jaya durge ! mahādevi ! jaya kāśīnivāsini ! | kṣetravighnahare ! devi ! punardarśanamastu te || iti durgāṃ prārthayitvā viṣvakseneśvaraṃ tataḥ | pūjayitvā kardameśaṃ pañcavrīhitilairnamet || ādau kardamatīrthe tu snānaṃ kūpāvalokanam | somanāthaṃ virūpākṣaṃ nīlakaṇṭhaṃ tato'rcayet || tatra vāsaṃ vidhāyāgrau kiñciddhomaṃ dvijār hiscanam | śrāddhādi dharmakāryāṇi kṛtvā mucyehaṇatrayāt || kardameśa !
4.p113.2
mahādeva ! kāśīvāsijanapriya ! | tvatpūjanānmahārudra ! punardarśanamastu te || prātaḥ snātvā pūjayitvā pūjayitvā ca saddvijān | nāganāthaṃ ca cāmuṇḍāṃ mokṣeśaṃ karuṇeśvaram || vīrabhadraṃ tato durgāṃ vikaṭākhyāṃ prapūjayet | unmattabhairavaṃ nīlaṃ kālakūṭaṃ tato'rcayet || durgāṃ ca vimalāṃ gatvā mahādevaṃ tato vrajet | nandikeśaṃ śṛṅgarīṭiṃ tatraiva ca gaṇapriyam || virūpākṣaṃ ca yakṣeśaṃ vimaleśvarameva ca | mokṣadaṃ jñānadaṃ caivāmṛteśaṃ tatra pūjayet || gandharvasāgaraṃ tīrthaṃ bhīmacaṇḍīṃ tato vrajet | tatra snātvā bhīmacaṇḍīṃ payasā snāpayetsudhīḥ || pañcopacāraiḥ sampūjya brāhmaṇān paritoṣayet | tatra vāsaṃ prayatnena kuryāccaṇḍīvināyakam || raviraktākṣagandharvaṃ narakārṇavatāraṇam | śivaṃ prapūjya yatnena rātrau pūrvavadācaret || prātarutthāya susnātaḥ prārthayedbhīmacaṇḍikām | bhīmacaṇḍi ! pracaṇḍāni mama vighnāni nāśaya || namaste'stu gamiṣyāmi punardarśanamastu te | tato gacchedakapādagaṇānnatvātha taṇḍulān || tilāṃśca vikirettatra dhanadhānyādisampade | tato gacchenmahābhīmaṃ bhairavaṃ bhairavīṃ śubhām || bhūtanāthaṃ ca someśaṃ pūjayet sindhurodhasi | kālanāthaṃ kapardīśaṃ kāmeśaṃ ca gaṇeśvaram || vīrabhadraṃ cārumukhaṃ gaṇanāṃthaṃ ca pūjayet | tato gaccheddehadīśaṃ vighnapūganivāraṇam || modakaiḥ pṛthukairlājaiḥ saktubhiścekṣuparvabhiḥ | pūjayet śraddhayā devaṃ taṃ dehalivināyakam || tatpārśve ṣoḍaśa punarvighnanāthān samarcayet | uddaṇḍagaṇapaṃ pūjya utkaleśvarameva ca ||dyāvābhūmīśvaraṃ tatra pūjayennahuṣeśvaram |
4.p113.3
tatra vāsaṃ prakalpyātha pūrvavajjāgarādikam || kṛtvā snātvā'tha rāmeśaṃ prārthayetkāśikāsadam | śrīrāmeśvara ! rāmeṇa pūjitastvaṃ sanātana ! || ājñāṃ dehi mahādeva ! punardarśanamastu te | liṅgāni suvahūnyādau varaṇāpāragāni ca || pūjayitvā tato gaccheddevasaṅghaniṣevitam | devasaṅgheśvaraṃ kiñcidṛṣṭvā sthitvā tato brajet || pāśapāṇiṃ gaṇeśaṃ ca kṣetramadhye vyavasthitam | pūjayitvā vahiścaiva pṛthvīśvaramatho vrajet || eko'śvamedhaḥ pṛthunā kṛtaḥ kṣetrādvahiḥ purā | svargabhūmistu sā jñeyā mokṣabhūmistu madhyataḥ || kāśyāścaturdiśaṃ devi yojanaṃ svargabhūmikā | mṛtastatra hi gacchanti svarge sukṛtināṃ padam || tataḥ sa yūpaṃ hi saraḥ spṛṣṭvā gacchecchanaiḥ śanaiḥ | mahākṣetraṃ kāpilaṃ tu yatra śrīvṛṣabhadhvajaḥ || tatra snātvā vidhānena tarpayitvā pitṝnatha | śrāddhaṃ vidhāya suśraddhaḥ pūjayedvṛṣabhadhvajam || nivasettaṃ tu divasa sambhavaṇādi prakalpayet | pradakṣiṇīkṛtya tato gacchet jvālāsiṃhakam || evaṃ pradakṣiṇīkṛtya saraḥ kāpilamuttamam | varaṇāṃ ca tatastīrtvā snātvā vai saṅgame śubhe || ādikeśavamabhyarcya saṅgameśvarameva ca | vināyakaṃ kharvasaṃjñaṃ pūjayitvā tato vrajet || kroḍīkṛtya yavān śuddhān vikiran viṣṇumuccaran | mahādeśvaramabhyarcya trilocanamataḥ param || bindumādhavamabhyarcya hṛde pāñcanade śubhe | gabhastīśaṃ maṅgalāṃ ca gaurīṃ dṛṣṭvā tato vrajet || vāsiṣṭhavāmadevau ca parvateśvarameva ca | maheśvaraṃ samabhyarcya tataḥ siddhivināyakam || saptāvaraṇagān divyān pūjayedruṇanāyakān | maṇikarṇyāṃ tataḥ snātvā gacchedviśveśvaraṃ yamī ||
4.p113.4
namaskṛtya maheśānaṃ praviśeddevasannidhau | pañcopacāraiḥ sampūjya stutvā natvā punaḥ punaḥ || muktimaṇḍapamāgatya kṛtārthastatra saṃviśet | viṣṇuṃ ca daṇḍapāṇiṃ ca duṇḍhiṃ bhairavameva ca || ādityaṃ gaṇapāṃścaiva pūjayetpunareva ca | pradakṣiṇīkṛtān devān smarettattatkramātsudhīḥ | jaya viśveśa ! viśvātman ! kāśīnātha ! jagadguro ! || tvatprasādānmahādeva ! kṛtā kṣetrapradakṣiṇā | anekajanmapāpāni kṛtāni mama śaṅkara ! || gatāni pañcakrośātmaliṅgasamyakpradakṣiṇāt | tvadbhaktiḥ kāśivāsaṃ ca sāhityaṃ pāpakarmaṇām || satsaṅgaśravaṇādyaiśca kālo gacchatu naḥ sadā | hara ! śambho ! mahādeva ! sarvajña ! sukhadāyaka ! || prāyaścittaṃ sunirvṛttaṃ pāpānāṃ tvatprasādataḥ | punaḥ pāpamatirmāstu dharmabuddhiḥ sadāstu me || iti stutvā yathāśaktyā dattvā dānaṃ dvijanmanām | badhvā karayugaṃ mantrī mantrametamudīrayet || pañcakrośasya yātreyaṃ yathāvadya mayā kṛtā | nyūnaṃ sampūrṇatāṃ yātu tvatprasādādumāpate ! || iti prārthya mahādevaṃ gacchedrehaṃ svakaṃ svakam | nyūnātiriktadoṣāṇāṃ parihārāya dakṣiṇām || saṅkalyāgatya ca gṛhe brāhmaṇān bhojayettataḥ | tata āgatya ca gṛhe kuṭumbaiḥ saha bhojanam || kṛtvātmānaṃ tato dhyāyet kṛtakṛtyo bhavediti | ekarātraṃ tu madhye yaḥ pravaset śucimānasaḥ || varaṇāyāstaṭe ramye sa yāti paramāṃ gatim | dvirātraṃ madhyavasatiṃ yaḥ kuryāddharmatatparaḥ || prathamaṃ caṇḍikākṣetre dvitīyaṃ varaṇātaṭe | divasaṃ tu vaseddhīmān tato viśveśvaraṃ vrajet || yastu trirātramuṣito madhye bhavati pārvati ! | durgāsthale bhīmacaṇḍyāṃ rāmeśe vāsapṛcchati ||
4.p113.5
vasatiṃ yastu kurute madhye dinacatuṣṭayam | prathamāṃ vasatiṃ kuryāt kardameśvarasannidhau || dvitīyāṃ bhīmacaṇḍyāṃ ca vasatiṃ parikalpayet | rāmeśvare tṛtīyāṃ ca caturthīṃ kapilātaṭe || rājavṛddhakumārāṇāṃ yatheṣṭaṃ vāsa iṣyate | yathākathañciddeveśi ! pañcakrośapradakṣiṇam || kuryādeva na māsādi cintayeddharmakovidaḥ | sa eva śubhadaḥ kālo yasmin śraddhodayo bhavet || satyaśraddhā guṇavatī nāsatyā sā phalapradā | kāśyāṃ tiṣṭhati yo nityaṃ snāti bhāgīrathījale || kuryātsāṃvatsarīṃ yātrāṃ pañcakrośasya sundari ! | sa brahmabhūto nivasenmamānugrahataḥ sukhī || iti