Tirthaprakasha 4.p119

4.p119

prāmādikāghalopāya pratibhūtaṃ vibhorgṛham | kuryātpradakṣiṇaṃ nityaṃ tatkalmaṣajihīrṣayā || pratibhūtaṃ, praticaturdaśī | vibhorgṛham, antargṛham | atha kāśyāṃ laghupāpaprāyaścittam | pādme, sūkṣmapāpavināśāya nityayātrāvidhirbhavet | sa ca prāgdarśita eva | tathā, tricaturdaśaliṅgānāṃ sūte pūjāparo bhavet | ityādyuktam | kāśīkhaṇḍe, vārāṇasyāmuṣitvā yo bhairavaṃ na bhajennaraḥ | tasya pāpāni varddhante śuklapakṣe yathā śaśī || tathā, pramādātpātakaṃ kṛtvā śambhorānandakānane | dṛṣṭvā triviṣṭapaṃ liṅgaṃ samabhyarcyatibhaktitaḥ || gandhādyairupacāraistu kṛtveha paripūjanam | brāhmaṇānvācayetpaścānniṣpāpo'hamiti bruvan || evaṃ kurvan naraḥ prājño nirenā jāyate kṣaṇāt | tataḥ pañcanade snātvā maṇikarṇīhrade tataḥ || tato viśveśamabhyarcya prāpnoti sukṛtaṃ mahat | iti sukaraprāyaścittam | atha kāśyāṃ grahaṇādau phalātiśayo'bhidhīyate | liṅgapurāṇe, aṣṭamyāṃ ca caturdaśyāṃ pakṣayorubhayorapi | śaśibhānūparāge ca kārttike ca viśeṣataḥ || sarvaparvasu puṇyeṣu viṣuveṣvayaneṣu ca | pṛthivyāṃ sarvatīrthāni vārāṇasyāṃ tu jāhnavīm || uttarapravahāṃ puṇyāṃ mama maulivinirgatām | pituste girirājasya sutāṃ himavataḥ śubhām || bhajante sarvato'bhyetya tān śṛṇuṣva varānane ! | sannihatyā kurukṣetraṃ sārddhaṃ tīrthaśataistathā || naimiṣaṃ puṣkaraṃ caiva prayāgaṃ sapṛthūdakam | sandhyā saptarṣayaścaiva sarvā nadyaḥ sarāṃsi ca || samudrāḥ sapta caivātra devatīrthāni kṛtsnaśaḥ | bhāgīrathīṃ sameṣyanti sarvaparvasu kāśikām || avimukteśvaraṃ caiva kāśīsthamacalātmaje ! || pṛthivyāṃ yāni tīrthāni guhyānyāyatana|ni ca || praviśanti sadābhyetya puṇye'smin sarvaparvasu