Tirthaprakasha 4.p13

4.p13

tarpaṇaṃ pitṛdevānāṃ śrāddhadānaṃ sadakṣiṇam | tīrthe tīrthe ca godānaṃ niyataḥ prākṛto vidhiḥ || viśiṣṭakhyātāliṅgeṣu vṛṣadānaṃ vidhīyate | snānaṃ vilepanaṃ pūjāṃ devatānāṃ samācaret || saṃvatsaraṃ dvimāsonaṃ punastīrthaṃ vrajedyadi | muṇḍanaṃ copavāsaṃ ca tato yatnena kārayet || brāhmaṇānāṃ bhūmidānaṃ devapūjākarāya caṃ | sarvatra devayātrāyāṃ vidhireṣa pravarttate || tathā, devānāṃ darśanaṃ puṇyaṃ darśanātsparśanaṃ varam | sparśanādarcanaṃ śreṣṭhaṃ ghṛtasnānamataḥ param || aṣṭakṛtvo mantrajapaḥ suprabhūtasugandhibhiḥ | prāhurgaṅgājalaiḥ snānaṃ ghṛtasnānasamaṃ budhāḥ || ghṛtagrahaṇaṃ pañcāmṛtopalakṣaṇam | arcane tu brahmaviṣṇuśivādityādīnāṃ gandhapuṣpādyupacārādau viśeṣāḥ pūjāprakāśādavagantavyāḥ | pradakṣiṇāyāṃ tu viśeṣaḥ | ekāṃ caṇḍyā rakheḥ sapta tisro dadyādvināyake | catasro viṣṇave deyāḥ śivasyārddhapradakṣiṇā || tathā, śivaṃ pradakṣiṇaṃ kurvan somasūtraṃ na laṅghayet | agre pṛṣṭhe vāmabhāge samīpe garbhamandire || japahomanamaskārāñca kuryāddevatālaye | agre mṛtyumavāpnoti pṛṣṭhe tvapacayaḥ smṛtaḥ || vāmabhāge bhavennāśo dakṣiṇe sarvakāmadaḥ | yaśaḥ paśupateragre daṇḍavat patato bhuvi || patanti pātakāḥ sarve nottiṣṭhanti tadā saha | iti vacanāt śivasyāgre'pi namaskāraḥ kāryaḥ | śivapurāṇe, yastu śaṅkaranirmālyaṃ pādenākramate naraḥ | ṣaṣṭivarṣasahasrāṇi tiryagyoniṣu jāyate