Tirthaprakasha 4.p185

4.p185

ityarthavādo'tra mūlam | atha somavāsare | kāśīkhaṇḍe, īśānatīrthe yaḥ snātvā viśeṣāt somavāsare | santarpya devarṣipitṝn dattvā dānaṃ svaśaktitaḥ || tataḥ samarcca śrīliṅgaṃ mahāsambhāravistaraiḥ | atrāpi dattvā snānarathaun kṛtakṛtyo bhavennaraḥ || iti | īśānatīrthaṃ, jñānavāpī | śrīliṅgaṃ, viśveśvaraḥ | īśāneśo jñāneśo vetyanye | śrāvaṇe somavāre kedārakuṇḍe snātvā kedāreśo'bhyarcya iti śiṣṭāḥ | atha bhaume | bhaumavāre sadā pūjyā devī nigaḍabhaṅginī | kṛtvaikabhaktaṃ bhaktyā'tra bandīmokṣaṇakāmyayā || aṣṭamyāṃ ca caturdaśyāṃ bhaumavāre viśeṣataḥ | sampūjyā satataṃ kāśyāṃ durgā durgārttihāriṇī || tathā, bhaume bhairavayātrā tu karttavyā pāpahāriṇī | iti | śrāvaṇabhaumacatuṣṭaye kāmākhyāyātretyācāraḥ | kevalabudhe yātrā na śrūyate | atha bṛhaspatau | bṛhaspatīśvaraṃ liṅgaṃ rudrakuṇḍācca paścime | gurupuṣyasamāyoge dṛṣṭvā divyāṃ labhediram || iti | atha śukre | āvarṣa prati śukrāya kṛcchravrataparāyaṇāḥ | tvaddine śukrakūpe tu kṛtasarvodakakriyāḥ || śukreṣamarcayiṣyanti śṛṇu teṣāṃ tu yatphalam | avandhyaśukrāste martyāḥ putravanto'bhiretasaḥ | puṃstvasaubhāgyasampannā bhaviṣyanti na saṃśayaḥ || vyapetavighnāste sarve janāḥ syuḥ sukhavāsinaḥ | iti dattvā varān devastatra liṅge layaṃ yayau || iti | atha śanau | śanaiścareśvaraṃ devaṃ vārāṇasyāṃ suśobhanam | dṛṣṭvā bādhā na jāyeta śanibāre tadarcanāt || iti | iti nānāliṅgayātrā samāptā | uktaṃ ca laiṅge nānāliṅgāni prakṛtya-uddeśamātraṃ kathitaṃ mayā tubhyaṃ varānane ! | na śakyo vistaro vaktuṃ varṣakoṭiśatairapi || iti | atha kāśyāṃ nānātīrthāni | kāśīkhaṇḍe, durgākuṇḍe naraḥ snātvā sarvadurgārttihāriṇīm | durgāṃ sampūjya vidhivatsarvajanmaghamutsṛjet || sā durgā śaktibhiḥ sārddhaṃ kāśīṃ rakṣati sarvataḥ | tāḥ prayatnena sampūjyāḥ kālarātrimukhā nava || rakṣanti kṣetrametadvai tathānyā nava śaktayaḥ | upasargasahasrebhyastā vai digdevatāḥ kramāt || śatanetrā sahasrāsyā tathāyutabhujā parā | aśvārūḍhā gajāsyā ca tvaritā śavavāhinī || vihvalā saubhāgyagaurī ca sṛṣṭāḥ prācyādimadhyataḥ | etā yatnena sampūjyāḥ kṣetrarakṣaṇadevatāḥ || tathā, sarveṣāmeva tīrthānāṃ snānādyanyāpyate phalam | tatphalaṃ samyagāpyeta narairgaṅgāsisaṅgame || iti | brahmavaivartte, devyuvāca | sapta puryyaḥ kāśikāyāṃ santi śaṅkara ! śaṅkarāḥ | śrutāstvatto mahādeva tāsāṃ khyātāni me vada || yātrādināni ca brūhi phalaṃ tāsāṃ vimuktidam | tataḥ śivenoktamśṛṇu pārvvati ! vakṣyāmi yadgopyaṃ mama sarvadā | yatra yā pūḥ samuddiṣṭā kāśyāṃ tanna vadāmi tām || śaṅkhoddhārapradeśe tu dvārakā parikīrttitā | bindumādhavapārśvasthā viṣṇukāñcīti viśrutā || uttarārkāduttarato mathurā varaṇāvadhiḥ | ayodhyā vāyukoṇe tu someśvarasamīpataḥ || yatra rāmeśvaraṃ liṅgaṃ vavande sītāpatiḥ svayam | vibhīṣaṇādibhiryatra rākṣasairvvānarairapi || sthāpitānyayutaṃ sārddhaṃ liṅgāni paritaḥ pṛthak | agnisambhedakoṇe tu gaṅgādvāraṃ prakīrttitam || vṛddhakālātpurobhāge kṛttivāseśvarāvadhi | mahākālapurī jñeyā vadantī sarvapāpahā || etāḥ kāśyāṃ puraḥ pūrvaṃ devairbrahmādibhiḥ śive ! | kṛtāḥ prakāśitā kāśī janitrī bhogamokṣayoḥ || prāvṛḍṛtau dvāravatī tathā mokṣakarī śubhā | śaratkāle viṣṇukāñcī gantavyā pratyahaṃ budhaiḥ || mathurā vasantasamaye gantavyā bhaktivardhinī | ayodhyā grīṣmakāle tu tāpatrayavināśinī || avantikā himartau tu mahājāḍyanivāriṇī | māyāpurī tu śiśire rajoguṇavināśinī || kāśyāḥsarvā niḥsṛtāḥsṛṣṭikāle kāśyāmetāḥ sthitikāle vasanti| kāśyāṃ līnāḥ sarvasaṃhārakāle jñātavyāstā muktipuryo bhavāni !