Tirthaprakasha 4.p222

4.p222

śaive, gocarmamātrāṃ pṛthivīṃ gaṅgātīre dadāti yaḥ | akṣayāyāṃ tṛtīyāyāṃ so'tra kṣitipatirbhavet || ādityapurāṇe, gavāṃ śataṃ vṛṣasyaiko yatra tiṣṭhatyayantritaḥ | taddhi gocarmamātraṃ tu prāhurvedavido janāḥ || nandipurāṇe, eko'śnīyādyadutpannaṃ naraḥ saṃvatsaraṃ phalam | gocarmamātrā sā kṣoṇī stokā vā yadi vā bahuḥ || bhaviṣye, grāmaṃ gaṅgātaṭe yo'sau viprebhyaḥ samprayacchati | brahmaviṣṇuśivebhyaśca durgāyai bhāskarāya ca || sarvadāneṣu yatpuṇyaṃ sarvayajñeṣu yatphalam | sarvatīrtheṣu yatpuṇyaṃ sarvavratatapaḥsu ca || sahasraguṇitaṃ tatra phalaṃ syādgrāmadānataḥ | sūryyakoṭipratīkāśairdivyastrīkoṭisaṃyutaiḥ || divyaratnamayaiścitrairvimānairvaiṣṇave pure | krīḍate sarvasampannaḥ śāṅkare ca pure tathā || svakīyapitṛbhiḥ sārddhaṃ krīḍate kālamakṣayam | yāvattadgātrabhūmervai paramāṇoḥ susañcayaḥ || bhogān bhuktvā tato loke jāyate yogināṃ kule | aṇimādiguṇairyuktaḥ svayaṃ bhogo bhavatyapi || dehānte nirmale nitye pare brahmaṇi līyate | iti