Tirthaprakasha 4.p242

4.p242

gāruḍe, tīrthaśrāddhaṃ gayāśrāddhaṃ śrāddhamanyacca paitṛkam | abdamadhye na kurvīta mahāguruvipattiṣu || tatraiva, asthikṣepaṃ gayāśrāddhaṃ śrāddhaṃ cāparapākṣikam | abdamadhye na kurvīta kṛte'pi hi sapiṇḍane || iti | atra 'sapiṇḍīkaraṇaṃ vinā' iti caturthacaraṇaṃ paṭhitvā kṛte sapiṇḍīkaraṇe varṣamadhye'pi gayāśrāddhaṃ kārayanti | atra pitrādereva varṣamadhye na kāryaṃ "mahāguruvipattiṣu" itiśravaṇāt | pitṛvyādeḥ karaṇe na doṣaḥ | vāyavīye, gayāyāṃ sarvakāleṣu piṇḍaṃ dadyādvicakṣaṇaḥ | adhimāse janmadine aste ca guruśukrayoḥ || na tyajeta gayāśrāddhaṃ siṃhasthe ca bṛhaspatau | iti | agnipurāṇe, gayāśrāddhaṃ prakurvīta saṅkrāntyādau viśeṣataḥ | kāle cāparapakṣe vā caturthyāditithiṣvapi || iti | sakalāparapakṣe caturthyādau vetyarthaḥ | eṣu phalātiśayaḥ | 'viśeṣataḥ' ityupādānāt | smṛtiratnāvalyām, makare varttamāne tu grahaṇe candrasūryayoḥ | durlabhaṃ triṣu lokeṣu gayāyāṃ piṇḍapātanam || iti | gayāśrāddhaṃ dvādaśadaivataṃ kāryam | anvaṣṭakāsu vṛddhau ca gayāyāṃ ca mṛte'hani | atra mātuḥ pṛthakśrāddhamanyatra patinā saha || itivāyavīyāt | pitrāditrikaṃ, mātrāditrikaṃ, mātāmahāditrikaṃ, viśvedevānāṃ trayamiti dvādaśadaivatam | ata eva "pitā pitāmahaścaiva" ityādimantre paurāṇike navānāmevollekhaḥ śrūyate | hemādryādimate'pyevam | mātāmahādīnāṃ sapatnīkatvena nirdeśa iti viśeṣaḥ | parantu agnipurāṇe-