Tirthaprakasha 4.p259

4.p259

atha pañcatīrthīdināpekṣayā caturthadinakṛtyam | vāyupurāṇe, phalgutīrthe caturthe'hni snānādikamathācaret | gayāśirasyatha śrāddhaṃ pade kuryāt sapiṇḍakam || sākṣādgayāśirastatra phalgutīrthāśrayaṃ kṛtam | krauñcapādāt phalgutīrthaṃ yāvatsākṣādgayāśiraḥ || gayāśire nagādyāśca sākṣāttatphalgutīrthakam | mukhaṃ gayāsurasyaitat snātvā śrāddhamathākṣayam || ādyo gadādharo devo vyaktāvyaktātmanā sthitaḥ | viṣṇvādipadarūpeṇa pitṝṇāṃ muktihetave || tatra viṣṇupadaṃ divyaṃ darśanātpāpanāśanam | sparśanāt pūjanāccaiva pitṝṇāṃ mokṣadāyakam || śrāddhaṃ sapiṇḍakaṃ kṛtvā kulasāhasramātmanaḥ | viṣṇulokaṃ samuddhṛtya nayedviṣṇupadaṃ naraḥ || śrāddhaṃ kṛtvā rudrapade nayet kulaśataṃ naraḥ | mahātmanā śivapuraṃ tathā brahmapade naraḥ || brahmalokaṃ kulaśataṃ samuddhṛtya nayetpitṝn | dakṣiṇāgnipade śrāddhī vājapeyaphalaṃ labhet || gārhapatyapade śrāddhī rājasūyaphalaṃ labhet | śrāddhaṃ kṛtvā''havanīye vājimedhaphalaṃ labhet || śrāddhaṃ kṛtvā sabhyapade jyotiṣṭomaphalaṃ labhet | āvasathyapade śrāddhī somalokamavāpnuyāt || śrāddhaṃ kṛtvā cendrapade śakralokaṃ nayetpitṝn | śrāddhī sūryapade pañcapāpino'rkapuraṃ nayet || kārttikeyapade śrāddhī śivalokaṃ nayetpitṝn | śrāddhaṃ kṛtvastyapade brahmalokaṃ nayetpitṝn || kaśyapasya pade śrāddhī pitṝn brahmapadaṃ nayet | anyeṣāṃ ca pade śrāddhī pitṝn brahmapuraṃ nayet || sarveṣāṃ kaśyapaṃ śreṣṭhaṃ viṣṇo rudrasya vai padam | brahmaṇaśca padaṃ cāpi śreṣṭhaṃ tatra prakīrtitam || prārambhe ca samāptau ca teṣāmanyatamaṃ smṛtam | śreyaskaraṃ bhavettatra śrāddhakartuśca nārada || kaśyapasya pade divye bhāradvājo muniḥ purā | śrāddhaṃ kṛtvodyato dātuṃ pitrādibhyaśca piṇḍakam || śuklakṛṣṇau tato hastau padamudbhidya nirgatau | dṛṣṭvā hastadvayaṃ tatra pitṛsaṃśayamāgataḥ || tataḥ svamātaraṃ śāntāṃ bhāradvājastu pṛṣṭavān | kaśyapasya pade kasmin śukle kṛṣṇe'tha vā kare || piṇḍo deyo mayā mātarjānāsi pitaraṃ vada | śāntovāca | bhāradvāja mahāprājña piṇḍaṃ kṛṣṇāya dehi bhoḥ | bhāradvājastataḥ piṇḍaṃ dātuṃ kṛṣṇāya codyataḥ || śveto'dṛśyo'bravītputraṃ dehi satyaṃ mayaurasaḥ | kṛṣṇo'bravīt kṣetrajastvaṃ tato me dehi piṇḍakam || śuklo'bravīt svairiṇīyaṃ yato'tastvaṃ mayaurasaḥ | svairiṇītvādadau cādau kṣetriṇe bījine tataḥ || haṃsayuktena yānena brahmalokamubhau gatau | anenopākhyānena jārajasyāpi gayāyāṃ piṇḍadāne'dhikāro gamyate | bhīṣmo viṣṇupade śrāddha āhūya tu pitṝn svakān | śrāddhaṃ kṛtvā vidhānena piṇḍadānāya codyataḥ || piturvinirgatau hastau gayāśirasi śantanoḥ | bhīṣmaḥ piṇḍaṃ dadau bhūmau nādhikāraḥ kare yataḥ || śāntanuḥ prāha santuṣṭaḥ śāstrārthe niścalo bhavān | trikāladṛṣṭirbhavatu ante viṣṇuśca te gatiḥ || svecchayā maraṇaṃ cāstu ityuktvā muktimāgataḥ | rāmo rudrapade ramye piṇḍārpaṇakṛtodyamaḥ || pitā daśarathaḥ svargāt prasārya karamāgataḥ