Tirthaprakasha 4.p26

4.p26

na devaḥ parvatāgreṣu na devo viṣṇusadmani | devaścidānandamayo hṛdi bhāvena dṛśyate || yatra yatra yadā bhaktirdṛḍhā yasya mahātmanaḥ | tatra tasya mahādevaḥ prasādamupagacchati || devalaḥ, na nadīṣu nadīṃ brūyāt parvateṣu na parvatam | nānyatpraśaṃsettatrasthastīrtheṣvāyataneṣu ca || yatra sthāne tu yattīrthaṃ nadī puṇyatamā'tha vā | tāṃ dhyāyenmanasā vāpi anyatrecchāvicintanam || idaṃ snānaviṣayam | nadīmiti gaṅgātiriktaparam | snānakāle'nyatīrtheṣu japyate jāhnavī janaiḥ | vinā viṣṇupadīṃ nānyat samarthamaghaśodhanam || iti skāndāt| devalaḥ, araṇyaṃ devatāsthānaṃ tīrthānyāyatanani ca | tasmātteṣu vasan lokāt yāti lokaṃ divaukasām || tīrthayātrādiphalaṃ sarvaṃ śrīkṛṣṇe samarpaṇīyam | taduktambrāhme, yāni yāni ca tīrthāni dānavratatapāṃsi ca | tāni sarvāṇi siddhyanti viṣṇoḥ pādārpaṇena vai || nārpayanti harau loke puṇyāni vividhāni ca | viphalāni bhavantīha śrama eva phalaṃ bhavet || brahmavaivarte, rājovāca | kiṃ tatpuṇyaṃ mahābhāga yena śraddhātinirmalā | jāyate varddhate vāpi yayā sākṣādbhaveddhariḥ || kāmakalovāca | śrutismṛtipurāṇoktaṃ kriyate karma yacchubham | brahmārpaṇadhiyā sarvaṃ kartavyaṃ viṣṇuvallabham || uktaṃ ca bhāgavate, kāyena vācā manasendriyeṇa buddhyātmanā vā'nusṛtasvabhāvāt | karoti yadyatsakalaṃ parasmai nārāyaṇāyeti samarpayettat || kaurmye, brahmaṇyādhāya karmāṇi niḥsaṅgaḥ kāmavarjitaḥ | prasannenaiva kurvāṇo yāti tat paramaṃ padam || brahmaṇā dīyate deyaṃ brahmaṇe sampradīyate | brahmaiva dīyate ceti brahmārpaṇamidaṃ param || idaṃ ca sarvakarmasu kriyāyāḥ kārakāṇāṃ ca brahmabhāvanopalakṣakam