Tirthaprakasha 4.p293

4.p293

atha rāmahradamāhātmyam | vāmane, tato rāmahradān gacchettīrthasevī dvijottamaḥ | yatra rāmeṇa vipreṇa tarasā dīptatejasā || kṣatramutsādya vīreṇa hradāḥ pañca niṣevitāḥ | pūrayitvā naravyāghra rudhireṇa vimiśritāḥ || pitarastarpitāstena tathaiva ca pitāmahāḥ | tataste pitaraḥ prītā rāmamūcurdvijottamāḥ || rāma rāma mahābāho prītāḥ sma tava bhārgava | anayā pitṛbhaktyā ca vikrameṇa ca te vibho || varaṃ vṛṇīṣva bhadraṃ te kimicchāsi mahāyaśaḥ | evamuktastu pitṛbhī rāmaḥ prabhavatāṃ varaḥ || abravītprāñjalirvākyaṃ sa pitṝn gaganasthitān | bhavanto yadi me prītā yadyanugrāhyatā mayi || pitṛprasādādiccheyaṃ tapasāpyāyanaṃ punaḥ | yacca roṣābhibhūtena kṣatramutsādiṃtaṃ mayā || tatastu pāpānmucyeyaṃ yuṣmākaṃ tejasāsmyaham | hradāścaite tīrthabhūtā bhaveyurbhuvi viśrutāḥ || evamuktāḥ śubhaṃ vākyaṃ rāmasya pitarastadā | pratyucuḥ paramaprītā rāmaṃ harṣapuraskṛtāḥ || tapaste varddhatāṃ putra pitṛbhaktyā viśeṣataḥ | yacca roṣābhibhūtena kṣatramutsādyitaṃ tvayā || tataśca pāpānmuktastvaṃ pātitāste svakarmabhiḥ | hradāśca tava tīrthatvaṃ gamiṣyanti na saṃśayaḥ || hradeṣveteṣu ye snātvā svān pitṝṃstarpayanti ca | tebhyo dāsyanti pitaro yathābhilaṣitaṃ varam || īpsitān manasā kāmān svargavāsaṃ ca śāśvatam | evaṃ dattvā varān tṛptā rāmasya pitarastadā || āmantrya bhārgavaṃ prītāstatraivāntarhitāstadā | evaṃ rāmahradāḥ puṇyā bhārgavasya mahātmanaḥ || snātvā hradeṣu rāmeṣu brahmacārī śucivrataḥ | rāmamabhyarcya śraddhāvān vindedbahusuvarṇakam || iti