Tirthaprakasha 4.p309

4.p309

varāhapurāṇe, varāha uvāca | tasmin himavataḥ pṛṣṭhe. sthānaṃ guhyaṃ paraṃ mama | tatrāhamagninā bhūmi tapasā paritoṣitaḥ || agninā sadṛśo bhūtvā kṛtvā karma suduṣkaram | prāpnuvanti ca madbhaktā badaryyāṃ guhyamuttamam || sudurlabhaṃ ca tatkṣetraṃ himakūṭaśilātalam | yastu tatprāpnute kṣetraṃ kṛtakṛtyo bhavennaraḥ || brahmakuṇḍetivikhyātamasti tatra śilocaye | snānaṃ karoti yastatra trirātropoṣito naraḥ || agniṣṭomaśatātulyaṃ phalaṃ prāpnoti mānavaḥ | uṣitvā tatra kṛcchrāṇi yadi prāṇān parityajet || brahmalokamatikramya mama lokaṃ sa gacchati | agnikuṇḍetivikhyātaṃ tatra kuṇḍaṃ paraṃ mama || iti | tathā tatraiva, asti satyapadaṃ nāma tasmin kṣetre paraṃ mama | tisraḥ śṛṅgāt patante ca dhārā musalasannibhāḥ || yastatra kurute snānaṃ trirātropoṣito naraḥ | satyavādī bhaveddakṣo mama karmaparāyaṇaḥ || yastatra muñcati prāṇān yadi kṛtvā jalāśanam | satyalokamatikramya mama loke sa modate || indrakuṇḍetivikhyātaṃ badaryāṃ ca mamāśrame | tatrāhaṃ devi śakreṇa niṣphalaṃ paritoṣitaḥ || sthūle śilātale tatra mama dharme vyavasthitaḥ || snānaṃ karoti yastatra ekarātroṣito naraḥ | tatra caiva tu śṛṅgebhyaḥ sthūladhārā patedbhuvi | satyavādī śucirbhūtvā satyaloke mahīyate || athātra muñcate prāṇān kṛtvā tatra anāśakam | satyalokamatikramya mama loke mahīyate || asti pañcaśikhaṃ nāma badaryāmāśrame mama | yatra dhārāḥ patetpañca pañcaśṛṅgasamāśritāḥ || yastatra kurute snānaṃ pañcasrote paraṃ mama | modate nākapṛṣṭhe tu so'śvamedhaphalaṃ labhet || yadyatra muñcate prāṇān kṛtvā karma suduṣkaram | svargalokamatikramya mama lokaṃ prapadyate || catuḥsrotamiti khyātaṃ tasmin kṣetre paraṃ mama | dhārāḥ patanti catvāri caturo diśamāśritāḥ || yastatra kurute snānamekarātroṣito naraḥ | modate nākapṛṣṭhe tu mama bhaktaśca jāyate || tathā, asti corvaśīkuṇḍeti guhyaṃ kṣetra paraṃ mama | yatra caivorvaśī bhittvā dakṣiṇādūruniḥsṛtā || ityādyabhidhāya— tadetadurvaśīkuṇḍe ekarātroṣito naraḥ | yaḥ snāti sarvapāpebhyo mucyate nātra saṃśayaḥ || urvaśīlokamāsādya krīḍate kālamakṣayam || tathā, badarīmāśramaṃ puṇyaṃ yatra tatra sthitaḥ smaret | sa yāti vaiṣṇavaṃ sthānaṃ punarāvṛttivarjitaḥ || iti | atha lohārgalamāhātmyam | varāhapurāṇe, varāha uvāca | guhyamanyatpravakṣyāmi kāraṇaṃ satataṃ śubhe | ahaṃ sindhostaṭe bhadre gatvā vai triṃśayojanam || mlecchamadhye varārohe himavantaṃ samāśritaḥ | tatra lohārgalaṃ nāma nivāso me vidhīyate || guhyaṃ ca paramaṃ sthānaṃ samantātpañcayojanam | durdarśaṃ duḥsahaṃ caiva pāvakaiḥ pariveṣṭitam || tatra tiṣṭhāmyahaṃ bhadre udīcīṃ diśamāśritaḥ