Tirthaprakasha 4.p311

4.p311

tatra skānde ayodhyākhaṇḍe, yasyāstīre puṇyajalā kūjadbhṛṅgavihaṅgamā | sarayūnāma taṭinī mānasaprabhavottamā || dharmadravaparīṇāmā ghargharottamasaṅgatā | munīśvarāśritataṭā jāgartti jagaduttamā || dakṣiṇāccakravaṇāṅguṣṭhānniḥsṛtā jāhnavī hareḥ | vāmāṅguṣṭhānmunivarāḥ sarayūnnirgatā vibhoḥ || tasmādime puṇyatame nadyau devavinirmite | etayoḥ snānamātreṇa brahmahatyāṃ vyapohati || iti | skandapurāṇe, sarayūsalile snātvā śuddhastadgatamānasaḥ | devaṃ dharmahariṃ paśyet sarvapāpaiḥ pramucyate || annadānaṃ tathā homo japo brāhmaṇabhojanam | sarvamakṣayatāṃ yāti viṣṇulokanivāsavat || iti | athātra yātrākramaḥ | skandapurāṇe, śṛṇu vakṣyāmi tattvena yātrāmakramamāditaḥ | ayodhyāsthitatīrthānāṃ yathāvadanupūrvaśaḥ || manovākkāyaśuddhena nirdoṣeṇāntarātmanā | yaḥ karoti vidhiṃ samyak sa tīrthaphalamaśnute || prātarutthāya matimān saṅgame snānamācaret | viṣṇuṃ cakrahariṃ dṛṣṭvā snāyādvai brahmakuṇḍake || cakratīrthe naraḥ snātvā dṛṣṭvā viṣṇuhariṃ vibhum || gopratāre naraḥ snātvā paśyet suptahariṃ tataḥ | svargadvāre naraḥ snātvā paśyeccandrahariṃ vibhum || tato dharmahariṃ dṛṣṭvā sarvapāpaiḥ pramucyate | ekādaśyāmekādaśyāmeṣā yātrā śubhāvahā || prātarutthāya matimān svargadvārajalāplutaḥ | vidhāya nityakaṃ karma ayodhyāyāṃ vilokayet || surāpāṃ tu tato dṛṣṭvā paśyenmattagajaṃ tataḥ | vandīṃ ca śītalāṃ caiva kuṇḍavīṃ ca vilokayet || tadagre sarasi snātvā mahāvidyāṃ vilokayet | piṇḍārakaṃ tato dṛṣṭvā tato bhairavamarcayet || aṣṭamyāṃ ca caturdaśyāmeṣā yātrā phalapradā | aṅgārakacaturthyāṃ tu pūrvoktā devatā api || vighneśaṃ ca tataḥ paśyet sarvakāryārthasiddhaye | prātarutthāya matimān brahmakuṇḍajale plutaḥ || vibhuṃ viṣṇuhariṃ dṛṣṭvā manovākkāyaśuddhimān | mantreśvaraṃ tato dṛṣṭvā mahāvidyāṃ vilokayet || ayodhyāṃ ca tato dṛṣṭvā sarvakāmārthasiddhaye || svargadvāre naraḥ snātvā vijitendriya ādarāt | eṣā vaitaraṇīyātrā sarvapāpaharā śubhā || imāṃ yaḥ kurute yātrāṃ nityaṃ śubhaphalapradām | na tasya punarāvṛttiḥ kalpakoṭiśatairapi || iti | atra tāni tāni tīrthāni lokaprasiddhito'vaseyāni