Tirthaprakasha 4.p318

4.p318

yasmin snāto naro devi sūryyaloke mahīyate || 17 || tīrthānāmuttamaṃ tīrthaṃ brahmalokamitiśrutam | tatra snātvā ca niyato manujo niyatāśanaḥ || brahmaṇā samanujñāto viṣṇulokaṃ sa gacchati ||18 || somatīrthaṃ tu vasudhe pavitre yamunāmbhasi | tatrābhiṣekaṃ kurvīta svasvakarmapratiṣṭhitaḥ || yogataḥ somaloke tu evameva na saṃśayaḥ || 19 || sarasvatyāśca patanaṃ sarvapāpaharaṃ śubham | tatra snātvā naro devi avarṇo'pi yatirbhavet ||20 || cakratīrthaṃ ca vikhyātaṃ māthure mama maṇḍale | yastatra kurute snānaṃ trirātropoṣito naraḥ || snānamātreṇa manujo mucyate brahmahatyayā || 21 || daśāśvamedhamṛṣibhiḥ pūjitaṃ sarvadā purā | tatra ye snānti niratāḥ teṣāṃ svargo na durlabhaḥ || 22 || tīrthaṃ tu vighnarājasya puṇyaṃ pāpaharaṃ śubham | tatra snātaṃ tu manujaṃ vighnarājo na pīḍayet || 23 || tataḥ paraṃ koṭītīrthaṃ trailokye paramaṃ śubham || tatra vai snānamātreṇa gavāṃ koṭiphalaṃ labhet || 24