Tirthaprakasha 4.p328

4.p328

yatra dattāni cānnāni gautamena bahūnyapi | gautameśvaraliṅgaṃ ca tatra sthāpitavānmuniḥ || darśanāttasya devasya sarvatīrthaphalaṃ labhet | galiteśvaratīrthaṃ ca mahāpātakanāśanam || nāradena samānītā yatra gaṅgā mahānadī | varuṇeśaṃ mahāliṅgaṃ nāradeśvarameva ca || someśvaraṃ tṛtīyaṃ tu madhye matiphalapradam | tato ratneśvaraṃ tīrthaṃ sarvasiddhikaraṃ nṛṇām || ulkeśvaraṃ mahātīrthaṃ yatra colkāsvarūpadhṛk | bālakrīḍanakaḥ pūrvaṃ patan rudramayo'bhavat || bhīmeśvaraṃ tatastīrthaṃ sarvakāmaphalapradam | yasya saṃsevanādrājā bhīmaḥ siddhimavāptavān || śaṅkhatīrthaṃ mahātīrthaṃ pāparāśibhayāpaham | śāmbārkastīrtharājo'tra śāmbaḥ śuddho'bhavatpurā || mokṣeśvaraṃ mahātīrthamatra muktipradāyakam | bhairavī ca tato devī prasiddhā bhuvaneśvarī || ṛṇamocanatīrthaṃ tu ṛṇatrayanivāraṇam | kāpālikaṃ tatastīrthaṃ candrakṣetraṃ mahāphalam || pārvatītīrthamaparamabhīṣṭaphaladāyakam | candraprabhāsakaṃ tīrthaṃ sarvatīrtheṣu sattamam || punaḥ koṭīśvaraṃ tīrthaṃ mithyājñānabhayāpaham | bhavamocanatīrthaṃ tu saṃsārārṇavatāraṇam || ambarīṣasya nṛpatestatastīrthamanuttamam | aśvatīrthaṃ tatastatra bhānutīrthamudāhṛtam || kāntāreśvaraliṅgaṃ tu sarvapātakanāśanam | bharatasthāpitaṃ liṅgaṃ bharateśvaramucyate || gupteśvaraṃ mahāṃtīrthaṃ mahāpātakanāśanam | someśvaraṃ punastīrthaṃ sarvakāmaphalapradam || rāmeṇa sthāpitaṃ liṅgaṃ rāmeśvaramudāhṛtam | siddheśvaraṃ punāṃliṅgaṃ sarvasiddhipradāyakam || steneśvaraṃ mahāliṅgaṃ stenapāpāpahārakam | etāni siddhaliṅgāni tapatyāstīrayordvayoḥ || uktānyatrātisaṅkṣepāditihāsakathāṃ vinā | iti | atha tāpīsamudrasaṅgamamāhātmyam | skandapurāṇe śaṅkaravākyam | tato'tisundaro vatsa tapatyāḥ priyasaṅgamaḥ | mahāpāpaharaḥ puṃsāṃ puṇyaḥ sannidhiruttamaḥ || yo'tra gaṇḍūṣamātraṃ ca jalaṃ pibati mānavaḥ | dhruvaṃ tatpuṇyamāpnoti ṣaṇmāsaṃ dhūmapānataḥ || atra ca snānādyāṣāḍhe praśastataram | tatraiva, āṣāḍhamāse suta śuklapakṣe jātārkajā pañcakaparvaṇīti | etadviduḥ puṇyataraṃ hi loke āṣāḍhamāsasya tu pañcakaṃ hi || pañcakayogaśca— amā vai somavāreṇa ravivāreṇa saptamī | caturthī bhaumavāreṇa pitṝṇāṃ dattamakṣayam || tatpañcaparvakaṃ nāma sūryyaparvaśatādhikam | iti tatraivoktaḥ | tathā, āṣāḍhe yaddutaṃ taptaṃ sūryyadehāsamīpataḥ | kṛtaṃ caivānnadānaṃ ca vatsa sarvaṃ tadakṣayam || iti | atha payoṣṇīmāhātmyam | bhārate pulastyayātrāyām, tato vāpīṃ samāsādya payoṣṇīṃ saritāṃvarām | pitṛdevārcanarato gosahasraphalaṃ labhet || daṇḍakāraṇyamāsādya mahārāja upaspṛśet