Tirthaprakasha 4.p333

4.p333

taddevāśca na jānanti kathaṃ jānāmyahaṃ prabho | aparaṃ tava yadrūpaṃ pītavastraṃ caturbhujam || śaṅkhacakragadāpāṇimukuṭāṅgadadhāriṇam | śrīvatsoroskasaṃyuktaṃ vanamālāvibhūṣitam || tadarcayanti vibudhā ye cānye tava saṃśrayāḥ | deva sarvasuraśreṣṭha bhaktānāmabhayaprada || trāhi māṃ padmapatrākṣa magnaṃ viṣayasāgare | nānyaṃ paśyāmi lokeśa yasyāhaṃ śaraṇaṃ vraje || tvāmṛte kamalākānta prasīda madhusūdana | jarāvyādhiśatairyukto nānāduḥkhairnipīḍitaḥ || harṣaśokānvito mūḍhaḥ karmapāśaiḥ suyantritaḥ | patito'haṃ mahāraudre ghore saṃsārasāgare || viṣayodakaduṣpāre rāgadveṣajhaṣākule | indriyāvarttagambhīre tṛṣṇāśokormisaṅkule || nirāśrarye nirālambe niḥsāre'santacañcale | māyayā mohitastatra bhramāmi suciraṃ prabho || nānājātisahasreṣu jāyamānaḥ punaḥ punaḥ | mayā janmānyanekāni sahasrāṇi śatāni ca || vividhānyanubhūtāni saṃsāre'smin janārdana | vedāḥ sāṅgā mayā'dhītāḥ śāstrāṇi vividhāni ca || itihāsapurāṇāni tathā śilpān‍yanekaśaḥ | asantoṣāśca santoṣāḥ sañcayāpacayā vyayāḥ || mayā prāptā jagannātha jayavṛddhyudayetarāḥ | bhāryāmitrasvabandhūnāṃ viyogāḥ saṅgamāstathā || pitaro vividhā dṛṣṭā mātaraśca tathā mayā | duḥkhāni cānubhūtāni mayā saukhyānyanekaṇaḥ || prāptāśca bāndhavāḥ putrā bhrātaro jñātayastathā | mayoṣitaṃ tathā strīṇāṃ koṣṭhe viṇmūtrapicchile || garbhavāse mahāduḥkhamanubhūtaṃ tathā prabho | duḥkhāni yānyanekāni bālyayauvanagocare || vārddhake ca hṛṣīkeśa tāni prāptāni vai mayā | maraṇe yāni duḥkhāni yamamārge yamālaye || mayā tānyanubhūtāni narake yātanākule | kṛmikīṭadrumāṇāṃ ca hastyaśvamṛgapakṣiṇām || mahiṣāṇāṃ gavāṃ caiva tathānyeṣāṃ vanaukasām | dvijātīnāṃ ca sarveṣāṃ śūdrāṇāṃ caiva yoniṣu || dhanināṃ kṣatriyāṇāṃ ca daridrāṇāṃ tapasvinām | nṛpāṇāṃ nṛpabhṛtyānāṃ tathānyeṣāṃ ca dehinām || gṛheṣu teṣāmutpanno deva cāhaṃ punaḥ punaḥ | gato'smi dāsatāṃ nātha śrīmatāṃ bahuśo nṛṇām || daridratvaṃ ceśvaratvaṃ svāmitvaṃ ca tathā gataḥ | hatā mayā hataścānyairghātito ghātitastathā || dattaṃ mamānyairanyebhyo mayā dattamanekaṇaḥ | pitṛmātṛsuhṛdvargakalatrāṇāṃ kṛtena ca || dhanināṃ śrotriyāṇāṃ ca daridrāṇāṃ tapasvinām | mayā sṛṣṭvā'sakṛdnyamaśrudhautānano gataḥ || devatiyryaṅmanuṣyeṣu careṣu sthāvareṣu ca | na vidyate ca tatsthānaṃ yatrāhaṃ na gataḥ prabho