Tirthaprakasha 4.p68

4.p68

ntho'pi | ata eva kāśīkṛtaduṣkṛtasya kasyacittatraiva mṛtasyāpi tattadyoniṣu daśa janmāni padmapurāṇe śrūyante kāñcanamālinīdattamāghasnānapuṇyena niṣkṛtiśca | tathāhi— avimukte kṛtaṃ pāpaṃ vajralepībhavet dṛḍham | vajralepena pāpena tena me janma rākṣasam || raudraṃ krūrataraṃ pāpaṃ sambhūtaṃ himaparvate | dvijātau gṛdhrayonau prāk trivryāghro dviḥsarīsṛpaḥ || ekavāramulūkaśca viḍvarāhastataḥ param | idaṃ hi daśamaṃ janma rākṣasaṃ hyatra bhāmini || atītāni sahasrāṇi varṣāṇāṃ pañcasaptatiḥ || dadau sā māghajaṃ puṇyaṃ tasmai vṛddhāya rakṣase | śṛṇu rājanvicitraṃ tvaṃ prabhāvaṃ māghadharmajam || tadaiva prāptapuṇyaṃ māṃ vimuktā rākṣasī tanuḥ | sambhūto devatārūpastejobhāsvaravigrahaḥ || vajralepatvaṃ bhoganāśyatā | yadi kāśīmaraṇottaraṃ yonijaśarīrāṇi notpadyante tadedamupākhyānamupekṣaṇīyaṃ syāt | tasmādanena janmaneti kāśīkṛtaduṣkṛtabhogānukūlajanmabhāvaparam atha vā niṣpāpaparamiti na kiñcidapacīyate iti smarttavyam | evaṃ ca bhairavecchānadhīnayoniśarīraṃ na bhavatītyetatparamanyathoktopākhyānavirodhāpatteḥ | idamapi kāśīmṛtasya rākṣasajanmādikamatyutkaṭasya kāśīkṛtapāpmanaḥ phalamiti padmapurāṇādevāvasīyate | tathāhi, śṛṇu suśroṇyahaṃ kāśyāṃ bahvṛco vedapāragaḥ | ityādyuktvāvārāṇasyāṃ kṛto ghoro mayā duṣṭaḥ pratigrahaḥ | bahudhā bahuvāraṃ ca niṣiddhaḥ kutsito bahuḥ || caṇḍālasyāpi na tyakto mayā bhadre pratigrahaḥ | anyacca pātakaṃ bhadre mamābhūnmūḍhacetasaḥ || tannāsti duṣkṛtaṃ bhadre mayā tatra na yatkṛtam | anyacca śrūyatāṃ doṣaḥ kṣetrasya varavarṇini || avimukte'ṇumātraṃ hi tatpāpaṃ merutāṃ vrajet | na dharmastu mayā tatra sañcitastatra janmani || tato bahutithe kāle mṛtastatraiva śobhane | avimuktaprabhāveṇa na cāhaṃ narakaṃ gataḥ