Tirthendushekhara 3.p38

3.p38

yena tenaiva nirvāṇamāpnoti haraśāsanāt | yogayukto mahādevaḥ pārvatyā rahitaḥ sadā || devagandharvayakṣāṇāṃ manuṣyāṇāṃ ca nityaśaḥ | jñeyo haraḥ prakāśaśca kṣetraṃ tacca prakāśitam || na tatra kāmado devo nācirotsamprasīdati | ārādhitaḥ śivastatra nirvāṇāya prasīdati || gauryā vivarjitā sā tu purī tatra na gacchati | yogasthānaṃ mahākṣetraṃ kadācidapi śāṅkarī || ityuktam | tatrāpi kalāviti śeṣaḥ harivaṃśaikavākyatvāt | yattu ādityapurāṇe (1)gaccha vārāṇasīṃ vyāsa yatra viśveśvaraḥ śivaḥ || na tatra yugadharmo'sti naiva lagnā vasundharā | viśveśvarasya yalliṅgaṃ jyotirliṅgaṃ taducyate || yasmindṛṣṭe kṣaṇājjantuḥ saṃsāraṃ na punarviśet | iti | tadapi śivanirmitasvapadābhiprāyam | yatra pade'ntarvarttini pure yugadharmaḥ puṇyapāpakṛto mokṣapratibandho nāstītyarthaḥ | yattvekāmravanamāhātmye—'kalāvantarhitā kāśī muktiratraiva labhyate' iti tatrāpi kāśīpadaṃ tadantarvarttiśivanirmitapadaparam (2) | yadvā tatkṣetrastutiparam | mokṣasvarūpanirūpaṇammokṣaścopādhibhedādanekajīvabhāvaṃ prāptasya cetanasyopādhivigamena svasvarūpe'vasthānam | cetanaścaika eva