Tirthendushekhara 3.p44

3.p44

ābhyaḥ parastādbhagavānparamātmā sanātanaḥ | gīyate sarvaśaktyātmā śūlapāṇirmaheśvaraḥ || enameke vadantyagniṃ nārāyaṇamathāpare | ityukteśca | tīrtheṣu keṣu draṣṭavyā totavyā kaiśca nāmabhiḥ || iti satīṃ prati dakṣapraśne— sarvadā sarvabhūteṣu draṣṭavyā sarvato bhuvi | sarvalokeṣu yatkiñcidasti tanna mayā vinā || vārāṇasyāṃ viśālākṣī prayāge lalitā tathā | ityupakramya— rukmiṇī dvāravatyāṃ tu rādhā vṛndāvane vane | itimātsyokteśca | tādṛśajñānaṃ ceśvarārpaṇabuddhyā kṛtaiḥ karmabhiścicaśuddhyā'nyatrāpi bhavati | īśvare karmasamarpaṇaṃ cakāmato'kāmato vāpi yatkaromi śubhāśubham | tatsarvaṃ tvayi saṃnyastaṃ tvatprayuktaḥ karomyaham || iticintanam | nāhaṃ karttā sarvametad brahmaiva kurute tathā | etadbrahmārpaṇaṃ proktamṛṣibhistattvadarśibhiḥ || itikaurmāt | bhagavadgītāyāmapi— yajñārthātkarmaṇo'nyatra loko'yaṃ karmabandhanaḥ | tadarthaṃ karma kaunteya muktasaṅgaḥ samācara || tasmādasaktaḥ satataṃ kāryaṃ karma samācāra | asakto hyācarankarma paramāpnoti pūruṣaḥ