Tristhalisetu (Narayana) 13.p35

13.p35

tasmātsarvaprayatnena brāhmaṇastu viśeṣataḥ | śrāddhyādvidhivatpiṇḍāngayāṃ gatvā samāhitaḥ || ityāvaśyakatāktā | akaraṇe nindā'pi tatraivagayābhigamanaṃ kartuṃ yaḥ śakto nābhigacchati || śocanti pitarastaṃ vai vṛthā tasya pariśramaḥ || iti | tasmādgayākṛtyaṃ putrasya nityam | ata eva yathāśaktyanuṣṭheyaṃ nitye yathā śaknuyādityupabandhāt | tatrāpi sakṛtkaraṇameva nityaṃ tāvataiva śāstrārthasiddherāvṛttibodhakavīpsādyabhāvācca | cāturmāsyavatpunaḥ karaṇe tu phalādhikyaṃ tadvadeva na tvāvaśyakatā | 'sakṛdgayābhigamanaṃ sakṛtpiṇḍaprapātanam' ityādivacaso'pyādyasyā''vaśyakatvārthaṃ na tu dvitīyādernivāraṇārthaṃ parisaṃkhyāpatteḥ | tatrāpi prathamayātrāyāṃ yeṣāṃ pretatvanivṛttyarthaṃ pretaśilāyāṃ piṇḍadānaṃ bhāṇḍasphoṭanaṃ ca kṛtaṃ teṣāṃ dvitīyayātrāyāṃ na kāryam | tadanantaramṛtānāṃ tu kāryameva | itaracca sarvaṃ sarveṣāṃ kāryamiti śiṣṭācāraḥ | tasmādamukte pitrādau narakoddhārasvargabrahmalokāvāptyādi yathāyathaṃ phalaṃ mukte tu pitrādau pratyavāyābhāvaḥ | satyāṃ kāmanāyāṃ putrādi ca vakṣyamāṇaṃ kartṛgataṃ phalaṃ bhavatīti siddham | iti nārāyaṇabhaṭṭaviracite trisyalīsetau gayāphalādivicāraḥ | atha sāmānyato gayāpraśaṃsā | bṛhaspatiḥkāṅkṣanti pitaraḥ putrānnarakādbhayabhīravaḥ | gayāṃ yāsyati yaḥ kaścitso'smānsaṃtārayiṣyati || gaṅgāyāṃ dharmapṛṣṭhe ca sadasi brahmaṇastathā | gayāśīrṣe'kṣayavaṭe pitṝṇāṃ dattamakṣayam || brahmāraṇyaṃ dhenupṛṣṭhaṃ dhenukāraṇyameva ca | dṛṣṭvaitāni pitṝṃścā''rcyā vaṃśyānviṃśatimuddharet || vāmanapurāṇe-pretarājaḥ kaṃcidvaṇijaṃ pratyāhagayāyāṃ tīrthajuṣṭāyāṃ snātvā śaucasamanvitaḥ | mama nāma samuddiśya piṇḍanirvapaṇaṃ kuru || tatra piṇḍapradānena pretabhāvādahaṃ sakhe | muktastu sarvadātṝṇāṃ yāsyāmi śubhalokatām || ityevamuktvā vaṇijaṃ pretarājo'nugaiḥ saha | svanāmāni yathānyāyaṃ samyagākhyātavāngrahaḥ || upārjayitvā prayayau gayāśiramanuttamam | piṇḍanirvapaṇaṃ tatra pretānāmanupūrvaśaḥ || cakāra ca svadāyādānpitṝṃścakre tvanantaram | ātmanaśca mahābuddhirmahābo(mmo)dhau tilairvinā || piṇḍanirvapaṇaṃ cakre tathā'nyānapi gotrajān | evaṃ datteṣu piṇḍeṣu vaṇijo pretabhāvataḥ || vimuktāste dvijāḥ prāpya brahmalokaṃ ca te gatāḥ