Tristhalisetu (Narayana) 13.p44

13.p44

asaṃskṛtā mṛtā ye ca paśucaurahatāśca ye | sarpadaṣṭā gayāśrāddhānmuktāḥ svargaṃ vrajanti te || etadapi śrāddhoddeśyaphalameva | gayāyāṃ piṇḍadānena yatphalaṃ labhate naraḥ | na tacchakyaṃ mayā vaktuṃ kalpakoṭiśatairapi || etattu śrāddhakartṛgataṃ phalamiti kaścit | gayāpiṇḍadānastutiriyamityanye | vāyupurāṇeśamīpatrapramāṇena piṇḍaṃ dadyādgayāśira | uddharetsapta gotrāṇi kulamekottaraṃ śatam || sapta gotrāṇi tupitā mātā ca māryā ca bhaginī duhitā tathā | pitṛmātṛṣvasā caiṣāṃ sapta gotrāṇi vai viduḥ || iti | atra mātṛgotraṃ mātāmahagotram | māryāgotraṃ śvaśuragotraṃ bhaginīduhitṛpitṛṣvasṛmātṛṣvasṝṇāṃ gotrāṇi yatkule tā dattāstadīyāni | eteṣāmeva gotrāṇāmekottaraṃ śataṃ kulam | lakṣaṇayā tatsthāḥ puruṣāḥ | te yathā tattvāni viṃśati nṛpā dvādaśaikādaśā daśa | aṣṭāviti ca gotrāṇāṃ kulamekottaraṃ śatam || iti | pitṛgotre tattvāni | ete ca dvādaśe pare tāvanta evāvare | mātṛgotre daśa pare daśaivāvara ityevaṃ viṃśatiḥ | bhāryāgotre'ṣṭau pare'ṣṭāvavara iti evaṃ nṛpāḥ ṣoḍaśa bhārate ṣoḍaśa rājakīya tathokteḥ | bhaginīgotre ṣaṭpare ṣaḍavara evaṃ dvādaśa | duhitṛkule pañca pare pañca dauhitrādayo'vare jāmātā cetyekādaśa | pitṛṣvasṛkule tacchvaśurādyāḥ pare pañca tadbhartrādyā avare pañcetyevaṃ daśa mātṛṣvasṛkule tacchvaśurādyāścatvāraḥ pare tadbhartrādyāścatvāro'vara ityevamaṣṭau | sarve samuditā ekottaraṃ śataṃ bhavati | vāyavīyegayāsurasya śirasi puṇye pretādivarjite | sthitā brahmādayo devā gataḥ so'pi pavitratām || kīkaṭeṣu gayā puṇyetyādi pūrvavat | anyatrāpijīvatorvākyakaraṇātpratyabdaṃ bhūribhojanāt | gayāyāṃ piṇḍadānācca tribhiḥ putrasya putratā || kaurmegayāṃ prāpyānuṣaṅgeṇa yadi śrāddhaṃ samācaret | tāritāḥ pitarastena sa yāti paramāṃ gatim || bhaviṣyottare śravaṇadvādaśīvrataprasaṅge kaṃcidvaṇijaṃ prati pretavacanamhimavantamathā''sādya tatra tvaṃ lapsyase nidhim | gayāśīrṣaṃ tato gatvā sarveṣāṃ śrāddhamācara || tathetyuktvā tato gatvā nidhiṃ prāpya gayāṃ yayau | pretānāṃ kramaśastatra cakre śrāddhaṃ dine dine || yasya śrāddhaṃ karoti sma yasminyasmindine vaṇik | sa sa tasya tadā svapne darśayatyātmanastanum || bravīti ca mahābhāga prasādena tavānagha | pretabhāvo mayā tyaktaḥ prāpto'smi paramāṃ gatim || iti | vyāsaḥgayāṃ gatvā tu yaḥ kaścitpitṝnsaṃtarpayennaraḥ | daśāvarāparānvaṃśyānātmānaṃ ca punāti saḥ || sthānaṃ dehaparityāgo gayāyāṃ tu vidhīyate | śrāddhaṃ piṇḍapradānaṃ ca gayāyāṃ tu viśiṣyate || vāyupurāṇeānantyāya bhaveddattaṃ khaḍgamāṃsaṃ pitṛkṣaye | kṛṣṇacchāgastathā lohamānantyāya prakalpate || pitṛkṣayo gayā | tathāgayāyāṃ dharmapṛṣṭhe ca sarasi brahmaṇastathā | gayāgṛdhravaṭe caiva śrāddhaṃ dattaṃ mahāphalam || bharatasyā''śrame puṇye nityaṃ puṇyatamairvṛte | mataṅgasya padaṃ tatra dṛśyate sarvamānuṣaiḥ || sthāpitaṃ dharmasarvasvaṃ lokasyāsya nidarśanāt | yaccampakavanaṃ puṇyaṃ puṇyakṛdbhirniṣevitam || yasminpāṇḍuviśaleti tīrthaṃ sañyotidarśanam | tṛtīyāyāṃ tathā pāde niḥkṣīrāyāśca maṇḍale || ma[hā]hrade ca kauśikāyāṃ dattaṃ śrāddhaṃ mahāphalam | muṇḍapṛṣṭhe padaṃ nyasya brahmarṣigaṇasevitam || tatra snātvā divaṃ yānti svaśarīreṇa mānavāḥ | dattaṃ cāpi sadāśrāddhamakṣayyaṃ samudāhṛtam || snātvā ṛṇatrayaṃ tatra niṣkrīṇāti narottamaḥ | mānase sarasi snātvā śrāddhaṃ nirvartayettataḥ || uttaraṃ mānasaṃ gatvā siddhiṃ prāpnotyanuttamām | tasminnirvartayañchrāddhaṃ yathāśakti yathābalam || kāmānsa labhate divyānmokṣopāyāṃśca kṛtsnaśaḥ