Vratakanda 7.p94

7.p94

evaṃ tūpoṣya viprendra dvādaśīṃ śravaṇena tu | pūrvoktena vidhānena bhojanaṃ pṛṣadājyakam || pūrvaṃ dattvā brāhmaṇāya paścādbhuñjīta cātmanā | na duḥkhāya yatheṣṭaṃ tu na ca rātrau vidhiḥ smṛtaḥ || samāpte tu vrate brahman yatpuṇyaṃ tannibodha me | caturyugānāṃ viprendra ekasaptatipāvanaḥ || tāvadviṣṇupure vipra krīḍate kāmato'kṣayam | iha cāgatya kālānte rājarājo bhaviṣyati || tretāyuge dharmayuge jāyate ca punaḥ punaḥ | daśa janmani viprendra viṣaye pattane śubhe || kule mahati jātaḥ syāddhemapadmāṅkakaragaḥ| hastyaśvarathayānānāṃ dātā bhoktā vimatsarī || bhoktā puravarāṇāṃ ca yajan yajñaṃ ca koṭiśaḥ | rūpasaubhāgyasaṃpanno dīrghāyurnīrurajo bhavet || putrapautraiḥ parivṛto jīvecca śaradāṃ śatam