Bhagavatapurana 39.44

39.44

subodhinī-etat sarvaṃ yācanānyathānupapattyā kalpyate tatrānyathopapattiṃ kalpayitvā pariharantyanyatheti, bhagavatastu nāpekṣitaṃ kiñcinna nāpi duḥkhānivṛttistatsādhanaṃ vā nāpi sukhaṃ tatsādhanaṃ vā pūrṇakāmatvāt, tasya hi kāmāḥ pūrṇā utpannā viṣayairna pūryante laukikavat kintu pūrṇā evāvirbhavanti, ato niścayavidyāste, tathā sati yānnakāmanā bhagavatyāvirbhūtā sānnasāhiṃtaiveti siddhe'rthe yācanamanupapannaṃ paramuddeśyāntaraṃ cet tadā siddhamapi dūrīkṛtya sādhanāntaraṃ karoti, asādhanaṃ vā bodhayati, tasmādasmatprabodha eva yācanaphalaṃ, kiñca kaivalyādyāśiṣāṃ patirbhagavān, kaivalyaṃ kevalatā saṅghātānivṛttyā kevalasthitiḥ pratyāpattirūpaṃ tat prathamaṃ phalaṃ tataḥ pūrvaṃ duḥkhamevātaḥ kaivalye prāpte tataḥ svarūpeṇa bhajanaṃ tata ānandāvirbhāvastato bhagavati praveśo bhaktirvā tadanantaraṃ dharmā bhagavadīyā bhagavadājñānānarūpā arthāśca tadīyāḥ kāmāśca, evaṃ kaivalyādyā yā āśiṣastāsāṃ patirayaṃ dātā niyāmakaḥ, tathā sati gopānāṃ kṣudeva na syāt nāpi taiḥ prārthyeta, lokānāmapi kaivalyādidātā, na hi tān saṅghāte sthāpayati yena kṣud bhavettaḥ kṣudhamapyutpādya vidyamāne'pyanne tadadattvā bodhanārthamevātra preṣitavān, kiñceśitavyairasmābhiḥ kiṃ syāt ? vayamīśitavyā dāsā na hi dāsānnaṃ bhujyate, tebhyo dīyata eva, na hi mahārājasya dinamātravyavasthāpi kaścid dāsaḥ sampādayituṃ śaktaḥ, nāpyasmābhistasyāgre kṛtyamata īśasyaitadanukaraṇamātraṃ na tu yācanaṃ, anukaraṇaṃ tu rasotpattyarthamitiniścayaḥ, na hi naṭasya yogibhāvapradarśane kiñcit kṛtyamasti vinā rasotpādanaṃ tathā bhagavatyāścānukaraṇamapi bodhanārthameva |