Bhavishyapurana 13.200.2

13.200.2

.. śrīkṛṣṇa uvāca .. ..
ataḥ paraṃ pravakṣyāmi kārpāsācalamuttamam ..
paramaṃ sarvadānānāṃ priyaṃ sarvadivaukasām .. 1 ..
deśakālau samāsādya dhanaṃ śraddhāṃ ca yatnataḥ ..
deyametanmahādānaṃ kuloddharaṇahetave .. 2 ..
pūrvoktena vidhānena kṛtvā sarvamaśeṣataḥ ..
parvataṃ kalpayettatra kārpāsena vidhānataḥ .. 3 ..
viṃśadbhārastu kartavya uttamaḥ parvato budhaiḥ ..
daśabhirmadhyamaḥ prokto jaghanyaḥ paṃcabhirmataḥ .. 4 ..
bhāreṇālpadhano dadyādvittaśāṭhyavivarjitaḥ ..
dhānyaparvatavatsarvamāsādya nṛpapuṃgava .. 5 ..
tadvajjāgaraṇaṃ kuryāttadvaccaivādhivāsanam ..
prabhātāyāṃ tu śarvaryāmimaṃ mantramudīrayet .. 6 ..
tvamevāvaraṇaṃ yasmāllokānāmiha sarvadā ..
kārpāsācala nastasmādaghaughadhvaṃsano bhava .. 7 ..
iti kārpāsaśailendraṃ yo dadyātparvasaṃnidhau ..
rudraloke vasetkalpaṃ tato rājā bhavediha .. 8 ..
rūpavānsubhago vāgmī śrīmānatulavikramaḥ ..
pañcajanmāni nārī vā jāyate nātra saṃśayaḥ .. 9 ..
kārpāsaparvatamayo jagadekabaṃdhuryasmānnatena rahito varavastrayogaḥ ..
tasmādaghaudhaśamanāya sukhāya nityaṃ deyo nareṇa naranāthavimatsareṇa .. 4.200.10 ..
iti śrībhaviṣye mahāpurāṇa uttaraparvaṇi śrīkṛṣṇayudhiṣṭhirasaṃvāde kārpāsācaladānavidhivarṇanaṃ nāma dviśatatamo'dhyāyaḥ .. 200 ..