Linga 50: atha catuścatvāriṃśo'dhyāyaḥ
Liṅga 50
- Language
- Sanskrit
Contents
- 50.46-2 — 1 part
atha catuścatvāriṃśo'dhyāyaḥ
50.1
śailādiruvāca
smaraṇādeva rudrasya samprāptāśca gaṇeśvarāḥ
sarve sahasrahastāśca sahasrāyudhapāṇayaḥ
50.2
trinetrāśca mahātmānassiddhagaiairapi vanditāḥ
koṭikālāgnisaṅkāśā jaṭāmukuṭadhāriṇaḥ
50.3
daṃṣṭrākarālavadanā nityā buddhāśca nirmalāḥ
koṭikoṭigaṇaistutyairātmanā ca gaṇeśvarāḥ
asaṅkhyātā mahātmānastatrājagmurmudā yutāḥ
50.4
gāyantaśca dravantaśca nṛtyantaśca mahābalāḥ
mukhāḍambaravādyāni vādayantastathaiva ca
50.5
rathairnāgairhayaiścaiva siṃhamarkaṭavāhanāḥ
vimāneṣu tathārūr̤hā hemacitreṣu vai gaṇāḥ
50.6
bherīmṛdaṅgakāṃsyaiśca paṇavānakagomukhaiḥ
vāditairvividhaiścānyaiḥ paṭahairekapuṣkaraiḥ
50.7
bherīmurajasannādairāḍambarakaḍiṇḍimaiḥ
mardalairveṇuvīṇābhiḥ vividhaistālanisvanaiḥ
50.8
darduraistalaghātaiśca kacchapaiḥ paṇavairapi
vādyamānairmahāyogrā ājagmurdaivasaṃsadam
50.6-2
te gaṇeśā mahāsattvāḥ sarvadeveśvareśvarāḥ
praṇamya devaṃ devīñca idaṃ vacanamabruvan
50.10
bhagavan ! devadeveśa ! triyambaka ! vṛṣadhvaja !
kimarthañca smṛtā deva ! ājñāpaya mahādyute !
50.11
kiṃ sāgarānkṣobhayāmo yamaṃ vā saha kiṅkaraiḥ
hanmo mṛtyusutāṃ mṛtyuṃ paśuvaddhanma padmajam
50.12
badhnendraṃ saha devaiśca saha viṣṇuśca vāyunā
ānayāmaḥ susaṃkruddhā daityān vā saha dānavaiḥ
50.13
kasyādya vyasanaṃ ghoraṃ kariṣyāmastavājñayā
kasya vādyotsavo deva ! sarvakāmasamṛddhaye
50.14
tāṃstathāvādinaḥ sarvān gaṇeśān sarvasammatān
uvāca devaḥ sampūjya koṭikoṭiśatān prabhuḥ
50.15
śṛṇudhvaṃ yatkṛte yūyamihāhūtā jagaddhitāḥ
śrutvā ca prayatātmānaḥ kurudhvaṃ tadaśaṅkitāḥ
50.16
nandīśvaro'yaṃ putro naḥ sarveṣāmaukhareśvaraḥ
vipro'yaṃ nāyakaścaiva senānīvaiḥ samṛddhimān
50.17
tamimaṃ mama sandeśād yūyaṃ sarve'pi sammatāḥ
senānyamabhiṣiñcadhvaṃ mahāyogapatiṃ patim
50.18
evamuktā bhagavatā gaṇapāḥ sarva eva te
evamastviti sambhāṣya sambhārānāharaṃstataḥ
50.16-2
tasya sarvāśrayaṃ divyaṃ jāmbū nadamayaṃ śubham
āsanaṃ merusaṅkāśaṃ manoharamupāharan
50.20
naikastambhamayaṃñcāpi cāmīkaravaraprabham
muktādāmāvalambañca maṇiratnāvabhāsitam
50.21
stambhaiśca vaidūryyamayaiḥ kiṅkiṇījālasaṃvṛtam
cāruratnakasaṃyuktaṃ maṇḍapaṃ viśvatomukham
50.22
kṛtvā vinyasya tanmadhye tadāsanavaraṃ śubham
tasyāgrataḥ pādapīṭhaṃ nīlavajrāvabhāsitam
50.23
cakruḥ pādapratiṣṭhārthaṃ kalaśau cāsya pārśvayoḥ
sampūrṇau paramābhobhiraravindāyatānanau
50.24
kalaśānāṃ sahasrantu sauvarṇaṃ rājataṃ tathā
tāmrajaṃ mṛṇmayañcaiva sarvatīrthāmbūpūritam
50.25
vāsoyugaṃ tathā divyaṃ gandhaṃ divyaṃ tathaiva ca
keyūre kuṇḍale caiva mukuṭaṃ hārameva ca
50.26
chatraṃ śataśalākañca bālavyajanameva ca
dattaṃ mahātmanā tena brahmaṇā parameṣṭhinā
50.27
śaṅkhahārāṅgagaureṇa pṛṣṭhenāpi virājitam
vyajanañcandraśubhrañca hemadaṇḍaṃ sucāmaram
50.28
airāvataḥ supratīko gajāvetau supūjitau
mukuṭaṃ kāñcanañcaiva nirmitaṃ viśvakarmaṇā
50.26-2
kuṇḍale cāmale divye vajrañcaiva varāyudham
jāmbūnadamayaṃ sūtraṃ keyūradvayameva ca
50.30
sambhāraṇi tathānyāni vividhāni bahūnyapi
samantāninyu ravyagrā gaṇapā devasammatāḥ
50.31
tato devāśca sendrāśca nārāyaṇamukhāstathā
munayo bhagavān brahmā navabrahmāṇa eva ca
50.32
devaiśca lokāḥ sarve te tato jagmurmudā yutāḥ
teṣvāgateṣu sarveṣu bhagavān parameśvaraḥ
50.33
sarvakāryyavidhiṃ karttumādideśa pitāmaham
pitāmaho'pi bhagavān niyogādeva tasya tu
50.34
cakāra sarvaṃ bhagavānabhiṣekaṃ samāhitaḥ
arcayitvā tato brahmā svayamevābhiṣecayet
50.35
tato viṣṇustataḥ śakro lokapālāstathaiva ca
abhiṣiñcanta vidhivadgaṇendraṃ śivaśāsanāt
50.36
ṛṣayastuṣṭuvuścaiva pitāmahapurogamāḥ
stutavatsu tatasteṣu viṣṇuḥ sarvajagatpatiḥ
50.37
śirasyañjalimādāya tuṣṭāva ca samāhitaḥ
prāñjaliḥ praṇato bhūtvā jayaśabdañcakāra ca
50.38
tato gaṇādhipāḥ sarve tato devāstato'surāḥ
evaṃ stutaścābhiṣikto devaiḥ sabrahmakaistadā
50.36-2
udvāhaśca kṛtastatra niyogāt parameṣṭhinaḥ
marutāñca sutā devo suyaśākhyā babhūva yā
50.40
labdhaṃ śaśiprabhaṃ chatraṃ tayā tatra vibhūṣitam
cāmare cāmarāsaktahastāyaiḥ strīgaṇairyutā
50.41
siṃhāsanañca paramaṃ tayā cādhiṣṭhitaṃ mayā
alaṅkṛtā mahālakṣmā mukuṭādyaiḥ subhūṣaṇaiḥ
50.42
labdho hāraśca paramo devyāḥ kaṇṭhagatastayā
vṛṣendvaśca sito nāgaḥ siṃhaḥ siṃhadhvajastathā
50.43
rathaśca hemakṛtaśca candravimbasasaprabham
adyāpi sadṛśaḥ kaścinmayā nāsti vibhuḥ kvacit
50.44
sānvayaśca gṛhītveśastasyā sambandhibāndhavaiḥ
āruhya vṛṣabhamīśāno mayā devyā gataḥ śivaḥ
50.45
tadā devo bhavaṃ dṛṣṭvā mayā ca prārthayan gaṇaiḥ
munidevarṣayaḥ siddhā ājñāṃ pāśupatīṃ dvijāḥ !
50.46
athājñāṃ pradadau teṣāmarhāṇāmājñayā vibhoḥ
nandiko nagajābhartusteṣāṃ pāśupatīṃ śubhām
50.47
tasmāddhi munayo labdhvā tadājñāṃ munipuṅgavāt
bhavabhaktāstadā cāsaṃstasmāddevaṃ samarccayet
50.48
namaskāravihīnastu nāma uccārayedbhavai
brahmaghnadaśasantulyaṃ tasya pāpaṃ garīyasam
50.46-2
tasmāt sarvvaprakāreṇa namaskṛtyādimuccaret
ādau kuryyānnamaskāraṃ tadante śivatāṃ vrajet
50.46-2.p1
iti śrīlaiṅge nandikeśvarābhiṣeko nāma catuścatvāriṃśo'dhyāyaḥ || 44
Linked texts (6)
- Liṅgapurāṇa — Vyāsa, Sanskrit
- Skandapurāṇa (early; "Ambikākhaṇḍa") — Sanskrit
- Liṅgapurāṇa — Ativīrarāma Pāṇṭiyar 1500, Sanskrit
- Ambikākhaṇḍa — Sanskrit
- Śivatattvaratnākara — Basappa Nāyaka 1684, Sanskrit
- Śivattvaratnākara — Basava, Sanskrit