Shivattvaratnakara 31.104

31.104

devyuvāca.
sarvalokādhipatyaṃ ca gaṇeśānāṃ tathaiva ca
sarvamarhati deveśa ! śailādistanayo mama
tatassa bhagavān devassarvalokeśvareśvaraḥ
sasmāra gaṇapān divyān devadevo vṛṣadhvajaḥ
smaraṇādeva rudrasya saṃprāptāste gaṇeśvarāḥ
1)sahasrahastapādāśca sahasrāyudhadhāriṇaḥ
tri2)netrāśca mahātmāna stridaśairabhivanditāḥ
kālāgnikoṭisaṃkāśā jaṭāmukuṭadhāriṇaḥ
koṭikoṭigaṇaistulyairātmanāñca gaṇeśvarāḥ
asaṅkhyātā mahātmānastatrājagmurmudāyutāḥ
gāyantaśca dravantaśca nṛtyantaśca mahābalāḥ
mukhāḍambaravādyāni nādayantastathaivaca
rathairnāgairhayaiścaiva vāyumarkaṭavāhanāḥ
vimāneṣu tathā rūḍhā hemacitreṣu vai gaṇāḥ
bherīmṛdaṃgavādyaiśca paṇavānakagomukhaiḥ
vāditrairvividhaiścānyaiḥ paṭahairekapuṣkaraiḥ
bherīmurajasannāhairāḍambarakaḍiṇḍimaiḥ
mardalairdarduraiścakraistalaghātairanekaśaḥ
vādyamānairmahāyogā ājagmurdevasaṃsadam
te gaṇeśā mahāsattvāssarvadeveśvareśvarāḥ
praṇamya devīṃ devaṃ ca vacanaṃ cedamabruvan
bhagavan ! deva ! deveśa ! triyambaka ! vṛṣadhvaja !
kimarthaṃ ca smṛtā deva ! hyājñāpaya mahādyute !
kiṃ sāgarān śoṣayāmo yamaṃ vā saha kiṃkaraiḥ
hanmo mṛtyusahāyaṃ vā savahnimatha pannajam
badhnendraṃ sahadevaiśca sahaviṣṇuṃ ca vāyunā
ānayāmassusaṃkruddhān daityānvādānavaissaha
kasyādya vyasanaṃ ghoraṃ kariṣyāmastavājñayā
kasya vā'dyotsavo deva ! sarvakāmasamṛddhimān
tāṃ stathā vādinassarvān gaṇeśān bhavasammatān
uvāca devassaṃpūjya koṭikoṭigaṇānprabhuḥ