Lingapurana 2.17
Liṅgapurāṇa 2.17
- Language
- Sanskrit
Contents
- 2.17.24 — 1 part
2.17.1
sanatkumāra uvāca
bhūyo devagaṇaśreṣṭha śivamāhātmyamuttamam /
śṛṇvato nāsti me tṛptistva dvākyāmṛtapānataḥ //
2.17.2
kathaṃ śarīrī bhagavān kasmādrudraḥ pratāpavān /
sarvātmā ca kathaṃ śambhuḥ kathaṃ pāśupataṃ vratam //
2.17.3
kathaṃ vā devamukhyaiśca śruto dṛṣṭaśca śaṅkaraḥ /
śailādiruvāca
avyaktādabhavatsthāṇuḥ śivaḥ paramakāraṇam //
2.17.4
sa sarvakāraṇopeta ṛpirviśvāvikaḥ prabhuḥ /
devānāṃ prathamaṃ devaṃ jāyamānaṃ mukhāmbujāt //
2.17.5
dadarśa cāgre brahmāṇaṃ cājñayā tamavaikṣata /
dṛṣṭo rudreṇa deveśaḥ sasarja sakalaṃ ca saḥ //
2.17.6
varṇāśramavyavasthāśca sthāpayāmāsa vai virāṭ /
somaṃ sasarja yajñārthaṃ somādidamajāyata //
2.17.7
caruśca vahniryajñaśca vajrapāṇiḥ śacīpatiḥ /
viṣṇurnārāyaṇaḥ śrīmān sarvaṃ somamayaṃ jagat //
2.17.8
rudrādhyāyena te devā rudraṃ tuṣṭuvurīśvaram /
prasannavadanastasthau devānāṃ madhyataḥ prabhuḥ //
2.17.9
apahṛtya ca vijñānameṣāmeva maheśvaraḥ /
devā hyapṛcchaṃstaṃ devaṃ ko bhavāniti śaṅkaram //
2.17.10
abravīdbhagavānrudro hyahamekaḥ purātanaḥ /
āsaṃ prathama evāhaṃ vartāmi ca surottamāḥ //
2.17.11
bhaviṣyāmi ca loke 'sminmatto nānyaḥ kutaścana /
vyatiriktaṃ na matto 'sti nānyatkiñcitsurottamāḥ //
2.17.12
nityo 'nityo 'hamanagho brāhmāhaṃ brahmaṇaspatiḥ /
diśaśca vidiśaścāhaṃ prakṛtiśca pumānaham //
2.17.13
triṣṭubjagatyanuṣṭup ca cchandohaṃ tanmayaḥ śivaḥ /
satyohaṃ sarvagaḥ śāntastretāgnirgauravaṃ guruḥ //
2.17.14
gaurahaṃ gahvaraścāhaṃ nityaṃ gahanagocaraḥ /
jyeṣṭhohaṃ sarvatattvānāṃ variṣṭhohamapāṃ patiḥ //
2.17.15
āpohaṃ bhagavānīśastejohaṃ vedirapyaham /
ṛgvedohaṃ yajurvedaḥ sāmavedohamātmabhūḥ //
2.17.16
atharvaṇohaṃ mantrohaṃ tathā cāṅgirasāṃ varaḥ /
itihāsapurāṇāni kalpohaṃ kalpanāpyaham //
2.17.17
akṣaraṃ ca kṣaraṃ cāhaṃ kṣāntiḥ śāntirahaṃ kṣamā /
guhyohaṃ sarvavedeṣu vareṇyohamajopyaham //
2.17.18
puṣkaraṃ ca pavitraṃ ca madhyaṃ cāhaṃ tataḥ param /
bahiścāhaṃ tathā cāntaḥ purastādahamavyayaḥ //
2.17.19
jyotiścāhaṃ tamaścāhaṃ brahmā viṣṇurmaheśvaraḥ /
buddhiścāhamahaṅkārastanmātrāṇīndriyāṇi ca //
2.17.20
evaṃ sarvaṃ ca māmeva yo veda sura sattamāḥ /
sa eva sarvavitsarvaṃ sarvātmā parameśvaraḥ //
2.17.21
gāṃ gobhirbrāhmaṇānsarvānbrahmaṇyena havīṃṣi ca /
āyuṣāyustathā satyaṃ satyena surasattamāḥ //
2.17.22
dharmaṃ dharmeṇa sarvāṃśca tarpayāmi svatejasā /
ityādau bhagavānuktvā tatraivāntaradhīyata //
2.17.23
nāpaśyanta tato devaṃ rudraṃ paramakāraṇam /
te devāḥ paramātmānaṃ rudraṃ dhyāyanti śaṅkaram //
2.17.24
sanārāyaṇakā devāḥ seṃdrāśca munayastathā /
tathordhvabāhavo devā rudraṃ stunvanti saṃkaram //
2.17.24.p1
iti śrīliṅgamahāpurāṇe uttarabhāge saptadaśo 'dhyāyaḥ
Commentaries (1)
- Śivatosaṇī Liṅgapurāṇaṭīkā — Gaṇeśa Bhaṭṭa, Sanskrit
Linked texts (5)
- Saurapurāṇa — Sanskrit
- Śivagītā — Sanskrit
- Śivapurāṇa (complete text) — Sanskrit
- Atharvaśira-upaniṣad — Sanskrit
- Śivagītā (ed. Vāsudevaśarman) — Sanskrit