Naradapurana 1.68
Nāradapurāṇa 1.68
- Language
- Sanskrit
Contents
- 1.68.94 — 1 part
1.68.1
śrīsanatkumāra uvāca /
atha vakṣye gaṇeśasya mantrānsarveṣṭadāyakān /
yānsamārādhya viprendra sādhako bhuktimuktimān //
1.68.2
avyayo viṣṇuvanitā śaṃbhustrī mīnaketanaḥ /
smṛtirmāṃseṃdumanvāḍhyā sā punaścandraśekharā //
1.68.3
ṅeṃto gaṇapatistoyaṃ bhujaṅgo varadeti ca /
sarvānte janamuñcārya tato me vaśamānaya //
1.68.4
vahniḥ priyānto mantro 'yaṣṭāviṃśativarṇavān /
gaṇako 'sya muniśchando gāyatrī viyudādikā //
1.68.5
gaṇeśo devatā bījaṃ ṣaṣṭaśaktistadādikā /
śrīmanmahāgaṇapatiprītaye viniyogakaḥ //
1.68.6
ṛṣiṃ śirasi vakre tu chandaśca hṛdi devatām /
guhye bījaṃ padoḥ śaktiṃ nyasetsādhakasattamaḥ //
1.68.7
ṣaḍdīrghāḍhyena bījena yaṃ ca bījādinā punaḥ /
ṣaḍaṅgāni nyasedasya jātiyuktāni mantravit //
1.68.8
śaivī ṣaḍaṅgamudrāya nyastavyā hi ṣaḍaṅgake /
gāmādyaṃ caiva bhūrlokaṃ nābhyantaṃ pādayornyaset //
1.68.9
gīmādyaṃ ca bhuvarlokaṃ kaṇṭhāntaṃ nābhito nyaset /
svarlokaṃ caiva gūmādyaṃ kaṇṭhadimastakāvadhi //
1.68.10
vyāpakaṃ mūlamantreṇa nyāso 'yaṃ bhuvanābhidhaḥ /
mūlamantraṃ samuñcārya mātṛkāvarṇamīrayet //
1.68.11
tadante 'pi ca mūlaṃ syānnamoṃ'taṃ mātṛkāsthale /
kṣāntaṃ vinyasya mūlena vyāpakaṃ racayetsudhīḥ //
1.68.12
varṇanyā so 'yamākhyātaḥ padanyāsastathocyate /
pañcatribāṇavahnīnducandrākṣinigamaiḥ kramāt //
1.68.13
vibhaktairmūlagāyatryā hṛdantairaṣṭabhiḥ padaiḥ /
bhāladeśe mukhe kaṇṭhe hṛdi nābhyūrujānuṣu //
1.68.14
pādayoścaiva vinyasya mūlane vyāpakaṃ caret /
vadettatpuruṣāyānte vidmaheti padaṃ tataḥ //
1.68.15
vakratuṇḍāya śabdānte dhīmahīti samīrayet /
tanno dantiḥ pracovarṇā dayāditi vadetpunaḥ //
1.68.16
eṣoktā mūlagāyatrī sarvasiddhipradāyinī /
evaṃ nyāsavidhiṃ kṛtvā dhyāyedevaṃ hṛdaṃbuje //
1.68.17
udyanmārtaṇḍasadṛśaṃ lokasthityantakāraṇam /
saśaktikaṃ bhūṣitāṅgaṃ danta cakrādyudāyudham //
1.68.18
evaṃ dhyātvā catuścatvāriṃśatsāhasrasaṃyutam /
caturlakṣaṃ japenmantraṃ aṣṭadravyairdaśāṃśataḥ //
1.68.19
juhuyādvidhivanmantrī saṃskṛte havyavāhane /
ikṣavaḥ saktavo mocāphalāni cipiṭāstilāḥ //
1.68.20
modakā nārikelāni lājā dravyāṣṭakaṃ smṛtam /
pīṭhamādhāraśaktyādiparatatvāntamarcayet //
1.68.21
ṣaṭkoṇāntastrikoṇaṃ ca bahiraṣṭadalaṃ likhet /
bhūpuraṃ tadbahiḥ kṛtvā gameśaṃ tatra pūjayet //
1.68.22
tīvrākhyā jvālinī nandā bhogadā kāmarūpāṇī /
agrā tejovatī satyā navamī vidhnanāśinī //
1.68.23
sarvādiśaktikamalāsanāya hṛdayāntikaḥ /
pīṭhamantro 'yametena dadyādāsanamuttamam //
1.68.24
tatrāvāhya gaṇādhīśaṃ madhye sampūjya yatnataḥ /
vikoṇabāhye pūrvādicaturdikṣaavarcayetkramāt //
1.68.25
śriyaṃ śriyaḥ patiṃ caiva gaurīṃ gaurī patiṃ tathā /
ratiṃ ratipatiṃ pāścānmahīpūrva ca potriṇam //
1.68.26
kramādilvavaṭāśvatthapriyagūnāmadhor'cayet /
ramā padmadvayakarā śaṅkhacakradharo hariḥ //
1.68.27
gaurī pāśāṅkuśadharā ṭaṅkaśūladharo haraḥ /
ratiḥ padmakarā puṣpabāṇacāpadharaḥ smaraḥ //
1.68.28
śūkavrīhyagrahastā bhūḥ potrī cakragadādharaḥ /
devāgre pūjayellakṣmīsahitaṃ tu vināyakam //
1.68.29
pūjayetṣaṭsu koṇeṣu hyāmodādyānpriyāyutān /
āmodaṃ siddhisaṃyuktamagrataḥ paripījayet //
1.68.30
pramodaṃ cāgnikoṇe tu samṛddhisahitaṃ yajet /
īśakoṇe yajetkīrtisaṃyutaṃ sumukhaṃ tathā //
1.68.31
vāruṇe madanāvatyā saṃyutaṃ durmukhaṃ yajet /
yajennairṛtyakoṇe tu vighnaṃ madadravāyutam //
1.68.32
drāviṇyā vighnakartāraṃ vāyukoṇe samarcayet /
pāśāṅkuśābhayakarāṃstaruṇārkasamaprabhān //
1.68.33
kapolavigaladdānagandhalubdhā liśobhitān /
ṣaṭkoṇobhayapārśve tu śaṅkhapadmanibhau kramāt //
1.68.34
sahitau nijaśaktibhyāṃ dhyātvā pūrvavadarcayet /
keśareṣu ṣaḍaṅgāni patreṣvaṣṭau tu mātaraḥ //
1.68.35
indrādyānapi vajjrādīnpūjayeddharaṇīgṛhe /
evamārādhya vighneśaṃ sādhayetsvamanorathān //
1.68.36
catuścatvāriṃśatāḍhyaṃ catuḥ śatamatandritaḥ /
tarpayedaṃbubhiḥ śuddhairgajāsyaṃ dinaśaḥ sudhīḥ //
1.68.37
padmaistu vaśayedbhūpāṃstatpatnīścotpalaistathā /
kumudairmantriṇo 'śvatthasamidbhirvāḍavāñśubhaiḥ //
1.68.38
uduṃmbarotthairnṛpatīnvaiśyānplakṣasamudbhavaiḥ /
vaṭodbhavaiḥ samidbhiśca vaśayedantimānbudhaḥ //
1.68.39
ājyena śriyamāpnoti svarṇāptirmadhunā bhavet /
godugdhena gavāṃ lābho dadhnā sarvasamṛddhimān //
1.68.40
annāptirannahomena samidbhirvetasāṃ jalam /
vāsāṃsi labhate hutvā kusuṃbhakusumaiḥ śubhaiḥ //
1.68.41
atha sarveṣṭadaṃ vakṣye caturāvṛttitarpaṇam /
mūlenādau caturvāraṃ pratyekaṃ ca pratarpayet //
1.68.42
pūrvamantrākṣarairmantraiḥ svāhāntaiśca catuścatuḥ /
mūlamantraiścaturvārapūrvakaṃ saṃpratarpya ca //
1.68.43
mithunādīṃstataḥ paścātpūrvavatsaṃpratarpayet /
devena sahitāṃ śaktiṃ śaktyā ca sahitaṃ tu tam //
1.68.44
evañca ṣaḍviṃśatidhā mithunāni bhavanti hi /
svanāmādyarṇabījāni tāni santarpayetkramāt //
1.68.45
bhavetsaṃbhūya sacatuścatvāriṃśañcatuḥ śatam /
evaṃ saṃtapya tatpaścātpūrvavatsopacārakaiḥ //
1.68.46
sarvābhīṣṭaṃ ca saṃprārthya praṇamyodvāsayetsudhīḥ /
bhādrakṛṣṇacaturthyādipratimāsamatandritaḥ //
1.68.47
ārabhyārke dayaṃ mantrī yāvaccandrodayo bhavet /
tāvannopaviśedbhūmau jitavākkriyāmānasaḥ //
1.68.48
tataścandrodaye mantrī pūjayedgaṇanāyakam /
pūrvoktavidhinā samyaṅnānāpuṣpopahārakaiḥ //
1.68.49
ekaviṃśatisaṃkhyākānmodakāṃśca nivedayet /
tadagre prajapenmantramaṣṭottarasahasrakam //
1.68.50
tataḥ karpūrakāśmīraraktapuṣpaiḥ sacandanaiḥ /
ardhyaṃ dadyāttu mūlānte ṅeṃte gaṇapatiṃ tataḥ //
1.68.51
idamardhyaṃ kalpayāmi hṛdantor'dhyamanurmataḥ /
stutvā natvā visṛjyātha yajeccandramasaṃ punaḥ //
1.68.52
ardhyaṃ dadyāñcaturvāraṃ pūjayitvā guruṃ tataḥ /
nivediteṣu viprāya dadyādardhāṃśca modakān //
1.68.53
svayamarddhānprabhuñjīta brahmacārī jitendriyaḥ /
evaṃ vrataṃ yaḥ kurute samyaksaṃvatsarāvadhi //
1.68.54
putrānpautrānsukhaṃ vittamārogyaṃ labhate naraḥ /
sūryodayādaśaktaścedastamārabhya mantravit //
1.68.55
candrodayāntaṃ pūrvoktavidhinā vratamācaret /
evaṃ kṛte 'pi pūrvoktaṃ phalamāpnoti niścitam //
1.68.56
gaṇiśapratimāṃ dantidantena kapināpi vā /
gajabhagrena niṃbena sitārkeṃṇāthavā punaḥ //
1.68.57
kṛtvā tasyāṃ samāvāhya prāṇasthāpanapūrvakam /
abhyarcya vidhivanmantrī rāhugraste niśākare //
1.68.58
spṛṣṭrā caiva nirahārastāṃ śikhāyāṃ samudvahan /
dyūte vivāde samare vyavahāre jayaṃ labhet //
1.68.59
bījaṃ varāho binddhāḍhyau manvindvānnau kalau tataḥ /
smṛtirmāṃseṃdumanvāgrā karṇocchiṣṭagaṇe vadet //
1.68.60
bakaḥ sadīrghapavano mahāyakṣāya yaṃ baliḥ /
balimantro 'yamākhyāto na cedvarṇo 'khileṣṭadaḥ //
1.68.61
praṇavo bhuvaneśānīsvabījānte navārṇakaḥ /
hastīti ca piśācīti likheñcaivāgriṃsuṃdarī //
1.68.62
navārṇo 'yaṃ samuddiṣṭo bhajatāṃ sarvasiddhidaḥ /
padaiḥ sarvaṇa mantreṇa pañcāṅgāni prakalpayet //
1.68.63
anyatsarvaṃ samānaṃ syātpūrvamantreṇa nārada /
athābhidhāsye vidhivadvakratuṇḍamanuttamam //
1.68.64
toyaṃ vidhirvahniyuktakarṇendvāḍhyo haristathā /
sadīrgho dārako vāyurvarmānto 'yaṃ rasārṇakaḥ //
1.68.65
bhārgavo 'sya muniśchando 'nuṣṭubdevo gaṇādhipaḥ /
vakratuṇḍābhidho bījaṃ vaṃ śaktiḥ kavacaṃ punaḥ //
1.68.66
tāradṛnmadhyagairmantravarṇaiścandravibhūṣitaiḥ /
kṛtvā ṣaḍaṅgamantrārṇānbhrūmadhye ca gale hṛdi //
1.68.67
nāmau liṅge pade nyasyākhilena vyāpakaṃ caret /
udyadarkadyutiṃ hastaiḥ pāśāṅkuśavarābhayān //
1.68.68
dadhataṃ gajavaktraṃ ca raktabhūṣāṃbaraṃ bhajet /
dhyātvaivaṃ prajapettarkalakṣaṃ dravyairdaśāṃśataḥ //
1.68.69
aṣṭabhirjuhuyātpīṭhe tīvrādisahiter'cayet /
mūrtiṃ mūrtena saṃkalpya tasyāmāvāhya pūjayet //
1.68.70
ṣaṭkoṇeṣu ṣaḍaṅgāni patreṣvaṣṭau tu śaktayaḥ /
yajedvidyāṃ vidhātrīṃ ca bhogadāṃ vipraghātinīm //
1.68.71
nidhipradīpāṃ pāpaghnīṃ puṇyāṃ paścācchaśiprabhām /
dalāgreṣu vakratuṇḍa ekadaṃṣṭramahodarau //
1.68.72
gajāsyalaṃbodarakau vikaṭau vidhnarāṭ tathā /
dhūmravarṇastato bāhye lokeśānhetisaṃyutān //
1.68.73
evamāvaraṇairiṣṭvā pañcabhirgaṇanāyakam /
sādhaṃyedakhilānkāmānvakratuṇḍa praṃsādataḥ //
1.68.74
labdhvā gurumukhānmantraṃ dīkṣāsaṃskārapūrvakam /
brahmacārī haviṣyāśī satyavāk ca jitendriyaḥ //
1.68.75
japedarkasahasraṃ tu ṣaṇmāsaṃ homasaṃyutam /
dāridṣaṃ tu parābhūya jāyate dhanadopamaḥ //
1.68.76
caturthyādi caturthyantaṃ japedayutamādarāt /
aṣṭottaraśataṃ nityaṃ hutvā prāgvatphalaṃ labhet //
1.68.77
/
pakṣayorubhayormantrī caturthyāṃ juhuyācchatam /
apūpairvatsare sa syātsamṛddheḥ paramaṃ padam //
1.68.78
aṅgārakacaturthyāṃ tu devamiṣṭvā vidhānataḥ /
haviṣā pā yasānnena naivedyaṃ parikalpayet //
1.68.79
tato guruṃ samabhyarntya bhojayedvidhivatsudhīḥ /
niveditena juhuyātsaharasraṃ vidhivadvasau //
1.68.80
evaṃ saṃvatsaraṃ kṛtvā mahatīṃ śriyamāpnuyāt /
athānyatsādhanaṃ vakṣye lokānāṃ hitakāmyayā //
1.68.81
iṣṭvā gaṇeśaṃ pṛthukaiḥ pāyasāpūpamodakaḥ /
nānāphalaistatomantrī haridrāmatha saindhavam //
1.68.82
vacāṃ niṣkārddhabhāgaṃ ca tadarddhaṃ vā manuṃ japet /
viśodhya cūrṇaṃ prasṛtau gavāṃ mūtre vinikṣipet //
1.68.83
sahasrakṛtvo manunā mantrayitvā prayatnataḥ /
snātāmṛtudine śuddhāṃ śuklāṃbaradharāṃ śubhām //
1.68.84
devasya purataḥ sthāpya pāyayedauṣadhaṃ sudhīḥ /
sarvalakṣaṇasaṃpannaṃ vandhyāpi labhate sutam //
1.68.85
athānyatsaṃpravakṣyāmi rahasyaṃ paramādbhutam /
gocarmamātrāṃ dharaṇīmupalipya prayatnataḥ //
1.68.86
vikīrya dhānyaprakaraistatra saṃsthāpayeddhaṭam /
śuddhodakena saṃpūrya tasyopari nidhāpayet //
1.68.87
kapilājyena saṃpūrṇaṃ śarāvaṃ nūtanaṃ śubham /
ṣaḍaṣṭākṣaramantrābhyāṃ dīpamāropayecchubham //
1.68.88
dīpe devaṃ samāvāhya gandhapuṣpādibhiryajet /
snātāṃ kumārīmathavā kumāraṃ pūjayetsudhīḥ //
1.68.89
dīpasya purataḥ sthāpyadhyātvā devaṃ japenmanum /
pradīpe sthāpite paśyeddvijarūpaṃ gaṇeśvaram //
1.68.90
pṛṣṭastataḥ saṃpadi vā naṣṭaṃ caivāpyanāgatam /
sakalaṃ pravadedevaṃ kumārī vā kumārakaḥ //
1.68.91
ṣaḍakṣaro hṛdantaścedbhavedaṣṭākṣaro manuḥ /
anye 'pi mantrā devarṣe santi tantre gaṇeśituḥ //
1.68.92
kintvatra yanna sādhyaṃ syātrriṣu lokeṣu sādhakaiḥ /
aṣṭaviṃśarasārṇābhyāṃ tanna paśyedapi kvacit //
1.68.93
etadgaṇeśamantrāṇāṃ vidhānaṃ te mayoditam /
śaṭhebhyaḥ paraśiṣyebhyo vañcakebhyo 'pi mā vada //
1.68.94
evaṃ yo bhajate devaṃ gaṇeśaṃsarvasiddhidam /
prāpyeha sakalānbhoganinte muktipadaṃ vrajet //
1.68.94.p1
iti śrībṛhannāradīyapurāṇe pūrvabhāge bṛhadupākhyāne tṛtīyapāde gaṇeśamantravidhānanirūpaṇaṃ nāmāṣṭaṣaṣṭitamo 'dhyāyaḥ
Linked texts (6)
- Gaṇeśapurāṇa — Sanskrit
- Kulavṛtti — Sanskrit
- Tantrasāra (Kṛṣṇānanda) — Kṛṣṇānanda Āgamavāgīśa 1550, Sanskrit
- Bṛhattantrasāra — Sanskrit
- Mantrakośa — Āśādityatripāṭhin, Sanskrit
- Nityācārapaddhati (Vidyākara vājapeyin) — Vidyākara vājapeyin, Sanskrit