Prakriyapada 36: atha ṣaṭtriṃśo'dhyāyaḥ
Prakriyāpāda 36
- Language
- Sanskrit
Contents
- 36.33 — 1 part
atha ṣaṭtriṃśo'dhyāyaḥ
36.1
bhuvanavinyāsaḥ
sūta uvāca | teṣāṃ caturṇāṃ vakṣyāmi śailendrāṇāṃ yathākramaṃ
anubandhāni ramyāṇi sarvakālarttu kāni ca
36.2
sārikābhirmayūraiśca cakoraiśca madotkaṭaiḥ
śukaiśca bhṛṅgarājaiśca citvakaiśca samantataḥ
36.3
jīvañjīvakanādaiśca hemakānāñca nāditaiḥ
mattakokilanādaiśca valgūnāñca nināditaiḥ (1)
36.4
sugrīvakāñcanaravaiḥ kalaviṅkarutaistathā
kūjitāntaraśabdaiśca suramyāṇi ca sarvaśaḥ
36.5
madotkaṭairmadhuraiśca bhramaraiśca mahālasaiḥ (2)
upagītavanāntāni kinnaraiśca kvacit kvacit
36.6
puṣpavṛṣṭiṃ vimuñcanti mandamārutakampitāḥ
taravo yatra dṛśyante cārupallavaśobhitāḥ
36.7
stavakairmañjarībhiśca tāmraiḥ kisalayaistathā
mandravātavaśāllolairdolayadbhirivya̍tāni ca
36.8
nānādhātuvicitraiśca kāntarūpaiḥ śilāśataiḥ
śṛṅgaiḥ kvacid dvijaśreṣṭhā vinyastaiḥ śobhitāni ca
36.9
devadānavagandharvvayakṣarākṣasapannagaiḥ
siddhāpsarogaṇaiścaiva sevitāni tatastataḥ
36.10
manoharāṇi catvāri devākrīr̤anakānyatha
caturdiśamudārāṇi nāmnā śṛṇuta tāni me
36.11
pūrvaṃścaitrarathaṃ nāma dakṣiṇaṃ nandanaṃ vanaṃ
vaibhrājaṃ paścimaṃ vidyāduttaraṃ saviturvvanaṃ
36.12
mahāvaneṣu caiteṣu niviṣṭāni yathākramaṃ
anubandhāni ramyāṇi vihaṅgaiḥ kūjitāni ca
36.13
vanairvistīrṇatīrthāni mahāpuṇyavanāni ca
mahānāgādhivāsāni sevitāni mahātmabhiḥ
36.14
surasāmalatoyāni śivāni sukhāni ca
siddhadevāsuravarairupaspṛṣṭajalāni ca
36.15
chatrapramāṇairvvikacairmahāgandhairmanoharaiḥ
puṇḍarīkairmahāpatrairutpalaiḥ śobhitāni ca
mahāmarāṃsi catvāri tāni vakṣyāmi nāmataḥ
36.16
aruṇodaṃ saraḥ pūrvaṃ dakṣiṇaṃ mānasaṃ smṛtaṃ
sitodaṃ paścimasarau mahābhadrantathottaraṃ
36.17
aruṇodañca pūrveṇa ye ca śailāstataḥ smṛtāḥ
tān kīrtyamānāṃstattvena śṛṇudhvaṃ vistarānmama
36.18
śītāntaśca kumuñjaśca suvīraścācalottamaḥ
vikaṅko maṇiśailaśca (1) vṛṣabhaścācalottamaḥ
36.18-2
mahānīlo'tha rucakaḥ savindurmandarastathā
veṇumāṃśca sumedhaśca niṣadho devaparvataḥ
36.20
ityete parvatavarā anye ca girayastathā
pūrveṇa mandarasyete siddhavāsā udāhṛtāḥ
36.21
saraso mānasasyeha dakṣiṇā ye mahācalāḥ
ye kīrttitā mayā te vai nāmatastānnibodhata
36.22
śailastriśikharaścāpi śiśiraścāpyajottamaḥ(1)
kaliṅgo gaṅgajaśca dūtakaścaiva sānumān
36.23
tāmrābhaśca viśākhaśca tathā śvetaudaro giriḥ
samūlo viṣadhāraśca ratnadhāraśca parvataḥ
36.24
ekaśṛṅgo mahāmūlo gajaśailaḥ piśācakaḥ
pañcaśailo'tha kailāso himavāṃścācalottamaḥ
36.25
ityete devacaritā dyutkṛṣṭāḥ parvatottamāḥ
digbhāge dakṣiṇe proktā meroramaravarccasaḥ
36.26
apareṇa sitodasya saraso dvijasattamāḥ
uttamā ye mahāśailāstān pravakṣye yathākramaṃ
36.27
suvakṣāḥ śikhiśailaśca kālo vaidūryyaparvataḥ
kapilaḥ piṅgalo rudraḥ(2) surasaśca mahācalaḥ
36.28
kumudo madhumāṃścaiva añjano mukuṭastathā
kṛṣṇaśca pāṇḍaraścaiva sahasraśikharaśca ha
36.29
pāriyātraśca(3) śailendrastriśṛṅgaścācalottamaḥ
ityete parvatavarā digbhāge paścime smṛtāḥ
36.30
mahābhadrasya sarasa uttareṇāpi śrīmataḥ
ye mayā pūrvvataḥ proktāstānbadiṣye yathākramaṃ
36.31
śaṅkakūṭī mahāśailo vṛṣabho haṃsaparvvataḥ
nāgaśca kapilaścaiva indraśailaśca sānumān
36.32
nīlaḥ kanakabhṛṅgaśca śataśṛṅgaśca parvvataḥ
puṣpako meghaśailaśca virājaścācalottamaḥ
jārudhiścaiva (1) śailendra ityete uttarāḥ smṛtāḥ
36.33
eteṣāṃ śailamukhyānāmantareṣu yathākramaṃ
sthālyo'hyantaradroṇyaśca sarāṃsi ca nibodhata
36.33.p1
iti śrīmahāpurāṇe vāyuprokte bhuvanavinyāso nāma ṣaṭtriṃśo'dhyāyaḥ
Linked texts (12)
- Vāyupurāṇa — Vyāsa, Sanskrit
- Liṅgapurāṇa — Vyāsa, Sanskrit
- Varāhapurāṇa — Vyāsa, Sanskrit
- Kūrmapurāṇa — Vyāsa, Sanskrit
- Mārkaṇḍeyapurāṇa — Vyāsa, Sanskrit
- Liṅga — Sanskrit
- Liṅgapurāṇa — Ativīrarāma Pāṇṭiyar 1500, Sanskrit
- Brāhmī Saṃhitā — Sanskrit
- Brahmisamhita (gurumandalseries1962) — Sanskrit
- Śivatattvaratnākara — Basappa Nāyaka 1684, Sanskrit
- Śivattvaratnākara — Basava, Sanskrit
- Kūrmapurāṇa (Ananta Gokhale) — Ananta Gokhale, Sanskrit