Shivattvaratnakara 12.12

12.12

meruṃ pradakṣiṇīkṛtya jambūmūlaṃ viśatyadhaḥ
vanaṃ caitrarathaṃ pūrve dakṣiṇe gandhamādanam
vaibhrājaṃ paścime tadvaduttare nandanaṃ smṛtam
aruṇodaṃ mahābhadraṃ saśītodaṃ 1)samānanam
sarāṃsyetāni catvāri devabhogyāni sarvadā
2)śītāmbhaśca kumudrāṃśca karavīmālyavāṃstathā
vaikaṃko mīṇamāṃścaiva plakṣavāṃścācalottamaḥ
mahānilo'tha rucakaḥ subindurmandarastathā
veṇumāṃśca sumeghaśca niṣadho devaparvataḥ
ityete devaracitāḥ siddhāvāsāḥ prakīrtitāḥ
aruṇodasya sarasaḥ pūrvataḥ kesarācalāḥ
trikūṭaśikharaścaiva pataṃgo rucakastathā
niṣadho vasudhāraśca kaliṃga strividhaśśubhaḥ
samūlo vasusāraśca kuravaścaiva sānumān
tāmrābhraśca viśālaśca kumudo veṇuparvataḥ
ekaśṛṃgo mahāśailo gajaśailaḥ piśācakaḥ
paṃcaśailo'tha kailāso himavāṃścācalottamaḥ
ityete devacaritā utkṛṣṭāḥ parvatottamāḥ
mahābhadrasya saraso dakṣiṇe kesarācalāḥ
śaśivāsassabaiḍūryaḥ kapilo gandhamādanaḥ
jārudhīśca sugandhiśca triśṛṃgaścācalottamaḥ
supārśvaśca supakṣaśca kākaḥ kapila eva ca
piñjaro bhadraśailaśca surasaśca mahābalaḥ
aṃjano madhumāṃstadvat kumudo makuṭastathā