Pramāṇa · Search · About · API

Shivapurana 1.21: ekaviṃśo'dhyāyaḥ | kāmanānurodhena pūjane śivaliṅgasaṅkhyābhidhānam

Śivapurāṇa (complete text) 1.21

Language
Sanskrit

Contents

ekaviṃśo'dhyāyaḥ | kāmanānurodhena pūjane śivaliṅgasaṅkhyābhidhānam

1.21.1

ṛṣaya ūcuḥ |
sūta sūta mahābhāga vyāsaśiṣya namo'stu te |
samyaguktaṃ tvayā tāta pārthivārcāvidhānakam ||

1.21.2

kāmanābhedamāśritya saṅkhyāṃ brūhi vidhānataḥ |
śivapārthivaliṅgānāṃ kṛpayā dīnavatsala ||

1.21.3

sūta uvāca |
śṛṇudhvamṛṣayaḥ sarve pārthivārcāvidhānakam |
yasyānuṣṭhānamātreṇa kṛtakṛtyo bhavennaraḥ ||

1.21.4

akṛtvā pārthivaṃ liṅgaṃ yo'nyadevaṃ prapūjayet |
vṛthā bhavati sā pūjā damadānādikaṃ vṛthā ||

1.21.5

saṅkhyā pārthivaliṅgānāṃ yathākāmaṃ nigadyate |
saṅkhyā sadyo muniśreṣṭha niścayena phalapradā ||

1.21.6

prathamāvāhanaṃ tatra pratiṣṭhā pūjanaṃ pṛthak |
liṅgākāraṃ samaṃ tatra sarvaṃ jñeyaṃ pṛthakpṛthak ||

1.21.7

vidyārthī puruṣaḥ prītyā sahasramitapārthivam |
pūjayecchivaliṅgaṃ hi niścayāttatphalapradam ||

1.21.8

naraḥ pārthivaliṅgānāṃ dhanārthī ca tadardhakam |
putrārthī sārdhasāhasraṃ vastrārthī śatapañcakam ||

1.21.9

mokṣārthī koṭiguṇitaṃ bhūkāmaśca sahasrakam |
dayārthī ca trisāhasraṃ tīrthārthī dvisahasrakam ||

1.21.10

suhṛtkāmī trisāhasraṃ vaśyārthī śatamaṣṭakam |
māraṇārthī saptaśataṃ mohanārthī śatāṣṭakam ||

1.21.11

uccāṭanaparaścaiva sahasraṃ ca yathoktataḥ |
stambhanārthī sahasraṃ tu dveṣaṇārthī tadardhakam ||

1.21.12

nigaḍānmuktikāmastu sahasraṃ sārdhamuttamam |
mahārājabhaye pañcaśataṃ jñeyaṃ vicakṣaṇaiḥ ||

1.21.13

caurādisaṅkaṭe jñeyaṃ pārthivānāṃ śatadvayam |
ḍākinyādibhaye pañcaśatamuktaṃ ca pārthivam ||

1.21.14

dāridratye pañcasāhasramayutaṃ sarvakāmadam | please ceck atha nityavidhiṃ vakṣye śṛṇudhvaṃ munisattamāḥ ||

1.21.15

ekaṃ pāpaharaṃ proktaṃ dviliṅgaṃ cārthasiddhidam |
triliṅgaṃ sarvakāmānāṃ kāraṇaṃ paramīritam ||

1.21.16

uttarottaramevaṃ syātpūrvoktagaṇanāvadhi |
matāntaramatho vakṣye saṅkhyāyāṃ munibhedataḥ ||

1.21.17

liṅgānāmayutaṃ kṛtvā pārthivānāṃ subuddhimān |
nirbhayo hi bhavennūnaṃ mahārājabhayaṃ haret ||

1.21.18

kārāgṛhādimuktyarthamayutaṃ kārayed budhaḥ |
ḍākinyādibhaye saptasahasraṃ kārayettathā ||

1.21.19

aputraḥ pañcapañcāśat sahasrāṇi prakārayet |
liṅgānāmayutenaiva kanyakāsantatiṃ labhet ||

1.21.20

liṅgānāmayutenaiva viṣṇvādyaiśvaryamāpnuyāt |
liṅgānāṃ prayutenaiva hyatulāṃ śriyamāpnuyāt ||

1.21.21

koṭimekāṃ tu liṅgānāṃ yaḥ karoti naro bhuvi |
śiva eva bhavetso'pi nātra kāryā vicāraṇā ||

1.21.22

arcā pārthivaliṅgānāṃ koṭiyajñaphalapradā |
bhuktidā muktidā nityaṃ tataḥ kāmārthināṃ nṛṇām ||

1.21.23

vinā liṅgārcanaṃ yasya kālo gacchati nityaśaḥ |
mahāhānirbhavettasya durvṛttasya durātmanaḥ ||

1.21.24

ekataḥ sarvadānāni vratāni vividhāni ca |
tīrthāni niyamā yajñā liṅgārcā caikataḥ smṛtā ||

1.21.25

kalau liṅgārcanaṃ śreṣṭhaṃ yathā loke pradṛśyate |
tathānyannāsti śāstrāṇāmeṣa siddhāntaniścayaḥ ||

1.21.26

bhuktimuktipradaṃ liṅgaṃ vividhāpannivāraṇam |
pūjayitvā naro nityaṃ śivasāyujyamāpnuyāt ||

1.21.27

śivanāmamayaṃ liṅgaṃ nityaṃ pūjyaṃ maharṣibhiḥ |
yataśca sarvaliṅgeṣu tasmātpūjyaṃ vidhānataḥ ||

1.21.28

uttamaṃ madhyamaṃ nīcaṃ trividhaṃ liṅgamīritam |
mānato muniśārdūlāstacchṛṇudhvaṃ vadāmyaham ||

1.21.29

caturaṅgulamucchrāyaṃ ramyaṃ vedikayā yutam |
uttamaṃ liṅgamākhyātaṃ munibhiḥ śāstrakovidaiḥ ||

1.21.30

tadarddhaṃ madhyamaṃ proktaṃ tadarddhamadhamaṃ smṛtam |
itthaṃ trividhamākhyātamuttarottarataḥ param ||

1.21.31

anekaliṅgaṃ yo nityaṃ bhaktiśraddhāsamanvitaḥ |
pūjayetsa labhetkāmānmanasā mānasepsitān ||

1.21.32

na liṅgārādhanādanyatpuṇyaṃ vedacatuṣṭaye |
vidyate sarvaśāstrāṇāmeṣa eva viniścayaḥ ||

1.21.33

sarvametatparityajya karmajālamaśeṣataḥ |
bhaktyā paramayā vidvām̐lliṅgamekaṃ prapūjayet ||

1.21.34

liṅge'rcite'rcitaṃ sarvaṃ jagatsthāvarajaṅgamam |
saṃsārāmbudhimagnānāṃ nānyattaraṇasādhanam ||

1.21.35

ajñānatimirāndhānāṃ viṣayāsaktacetasām |
plavo nānyo'sti jagati liṅgārādhanamantarā ||

1.21.36

haribrahmādayo devā munayo yakṣarākṣasāḥ |
gandharvāścāraṇāḥ siddhā daiteyā dānavāstathā ||

1.21.37

nāgāḥ śeṣaprabhṛtayo garuḍādyāḥ khagāstathā |
saprajāpatayaścānye manavaḥ kinnarā narāḥ ||

1.21.38

pūjayitvā mahābhaktyā liṅgaṃ sarvārthasiddhidam |
prāptāḥ kāmānabhīṣṭāṃśca tāṃstānsarvānhṛdi sthitān ||

1.21.39

brāhmaṇaḥ kṣatriyo vaiśyaḥ śūdro vā pratilomajaḥ |
pūjayetsatataṃ liṅgaṃ tattanmantreṇa sādaram ||

1.21.40

kiṃ bahūktena munayaḥ strīṇāmapi tathānyataḥ |
adhikāro'sti sarveṣāṃ śivaliṅgārcane dvijāḥ ||

1.21.41

dvijānāṃ vaidikenāpi mārgeṇārādhanaṃ varam |
anyeṣāmapi jantūnāṃ vaidikena na sammatam ||

1.21.42

vaidikānāṃ dvijānāṃ ca pūjā vaidikamārgataḥ |
kartavyā nānyamārgeṇa ityāha bhagavān śivaḥ ||

1.21.43

dadhīcigautamādīnāṃ śāpenādagdhacetasām |
dvijānāṃ jāyate śraddhā naiva vaidikakarmaṇi ||

1.21.44

yo vaidikamanādṛtya karma smārtamathāpi vā |
anyatsamācarenmartyo na saṅkalpaphalaṃ labhet ||

1.21.45

itthaṃ kṛtvārcanaṃ śambhornaivedyāntaṃ vidhānataḥ |
pūjayedaṣṭamūrtīśca tatraiva trijaganmayīḥ ||

1.21.46

kṣitirāpo'nalo vāyurākāśaḥ sūryasomakau |
yajamāna iti tvaṣṭau mūrtayaḥ parikīrtitāḥ ||

1.21.47

śarvo bhavaśca rudraśca ugro bhīma itīśvaraḥ |
mahādevaḥ paśupatiretānmūrtibhirarcayet ||

1.21.48

pūjayetparivāraṃ ca tataḥ śambhoḥ subhaktitaḥ |
īśānādikramāttatra candanākṣatapatrakaiḥ ||

1.21.49

īśānaṃ nandinaṃ caṇḍaṃ mahākālaṃ ca bhṛṅgiṇam |
vṛṣaṃ skandaṃ kapardīśaṃ somaṃ śukraṃ ca tatkramāt ||

1.21.50

agrato vīrabhadraṃ ca pṛṣṭhe kīrtimukhaṃ tathā |
tata ekādaśān rudrānpūjayedvidhinā tataḥ ||

1.21.51

tataḥ pañcākṣaraṃ japtvā śatarudriyameva ca |
stutīrnānāvidhāḥ kṛtvā pañcāṅgapaṭhanaṃ tathā ||

1.21.52

tataḥ pradakṣiṇāṃ kṛtvā natvā liṅgaṃ visarjayet |
iti proktamaśeṣaṃ ca śivapūjanamādarāt ||

1.21.53

rātrāvudaṅmukhaḥ kuryād devakāryaṃ sadaiva hi |
śivārcanaṃ sadāpyevaṃ śuciḥ kuryādudaṅmukhaḥ ||

1.21.54

na prācīmagrataḥ śambhornodīcīṃ śaktisaṃhitām |
na pratīcīṃ yataḥ pṛṣṭhamato grāhyaṃ samāśrayet ||

1.21.55

vinā bhasmatripuṇḍreṇa vinā rudrākṣamālayā |
bilvapatraṃ vinā naiva pūjayecchaṅkaraṃ budhaḥ ||

1.21.56

bhasmāprāptau muniśreṣṭhāḥ pravṛtte śivapūjane |
tasmānmṛdāpi kartavyaṃ lalāṭe ca tripuṇḍrakam ||

1.21.56.c1

iti śrīśivamahāpurāṇe prathamāyāṃ vidyeśvarasaṃhitāyāṃ sādhyasādhanakhaṇḍe pārthivapūjanavarṇanaṃ nāmaikaviṃśo'dhyāyaḥ ||

1.21.56.p2

śrīgaṇeśāya namaḥ ||

1.21.56.p3

śrīgaurīśaṅkarābhyāṃ namaḥ ||

1.21.56.p4

vidyeśvarasaṃhitā

Other recensions (2)

Linked texts (6)