Pramāṇa · Search · About · API

Shivapurana 5.10: daśamo'dhyāyaḥ | narakagatibhogavarṇanam

Śivapurāṇa (complete text) 5.10

Language
Sanskrit

Contents

daśamo'dhyāyaḥ | narakagatibhogavarṇanam

5.10.1

sanatkumāra uvāca |
mithyāgamaṃ pravṛttastu dvijihvākhyaṃ ca gacchati |
jihvārdhakośavistīrṇahalaistīkṣṇaiḥ prapīḍyate ||

5.10.2

nirbhartsayati yaḥ krūro mātaraṃ pitaraṃ gurum |
viṣṭhābhiḥ kṛmimiśrābhirmukhamāpūrya hanyate ||

5.10.3

ye śivāyatanārāmavāpīkūpataḍāgakān |
vidravanti dvijasthānaṃ narāstatra ramanti ca ||

5.10.4

kāmāyodvartanābhyaṅga snānapānāmbubhojanam |
krīḍanaṃ maithunaṃ dyūtamācaranti madoddhatāḥ ||

5.10.5

pecire vividhairdhorairikṣuyantrādipīḍanaiḥ |
nirayāgniṣu pacyante yāvadābhūtasamplavam ||

5.10.6

tena tenaiva rūpeṇa tāḍyante pāradārikāḥ |
gāḍhamāliṅgya te nārīṃ sutaptāṃ lohanirmitām ||

5.10.7

pūrvākārāśca puruṣāḥ prajvalanti samantataḥ |
duścāriṇīṃ striyaṃ gāḍhamāliṅganti rudanti ca ||

5.10.8

ye śṛṇvanti satāṃ nindāṃ teṣāṃ karṇaprapūraṇam |
agnivarṇairayaḥkīlaistaptaistāmrādinirmitaiḥ ||

5.10.9

trapusīsārakūṭādbhiḥ kṣīreṇa ca punaḥpunaḥ |
sutaptatīkṣṇatailena vajralepena vā punaḥ ||

5.10.10

kramādāpūrya karṇāṃstu narakeṣu ca yātanāḥ |
anukrameṇa sarveṣu bhavantyetāḥ samantataḥ ||

5.10.11

sarvendriyāṇāmapyevaṃ kramātpāpena yātanāḥ |
bhavanti ghorāḥ pratyekaṃ śarīreṇa kṛtena ca ||

5.10.12

sparśadoṣeṇa ye mūḍhāḥ spṛśanti ca parastriyam |
teṣāṃ karo'gnivarṇābhiḥ pāṃsubhiḥ pūryate bhṛśam ||

5.10.13

teṣāṃ kṣārādibhiḥ sarvaiḥ śarīramanulipyate |
yātanāśca mahākaṣṭāḥ sarveṣu narakeṣu ca ||

5.10.14

kurvanti pitrorbhṛkuṭiṃ karanetrāṇi ye narāḥ |
vaktrāṇi teṣāṃ sāntāni kīryante śaṅkubhirdṛḍham ||

5.10.15

yairindriyairnarā ye ca vikurvanti parastriyam |
indriyāṇi ca teṣāṃ vai vikurvanti tathaiva ca ||

5.10.16

paradārāṃśca paśyanti lubdhāḥ stabdhena cakṣuṣā |
sūcībhiścāgnivarṇābhisteṣāṃ netraprapūraṇam ||

5.10.17

kṣārādyaiśca kramātsarvā ihaiva yamayātanāḥ |
bhavanti muniśārdūla satyaṃ satyaṃ na saṃśayaḥ ||

5.10.18

devāgniguruviprebhyaścānivedya prabhuñjate |
lohakīlaśataistaptaistajjihvāsyaṃ ca pūryate ||

5.10.19

ye devārāmapuṣpāṇi lobhātsaṅgṛhya pāṇinā |
jighranti ca narā bhūyaḥ śirasā dhārayanti ca ||

5.10.20

āpūryate śirasteṣāṃ taptairlohasya śaṅkubhiḥ |
nāsikā cātibahulaistataḥ kṣārādibhirbhṛśam ||

5.10.21

ye nindanti mahātmānaṃ vācakaṃ dharmadeśikam |
devāgnigurubhaktāṃśca dharmaśāstraṃ ca śāśvatam ||

5.10.22

teṣāmurasi kaṇṭhe ca jihvāyāṃ dantasandhiṣu |
tālunyoṣṭhe nāsikāyāṃ mūrdhni sarvāṅgasandhiṣu ||

5.10.23

agnivarṇāstu taptāśca triśākhā lohaśaṅkavaḥ |
ākhidyante ca bahuśaḥ sthāneṣveteṣu mudgaraiḥ ||

5.10.24

tataḥ kṣāreṇa dīptena pūryate hi samantataḥ |
yātanāśca mahatyo vai śarīrasyāti sarvataḥ ||

5.10.25

aśeṣanarakeṣveva kramanti kramaśaḥ punaḥ |
ye gṛhṇanti paradravyaṃ padbhyāṃ vipraṃ spṛśanti ca ||

5.10.26

śivopakaraṇaṃ gāṃ ca jñānādilikhitaṃ ca yat |
hastapādādibhisteṣāmāpūryante samantataḥ ||

5.10.27

narakeṣu ca sarveṣu vicitrā bahuyātanāḥ |
bhavanti bahuśaḥ kaṣṭāḥ pāṇipādasamudbhavāḥ ||

5.10.28

śivāyatanaparyante devārāmeṣu kutracit |
samutsṛjanti ye pāpāḥ purīṣaṃ mūtrameva ca ||

5.10.29

teṣāṃ śiśnaṃ savṛṣaṇaṃ cūrṇyate lohamudgaraiḥ |
sūcībhiragnivarṇābhistathā tvāpūryate punaḥ ||

5.10.30

tataḥ kṣāreṇa mahatā tīvreṇa ca punaḥ punaḥ |
drutena pūryate gāḍhaṃ gude śiśne ca dehinaḥ ||

5.10.31

manaḥ sarvendriyāṇāṃ ca yasmādduḥkhaṃ prajāyate |
dhane satyapi ye dānaṃ na prayacchanti tṛṣṇayā ||

5.10.32

atithiṃ cāvamanyante kāle prāpte gṛhāśrame |
tasmātte duṣkṛtaṃ prāpya gacchanti niraye'śucau ||

5.10.33

ye'nnaṃ dattvā hi bhuñjanti na śvabhyaḥ saha vāyasaiḥ |
teṣāṃ ca vivṛtaṃ vaktraṃ kīlakadvayatāḍitam ||

5.10.34

kṛmibhiḥ prāṇibhiścograirlohatuṇḍaiśca vāyasaiḥ |
upadravairbahuvidhairugrairantaḥ prapīḍyate ||

5.10.35

śyāmaśca śabalaścaiva yamamārgānurodhakau |
yau stastābhyāṃ prayacchāmi tau gṛhṇītāmimaṃ balim ||

5.10.36

ye vā varuṇavāyavyā yāmyā nairṛtyavāyasāḥ |
vāyasāḥ puṇyakarmāṇaste pragṛhṇantu me balim ||

5.10.37

śivāmabhyarcya yatnena hutvāgnau vidhipūrvakam |
śaivairmantrairbaliṃ ye ca dadante na ca te yamam ||

5.10.38

paśyanti tridivaṃ yānti tasmāddadyāddinedine |
maṇḍalaṃ caturasraṃ tu kṛtvā gandhādivāsitam ||

5.10.39

dhanvantaryarthamīśānyāṃ prācyāmindrāya niḥkṣipet |
yāmyāṃ yamāya vāruṇyāṃ sudakṣomāya dakṣiṇe ||

5.10.40

pitṛbhyastu viniḥkṣipya prācyāmaryamaṇaṃ tataḥ |
dhātuścaiva vidhātuśca dvāradeśe viniḥkṣipet ||

5.10.41

śvabhyaśca śvapatibhyaśca vayobhyo vikṣipedbhuvi |
devaiḥ pitṛmanuṣyaiśca pretairbhūtaiḥ saguhyakaiḥ ||

5.10.42

vayobhiḥ kṛmikīṭaiśca gṛhasthaścopajīvyate |
svāhākāraḥ svadhākāro vaṣaṭkārastṛtīyakaḥ ||

5.10.43

hantakārastathaivānyo dhenvāḥ stanacatuṣṭayam |
svāhākāraṃ stanaṃ devāḥ svadhāṃ ca pitarastathā ||

5.10.44

vaṣaṭkāraṃ tathaivānye devā bhūteśvarāstathā |
hantakāraṃ manuṣyāśca pibanti satataṃ stanam ||

5.10.45

yastvetāṃ mānavo dhenuṃ śraddhayā hyanupūrvikām |
karoti satataṃ kāle sāgnitvāyopakalpyate ||

5.10.46

yastāṃ jahāti vāsvasthastāmisre sa tu majjati |
tasmāddattvā baliṃ tebhyo dvārasthaścintayetkṣaṇam ||

5.10.47

kṣudhārtamatithiṃ samyagekagrāmanivāsinam |
bhojayettaṃ śubhānnena yathāśaktyātmabhojanāt ||

5.10.48

atithiryasya bhagnāśo gṛhātpratinivartate |
sa tasmai duṣkṛtaṃ dattvā puṇyamādāya gacchati ||

5.10.49

tato'nnaṃ priyamevāśnannaraḥ śṛṅkhalavān punaḥ |
jihvāvegena viddho'tra ciraṃ kālaṃ sa tiṣṭhati ||

5.10.50

yatastammāṃsamuddhṛtya tilamātrapramāṇataḥ |
khādituṃ dīyate teṣāṃ bhittvā caiva tu śoṇitam ||

5.10.51

niḥśeṣataḥ kaśābhistu pīḍyate kramaśaḥ punaḥ |
bubhukṣayātikaṣṭaṃ hi tathācātipipāsayā ||

5.10.52

evamādyā mahāghorāḥ yātanāḥ pāpakarmaṇām |
ante yatpratipannaṃ hi tatsaṅkṣepeṇa saṃśṛṇu ||

5.10.53

yaḥ karoti mahāpāpaṃ dharmaṃ carati vai laghu |
dharmaṃ gurutaraṃ vāpi tathāvasthe tayoḥ śṛṇu ||

5.10.54

sukṛtasya phalaṃ noktaṃ gurupāpaprabhāvataḥ |
na minoti sukhaṃ tatra bhogairbahubhiranvitaḥ ||

5.10.55

tathodvigno'tisantapto na bhakṣyairmanyate sukham |
abhāvādagrato'nyasya pratikalyaṃ dine dine ||

5.10.56

pumānyo gurudharmāpi sopavāso yathā gṛhī |
vittavānna vijānāti pīḍāṃ niyamasaṃsthitaḥ ||

5.10.57

tāni pāpāni ghorāṇi santi yaiśca naro bhuvi |
śatadhā bhedamāpnoti girirvajrahato yathā ||

5.10.57.c1

iti śrīśivamahāpurāṇe pañcamyāmumāsaṃhitāyāṃ narakagatibhogavarṇanaṃ nāma daśamo'dhyāyaḥ ||

5.10.57.p2

śrīgaṇeśāya namaḥ ||

5.10.57.p3

śrīgaurīśaṅkarābhyāṃ namaḥ ||

5.10.57.p4

śrīśivamahāpurāṇam ||

Linked texts (5)