Shivattvaratnakara 9.71

9.71

ye śivārāmapuṣpāṇi lobhātsaṃgṛhya pāṇinā
jighranti mūḍhamanaso śirasā dhārayanti vā
1) āropyate śirasteṣāṃ sutaptairlohaśaṃkubhiḥ
tataḥkṣāreṇa dīptena tailatāmrādibhiḥ kramāt
śarīre ca mahāghorāścitrā narakayātanāḥ
bahudhotpāṭyate jihvā ye'satyāpriyavādinaḥ
saṃdaṃśena sutaptena prapīḍyorasi pādataḥ
mithyāgamapravaktuśca jihvācāsya vinirgatā
krośārdhajihvā vistīrṇairhalaistīkṣṇaiḥ prapācyate
nirbhartsayanti ye krūrā mātaraṃ pitaraṃ gurum
teṣāṃ vajrajalakābhirmukhamādaśyate yataḥ
tataḥkṣāreṇa tāmreṇa trapuṇā sicyate punaḥ
drutairāpūryate'tyarthaṃ taptalohaiśca tanmukham
itastataḥ punardhāvan badhyate yamakiṃkaraiḥ
ye nindanti mahātmānamācāryaṃ dharmadeśikam
śivabhaktāṃśca saṃmūḍhāḥ śivadharmaṃ ca śāśvatam
teṣāmurasi kaṇṭhe ca jihvāyāṃ dantasaṃdhiṣu
tālunyoṣṭhe ca nāsāyāṃ mūrdhni sarvāṃgasaṃdhiṣu
agnivarṇāssutaptāśca triśikhā lohaśaṃkavaḥ
āropyante subahuśaḥ sthāneṣveteṣu mudgaraiḥ
tataḥ 2) kṣāreṇa taptena tāmreṇa trapuṇā punaḥ
taptalohādibhissarvai rāpūryante samantataḥ
yātanāśca mahācitrāḥ śarīrasyāpi sarvataḥ
niśeṣanarakeṣvevaṃ bhramanti kramaśaḥ punaḥ
ye gṛhṇanti paradravyaṃ padbhyāṃ vipraṃ spṛśanti ca
śivopakaraṇāṃgaṃ ca jñānaṃ ca likhitaṃ kvacit
hastapādaghanaisteṣāmāpūryante samantataḥ
kṣāra tāmrādibhirdīptairdahyante kramaśaḥ punaḥ
narakeṣu ca sarveṣu vicitrā dehayātanāḥ
bhavanti bahuśaḥ kaṣṭāḥ pāṇipādasamudbhavāḥ
ye śivāyatanārāmavāpīkūpamaṭhāṃgaṇam
upadravanti pāpiṣṭhā nṛpāstatra vasanti hi