Pramāṇa · Search · About · API

Shivapurana 5.9: navamo'dhyāyaḥ | narakagativarṇanam

Śivapurāṇa (complete text) 5.9

Language
Sanskrit

Contents

navamo'dhyāyaḥ | narakagativarṇanam

5.9.1

sanatkumāra uvāca |
eṣu pāpāḥ prapacyante śoṣyante narakāgniṣu |
yātanābhirvicitrābhirāsvakarmakṣayād bhṛśam ||

5.9.2

svamalaprakṣayādyadvadagnau dhāsyanti dhātavaḥ |
tatra pāpakṣayātpāpā narāḥ karmānurūpataḥ ||

5.9.3

sugāḍhaṃ hastayorbaddhvā tataḥ śṛṅkhalayā narāḥ |
mahāvṛkṣāgraśākhāsu lambyante yamakiṅkaraiḥ ||

5.9.4

tataste sarvayatnena kṣiptā dolanti kiṅkaraiḥ |
domyantaścātivegena visaṃjñā yānti yojanam ||

5.9.5

antarikṣasthitānāṃ ca lohabhāraśataṃ punaḥ |
pādayorbadhyate teṣāṃ yamadūtairmahābalaiḥ ||

5.9.6

tena bhāreṇa mahatā prabhṛśaṃ tāḍitā narāḥ |
dhyāyanti svāni karmāṇi tūṣṇīṃ tiṣṭhanti niścalāḥ ||

5.9.7

tato'ṅkuśairagnivarṇairlohadaṇḍaiśca dāruṇaiḥ |
hanyante kiṅkaraighoraiḥ samantātpāpakarmiṇaḥ ||

5.9.8

tataḥ kṣāreṇa dīptena vahnerapi viśeṣataḥ |
samantataḥ pralipyante tīvreṇa tu punaḥ punaḥ ||

5.9.9

drutenātyantaliptena kṛttāṅgā jarjarīkṛtāḥ |
punarvidārya cāṅgāni śirasaḥ prabhṛti kramāt ||

5.9.10

vṛntākavatprapacyante taptalohakaṭāhakaiḥ |
viṣṭhāpūrṇe tathā kūpe kṛmīṇāṃ nicaye punaḥ ||

5.9.11

medo'sṛkpūyapūrṇāyāṃ vāpyāṃ kṣipyanti te punaḥ |
bhakṣyante kṛmibhistīkṣṇairlohatuṇḍaiśca vāyasaiḥ ||

5.9.12

śvabhirdeṃśairvṛkairvyāghrai raudraiśca vikṛtānanaiḥ |
pacyante matsyavaccāpi pradīptāṅgārarāśiṣu ||

5.9.13

bhinnāḥ śūlaiḥ sutīkṣṇaiśca narāḥ pāpena karmaṇā |
tailayantreṣu cākramya ghoraiḥ karmabhirātmanaḥ ||

5.9.14

tilā iva prapīḍyante cakrākhye janapiṇḍakāḥ |
bhrajyante cātape taptalohabhāṇḍeṣvanekadhā ||

5.9.15

tailapūrṇakaṭāheṣu sutapteṣu punaḥpunaḥ |
bahudhā pacyate jihvā prapīḍyorasi pādayoḥ ||

5.9.16

yātanāśca mahatyo'tra śarīrasyāti sarvataḥ |
niḥśeṣanarakeṣvevaṃ kramanti kramaśo narāḥ ||

5.9.17

narakeṣu ca sarveṣu vicitrā yamayātanāḥ |
yāmyaiśca dīyate vyāsa sarvāṅgeṣu sukaṣṭadāḥ ||

5.9.18

jvaladaṅgāramādāya mukhamāpūrya tāḍyate |
tataḥ kṣāreṇa dīptena tāmreṇa ca punaḥpunaḥ ||

5.9.19

ghṛtenātyantataptena tadā tailena tanmukham |
itastataḥ pīḍayitvā bhṛśamāpūrya hanyate ||

5.9.20

viṣṭhābhiḥ kṛmibhiścāpi pūryamāṇāḥ kvacit kvacit |
pariṣvajanti cātyugrāṃ pradīptāṃ lohaśālmalīm ||

5.9.21

hanyante pṛṣṭhadeśe ca punardīptairmahāghanaiḥ |
dantureṇādikuṇṭhena krakacena balīsayā ||

5.9.22

śiraḥprabhṛti pīḍyante ghoraiḥ karmabhirātmajaiḥ |
khādyante ca svamāṃsāni pīyate śoṇitaṃ svakam ||

5.9.23

annaṃ pānaṃ na dattaṃ yaiḥ sarvadā svātmapoṣakaiḥ |
ikṣuvatte prapīḍyante jarjarīkṛtya mudgaraiḥ ||

5.9.24

asitālavane ghore chidyante khaṇḍaśastataḥ |
sūcībhirbhinnasarvāṅgāḥ taptaśūlāgraropitāḥ ||

5.9.25

sañcālyamānā bahuśaḥ kliśyante na mriyanti ca |
tathā ca taccharīrāṇi sukhaduḥkhasahāni ca ||

5.9.26

dehādutpāṭya māṃsāni bhidyante svaiśca mudgaraiḥ |
danturākṛtibhirghorairyamadūtairbalotkaṭaiḥ ||

5.9.27

nirucchvāse nirucchvāsāstiṣṭhanti narake ciram |
uttāḍyante tathocchvāse vālukāsadane narāḥ ||

5.9.28

raurave rodamānāśca pīḍyante vividhairvadhaiḥ |
mahārauravapīḍābhirmahānto'pi rudanti ca ||

5.9.29

patsu vaktre gude muṇḍe netrayoścaiva mastake |
nihanyante ghanaistīkṣṇaiḥ sutaptairlohaśaṅkubhiḥ ||

5.9.30

sutaptavālukāyāṃ tu prayojyante muhurmuhuḥ |
jantupaṅke bhṛśaṃ tapte kṣiptāḥ krandanti visvaram ||

5.9.31

kumbhīpākeṣu pacyante taptataileṣu vai mune |
pāpinaḥ krūrakarmāṇo'sahyeṣu sarvathā punaḥ ||

5.9.32

lālābhakṣeṣu pāpāste pātyante duḥkhadeṣu vai |
nānāsthāneṣu ca tathā narakeṣu punaḥpunaḥ ||

5.9.33

sūcīmukhe mahākleśe narake pātyate naraḥ |
pāpī puṇyavihīnaśca tāḍyate yamakiṅkaraiḥ ||

5.9.34

lohakumbhe viniḥkṣiptāḥ śvasantaśca śanaiḥ śanaiḥ |
mahāgninā prapacyante svapāpaireva mānavāḥ ||

5.9.35

dṛḍhaṃ rajjvādibhirbaddhvā prapīḍyante śilāsu ca |
kṣipyante cāndhakūpeṣu daśyante bhramarairbhṛśam ||

5.9.36

kṛmibhirbhinnasarvāṅgāḥ śataśo jarjarīkṛtāḥ |
sutīkṣṇakṣārakūpeṣu kṣipyante tadanantaram ||

5.9.37

mahājvāle'tra narake pāpāḥ krandanti duḥkhitāḥ |
itaścetaśca dhāvanti dahyamānāstadarciṣā ||

5.9.38

pṛṣṭhe cānīya tuṇḍābhyāṃ vinyastaskandhayojite |
tayormadhyena vākṛṣya bāhupṛṣṭhena gāḍhataḥ ||

5.9.39

baddhāḥ parasparaṃ sarve subhṛśaṃ pāśarajjubhiḥ |
baddhapiṇḍāstu dṛśyante mahājvāle tu yātanāḥ ||

5.9.40

rajjubhirveṣṭitāścaiva praliptāḥ kardamena ca |
karīṣatuṣavahnau ca pacyante na mriyanti ca ||

5.9.41

sutīkṣṇacaritāste hi karkaśāsu śilāsu ca |
āsphālya śataśaḥ pāpāḥ pacyante tṛṇavattataḥ ||

5.9.42

śarīrābhyantaragataiḥ prabhūtaiḥ kṛmibhirnarāḥ |
bhakṣyante tīkṣṇavadanairātmadehakṣayād bhṛśam ||

5.9.43

kṛmīṇāṃ nicaye kṣiptāḥ pūyamāṃsāsthirāśiṣu |
tiṣṭhantyudvignahṛdayāḥ parvatābhyāṃ nipīḍitāḥ ||

5.9.44

taptena vajralepena śarīramanulipyate |
adhomukhordhvapādaśca tātapyante sma vahninā ||

5.9.45

vadanāntaḥpravinyastāṃ suprataptāmayogadām |
te khādanti parādhīnāstaistāḍyante ca mudgaraiḥ ||

5.9.46

itthaṃ vyāsa kukarmāṇo narakeṣu pacanti hi |
varṇayāmi vivarṇatvaṃ teṣāṃ tattvāya karmiṇām ||

5.9.46.c1

iti śrīśivamahāpurāṇe pañcamyāmumāsaṃhitāyāṃ sāmānyato narakagativarṇanaṃ nāma navamo'dhyāyaḥ ||

5.9.46.p2

śrīgaṇeśāya namaḥ ||

5.9.46.p3

śrīgaurīśaṅkarābhyāṃ namaḥ ||

5.9.46.p4

śrīśivamahāpurāṇam ||

Linked texts (6)