Shivattvaratnakara 9.40

9.40

viṣṭhāpūrṇe tathākūpe kṛmīṇāṃ nicaye punaḥ
medosṛkpūyapūrṇāyāṃ vāpyāṃ kṣipyanti te punaḥ
bhakṣyante kṛmibhistīvraiḥ lohatuṇḍaiśca vāyasaiḥ
śvabhirdaṃśairvṛkairugrairvyāghraiśca vikṛtairnaraiḥ
pacyante matsyavadvāpi pradīptāṃgārarāśiṣu
protāstīkṣṇeṣu śūleṣu narāḥ pāpena karmaṇā
śailapīṭhairathākramya ghoraiḥ karmabhirātmajaiḥ
tilavatsaṃprapīḍyante cakrākhye narake narāḥ
pacyante cātitapteṣu lohabhāṇḍeṣvanekadhā
tailapūrṇakaṭāheṣu sutapteṣu punaḥ punaḥ
sarvendriyāṇi samadhya kramātpāpena yātanāḥ
bhavanti ghorāḥ pratyekaṃ śarīre tatkṛtena ca
ye śṛṇvanti gurornindāṃ teṣāṃ karṇaḥ prapūryate
agnivarṇairayaḥkīlaistaptaistāmrādikadbhutaiḥ
trapusīsārakūṭādyaiḥ kṣāreṇa jatunā punaḥ
sutaptatīkṣṇatailena vajralepena cāntataḥ
kramādāpūryate karṇau narakeṣu ca yātanāḥ
anukrameṇa sarveṣu bhramantyeteṣu yātanāḥ
paradārāṃśca paśyanti lubdhāssnigdhena cakṣuṣā
guroḥ kurvanti bhrukuṭiṃ krūranetrāśca ye narāḥ
sūcībhiragnivarṇābhisteṣāṃ cakṣuḥ 1)pravidhyate
kṣārādyaiśca kramātsarverdehe sarvāśca yātanāḥ
sparśalobhena ye mūḍhā saṃspṛśanti parastriyaḥ
teṣāṃ taptāgnivarṇābhi ssūcībhirvidhyate karaḥ
tataḥ kṣārādikaissarvaṃ śarīramanulipyate
yātanāśca mahākaṣṭāssarveṣu narakeṣu ca
pariṣvajanti cātyugraṃ pradīptaṃ lohaśālmalim
hanyante pṛṣṭhadeśeṣu punarbhīmairmahābalaiḥ
dantureṇātikuṇṭhena krakacena balīyasā
śiraḥprabhṛti pāṭyante ghoraiḥ karmabhirātmajaiḥ
tena tenaivarūpeṇa hanyante pāradārikāḥ
gāḍhamāliṃgyate nārī jvalantī lohanirmitā