Pramāṇa · Search · About · API

Halasyakhanda 2

Hālāsyakhaṇḍa 2

Language
Sanskrit

Contents

2.1

prathamo'dhyāyaḥśrīkailāsa iti khyātaḥ śrīmatāṃ bhūbhṛtāṃ varaḥ
śrīpatipramukhairlekhaiḥ śriyai muktyai ca sevitaḥ

2.2

śrīdādīnāmapi śrīdaḥ śrīkaṇṭhaprathamālayaḥ
śriyo'pi hetoḥ kṣīrābdheḥ śriyaṃ jitvā samunnataḥ

2.3

janānāṃ śravaṇādeva janmamṛtyubhayāpahaḥ
sarvatīrthasamāyuktaḥ sarvadevanamaskṛtaḥ

2.4

smaraṇaṃ kīrtanaṃ vāpi kurvatāṃ sarvasiddhidaḥ
tapobalena mahatā paśyatāmapavargadaḥ

2.5

vividhairbhūtasaṅghātaiḥ paritaḥ parirakṣitaḥ
vibudhairapyagamyassan viśvabharturvinā''jñayā

2.6

viṣṭapatrayavikhyāto vidhumaṇḍalapāṇḍaraḥ
vidyate bhuvi diśyaiśyāṃ vidvajjanamanassvapi

2.7

tasya madhye mahāmerormadhye śṛṅgaṃ mahattaram
praśastamasti śikharaṃ mahomaṇḍalamaṇḍitam

2.8

tadūrdhve pāvane'tyarthaṃ darpaṇodaravatsamam
vyomavadvimalībhūtaṃ viśālaṃ bhavati sthalam

2.9

tapo'ntarāyaiḥ kāmādyairaparaiḥ paripanthibhiḥ
ajeyaṃ tatsthalaṃ bhāti munīndrāṇāṃ mano yathā

2.10

kānanaiḥ kalpavṛkṣāṇāṃ phalapuṣpasamanvitaiḥ
cintāmaṇimayaiśśailaiḥ kāmadhenuvrajairapi

2.11

payodadhighṛtakṣaudrasudhāmayasaridvāraiḥ
nānāratnavicitraiśca kuṭṭimairatimañjulaiḥ

2.12

pramathānāṃ mandiraiśca meroḥ śikharasannibhaiḥ
sūryakoṭipratīkāśaiścandrakoṭisamaprabhaiḥ

2.13

vimānairaticitraiśca divyastrībhissuśobhitaiḥ
rājite tatra śikhare rājate rājate mahān

2.14

prāsādastejasāṃ rāśirdurnirīkṣyaḥ pinākinaḥ
ratnapradīpavalayairatitejassamanvitaiḥ

2.15

prāsādasyāntare tasya caturdvārisuśobhite
navaratnamayaṃ pīṭhaṃ navaśaktidhruvaṃ mahat

2.16

tanmadhye rājate liṅgaṃ śivasya paramātmanaḥ
śrīkaṇṭhaparameśākhyaṃ liṅgamasti cirantanam

2.17

samakāloditānantaśubhrāṃśunibhayā''bhayā
svayaṃbhūtaṃ ca talliṅgaṃ pīṭhikopari maṇḍitam

2.18

parāśaktimayaṃ taddhi paraciddhanarūpakam

2.19

pradhānabhūtā devānāṃ brahmaviṣṇubiḍaujasaḥ
anye devāśca daityāśca yakṣāḥ kimpuruṣā api

2.20

vidyādharāśca siddhāśca gandharvāḥ kinnarā api
munīśvarāśca yogīndrā guhyakādyā anekaśaḥ

2.21

padāptaye'rcayantīheaderśaṃ mokṣāya ca yuge yuge
arcayantyātmalābhāya bhogāya ca nirantaram

2.22

sthāvareṇa svaliṅgena mūrtyā jaṅgamayā svayā
bhaktānīśo'nugṛhṇāti janān kailāsaparvate

2.23

karmabhūmau viśeṣeṣu sthāneṣvapi nageṣu ca
sthāvareṇa svaliṅgena mūrtyā tādṛśayā'pi ca

2.24

pañcaviṃśatisaṅkhyākā mūrtayaḥ santi ceśituḥ
kailāsasthalamukhyeṣu lokānugrahahetave

2.25

pūjayantīha ye liṅgaṃ śāmbhavaṃ śaktitassakṛt
sthaleṣu mūrtima Bruno mukhyeṣu bhaktyā cāmbikayā saha

2.26

te'dhiruhya vimānāni divyastrīśobhitāni ca
anubhūya sadā bhogānamarāṇāṃ ca durlabhān

2.27

kailāse śaṅkarāvāse vasanti cirabhoginaḥ
śrīkaṇṭhaparameśākhyajyotirliṅgasya sannidhau

2.28

koṭiyojanavistāre ratnastambhavirājite
agre cāpi caturdikṣu vṛṣabhena virājitam

2.29

kiṅkiṇīdāmasaṃvītaṃ kiṅkiṇīravaśobhitam
śivavannirmalataramasti tīrthaṃ mahattarām

2.30

śivāni dātuṃ śaktatvād varatvātpāvanatvataḥ
śivatīrthamiti prāhussamastavibudhottamāḥ

2.31

tattīre tapasā kḷpte maṇṭape viśvakarmaṇā
sahasrastambhasaṃyukte candrakāntaśilāmaye

2.32

siṃhāsanaṃ bhāti tatra navaratnavicitritam
dhanuḥ khaṇḍa ivendrasya candrikādhavalāṃbaraḥ

2.33

kambale gurupīṭhārhe vistṛtavyāghracarmaṇi
upaviṣṭaṃ sūtamuniṃ śivadhyānaparāyaṇam

2.34

bhasmarudrākṣamālābhiralaṅkatakalebaram
suprasannamukhāmbhojaṃ sarvaśāstraviśāradam

2.35

vyāsaśiṣyaṃ mahāprājñaṃ paurāṇikaśikhāmaṇim
sarvavedārthavijñānasuniścitamahārthakam

2.36

āgatāssevituṃ bhaktyā ṛṣayassaṃśitavratāḥ
mukhyasthalāni khyātāni praṣṭuṃ bhūmau viśeṣataḥ

2.37

śambhubhaktaśśatānandaḥ sadānandaḥ prabhākaraḥ
ugravīryo mahāvīryo mahākāyo mahodaraḥ

2.38

mahāyogī jitakrodhaḥ kaivalyapriya uttamaḥ
devaniṣṭho yajñaniṣṭhastaponiṣṭho mahāvratī

2.39

devabhaktaśśivānandaḥ śivadhyānaparāyaṇaḥ
jalāśī jīrṇaparṇāśī vāyubhakṣaḥ kalānidhiḥ

2.40

ityādyā yoginassarve śivabhaktyā pracoditāḥ
aṣṭau sahasrasaṃkhyātāḥ sadāśivakathotsukāḥ

2.41

samāgamya samādhisthaṃ sūtamagnisamudbhavam
jayetyuktvā daṇḍavacca praṇamya ca punaḥ punaḥ

2.42

tatpādapaṅkajaṃ bhaktyā paṅkajaiḥ paripūjya ca
stotraiḥ stutvā mahātmānaṃ papracchuḥ parayā mudā

2.43

ṛṣayaḥ -
vahnikuṇḍasamudbhūta bhagavan bhaktavatsala
samastaśivadharmajña sarvavedāntapāraga

2.44

śivakṣetrāṇi sarvāṇi bhuktimuktipradāni ca
merumandarakailāsaśrīparvatamukhāni ca

2.45

saṃkṣepato vistarato bhavatā kathitāni ca
tattatkṣetrasya māhātmyamapi tatreśavaibhavam

2.46

teṣu mukhyāni coktāni kāśyādīni sthalāni ca
teṣu mukhyatamaṃ kṣetramapyuktaṃ pārvatīdhituḥ

2.47

alpabuddhibhirasmābhistāni nāvadhṛtāni ca
uttamakṣetramāhātmyamapi tadvismṛtaṃ prabho

2.48

tasmādviśiṣṭaṃ sarveṣāṃ sthānānāṃ yanmahattaram
cirantanañca tatkṣetraṃ prītidaṃ pārvatīdhayoḥ

2.49

śambhunā'dhiṣṭhitaṃ nityaṃ tadekaṃ vaktumarhasi
iti pṛṣṭo munivaraissūtaḥ kāruṇyavigrahaḥ

2.50

vaktumārabhate teṣāmuttaraṃ jñānasiddhaye
sarvajñaṃ sāmbamīśānaṃ devadevaṃ jagadgurum

2.51

śrīmantaṃ dakṣiṇāmūrtiṃ trinetraṃ candraśekharam
vyāghracarmaparītāṅgaṃ śuddhasphaṭikanirmalam

2.52

vidyāmudrāñca vahniśca hyabhayañca bhujairdhṛtam
vīrāsane samāsīnaṃ vyāghracarmāvṛte śivam

2.53

sarvābharaṇabhūṣāḍhyaṃ sarpabhūṣaṇabhūṣitam
sanakādimunīndrāṇāṃ jñānadaṃ deśikottamam

2.54

yogibhissanakādyaiśca sevitaṃ gaṇapuṅgavaiḥ
dhyātvā tatpādayugmañca viṣṇvādyairhṛdi bhāvitam

2.55

smṛtvā kṣetrottamaṃ śambhorvaktumārabhate mudā
śrīsūtaḥśṛṇudhvamṛṣayassarve śivabhaktiparāyaṇāḥ

2.56

viśiṣṭatamamekaṃ yat sthānaṃ kailāsavāsinaḥ
sarvasaubhāgyadaṃ sadyaścaturvargaphalapradam

2.57

brahmaviṣṇumahendrādyaiḥ sevitaṃ svapadāptaye
purā''nandavane kumbhasambhavena maharṣiṇā

2.58

proktaṃ tadvistareṇaiva vasiṣṭhādimahātmanām
skandena ca purā proktaṃ tasmai proktaṃ pinākinā

2.59

īśasya ca kumārasya bhedo naiva ṛtaṃ dvijāḥ
tacchrutvā guruṇā cāpi mama vyāsena ceritam

2.60

purāṇasaṃhitāyāśca viśiṣṭaṃ sthalamīritam
vakṣye purāṇaṃ tatpuṇyaṃ śrīmaddhālāsyasaṃjñitam

2.61

śravaṇādeva pāpaghnaṃ vedāntārtha prakāśakam
vedādiṣu nigūḍhārthaḥ purāṇeṣu pradarśitaḥ

2.62

tasmātsarvapurāṇeṣu hālāsyaṃ pratipāditam
tathāpi tasya māhātmyaṃ skānde tu bahu dṛśyate

2.63

skāndamadya pravakṣyāmi purāṇaṃ śrutisārajam
ṣaḍvidhaṃ saṃhitātaidaiḥ pañcāśatkhaṇḍamaṇḍitam

2.64

ādyā sanatkumāroktā dvitīyā sūtasaṃhitā
tṛtīyā śāṅkarī proktā caturthī vaiṣṇavī matā

2.65

pañcamī saṃhitā brāhmī ṣaṣṭhī sā saurasaṃhitā
tṛtīyā śāṅkarī yā tu saṃhitā saṃprakīrtitā

2.66

sā caturvedasārā'dau śrutā gauryā hi śaṅkarāt
gauryaṅkavāsī skando'pi saṃhitāṃ tāṃ samagrahīt

2.67

sa cāvadat svaśiṣyāya tāmagastyāya pṛcchate
tathā''nandavane tena munīnāndīrghadarśinām

2.68

proktā sā pṛcchatāṃ prītyā vasiṣṭhādimahātmanām
agastyasaṃhitetyāsīttannāmnā sātha saṃhitā

2.69

sarvān kāmān sā dadāti kāmadhenuriva śrutā
tāmadya vakṣye yuṣmākaṃ lokānāñca hitāya ca

2.70

purā purātane puṇye purārāteḥ pure śubhe
vārāṇasīti prathite sarveṣāṃ muktisiddhide

2.71

bhāgīrathīpayaḥpūrapāvanīkṛtabhūtale
viśālākṣīviśvanāthasānnidhyātsarvasiddhide

2.72

śivaliṅgapratiṣṭhāñca kartumuttamamadhvaram
satyalokātsamāgamya brahmā lokapitāmahaḥ

2.73

pitāmaheśvaraṃ liṅgaṃ pratiṣṭhāpya svanāmataḥ
akarodaśvamedhānāṃ daśakaṃ tasya sannidhau

2.74

tadānīṃ naimiśāraṇyapramukhakṣetravāsinaḥ
āyayurmunayaḥ sarve yajñavidyāviśāradāḥ

2.75

vasiṣṭhavāmadevādyā mahātmānaścirantanāḥ
tasyartvijassamabhavan prārthitāḥ padmayoninā

2.76

nirvṛtte'vabhṛthasnāne pitāmahamahākratoḥ
satkṛtāśca yathānyāyaṃ divyai ratnaiśca kāñcanaiḥ

2.77

vāsobhirbhūṣaṇairanyairmahādānaiśca vedhasā
te sarve paramāṃ tuṣṭiṃ samprāpurmunipuṅgavāḥ

2.78

vidheranujñayā paścāttīrtheṣu snātumudyatāḥ
deśakālaviśeṣajñā vasiṣṭhādyā munīśvarāḥ

2.79

vasiṣṭho vāmadevaśca gautamo varuṇo bhṛguḥ
bodhāyanaḥ kāśyapaśca yājñavalkyaḥ parāśaraḥ

2.80

bharadvājo'ṅgirā atriḥ kutsaśśaktiḥ śuko mahān
vedavyāsaḥ kaholaśca vālmīkiḥ kumbhasambhavaḥ

2.81

sanatkumāraḥ sanakaḥ sanātanasanandanau
pulastyaḥ pulaho gargo viśvāmitraśca nāradaḥ

2.82

ityādyā munayassarve jñānino brahmavittamāḥ
snātvā sarveṣu tīrtheṣu jñānavāpyādikeṣu ca

2.83

natvā vināyakān sarvān ḍuṇḍyādīn bhaktitaḥ kramāt
viśālākṣyādidevīśca bhaktyā sarvāḥ praṇamya ca

2.84

saṃpūjya kālarājañca bhairavaṃ kālabhakṣaṇam
daṇḍanāyakamukhyāṃśca gaṇāṃstutvā viśeṣataḥ

2.85

ādikeśavamukhyāṃśca keśavān paritoṣya ca
lokādityādisūryāṃśca praṇipatya punaḥ punaḥ

2.86

kṛtvā piṇḍapradānāni sarvatīrtheṣvatandritāḥ
oṃkāreśvaramukhyāni dṛṣṭvā liṅgavarāṇi ca

2.87

mahāpūjopahāraiśca tāni sampūjya bhaktitaḥ
sahasrabhojanādyaiśca yatīnviprān pratarpya ca

2.88

punarmunīśvarāssarve dṛṣṭvā tu maṇikarṇikām
tyajanti tāpatritayaṃ janmajanmāntarārjitam

2.89

snātvā'tha vidhinā sarve kṛtamādhyāhnikakriyāḥ
santarpya devamukhyāṃśca kuśākṣatatilodakaiḥ

2.90

ratnairhiraṇyairvāsobhirdivyairābharaṇairapi
gandhādyairupacāraiśca viśvanāthaṃ prapūjya ca

2.91

stotraiḥ stutvā mahādevaṃ praṇipatya punaḥ punaḥ
muktamaṇḍapamāsādya babhūvurvigataśramāḥ

2.92

tatastu merupāśrvasthāḥ kecidvṛddhāstapodhanāḥ
śivabhaktā mahotsāhāśśāntāssatyaparāyaṇāḥ

2.93

viṣṇuvṛddhādayassarve sambhūya munipuṅgavāḥ
āyātāḥ svadhunīsnānaṃ kartuṃ viśveśadarśanam

2.94

tāndṛṣṭvā vismitāssarve vasiṣṭhādyā munīśvarāḥ
āhūya ca muniśreṣṭhānaṅgīkṛtyāsanādinā

2.95

pralipya gandhapaṅkaiśca śaityapānīyapānataḥ
gataśramān samanvīkṣya papracchuśśraddhayā saha

2.96

kutaḥ kimarthaṃ yuṣmābhiḥ prāptamānandakānanam
iti pṛṣṭāstu te sarve pratyūcurvinayānvitāḥ

2.97

ṛṣayaḥmunīśvarā vayaṃ sarve merorāsannadeśataḥ
śrīmadbrahmapurātprāptā brahmaṇā tu purā kṛtāt

2.98

padavākya pramāṇajñaiḥ purāṇajñaiḥ purātanaiḥ
ānandavanamāhātmyaṃ śrutvā vācāmagocaram

2.99

puṇyakṣetreṣu sarveṣu paramānandakānanam
puṇyatīrtheṣu sarveṣu viśiṣṭā maṇikarṇikā

2.100

sarveṣu śivaliṅgeṣu śrīviśveśo mahānidhiḥ
sarveṣu puṇyakāleṣu śreṣṭhaḥ sūryendusaṅgamaḥ

2.101

sandhyāmaṭheṣu sarveṣu sarvadevālayeṣvapi
asmaddeśe purāṇajñā vadantyevaṃ bahuśrutāḥ

2.102

āṣāḍhamāsyamāvāsyā somavāreṇa saṃyutā
āgamiṣyati tatkāle śrīmatī maṇikarṇikā

2.103

udagvāhā viśvanāthasannidhau kūrmapṛṣṭhagā
snānamātreṇa pāpaghnī kaivalyañca prayacchati

2.104

bhagavānviśvanātho'pi viśālākṣyā samanvitaḥ
brahmaviṣṇumahendrādyaiḥ kumārābhyāṃ gaṇeśvaraiḥ

2.105

dvitīyamiva kailāsamāruhya vṛṣavāhanam
pratyakṣībhūya dayayā bhuktimuktī prayacchati

2.106

iti ca śrutamasmābhiḥ śivatīrthādyatīśvarāt
śanitrayodaśī cādya paraśvassomavāsare

2.107

darśe prāpte mahāpuṇye kiñcidabhyudite ravau
yūyaṃ sarve sahāsmābhiḥ snātumarhatha tatra tu

2.108

iti teṣāṃ vacaśśrutvā vasiṣṭhādimunīśvarāḥ
mahatyā śraddhayā yuktāḥ procuścaivaṃ parasparam

2.109

vyaktīkartuṃ deśakālatīrthaliṅgaviśeṣakam
pavitrīkartumasmāṃśca mahātmānassamāgatāḥ

2.110

vasiṣṭhastu tataḥ prāha vilokya muvisattamān
etairmunīśvaraiḥ proktaṃ vacastathyaṃ na saṃśayaḥ

2.111

sarveṣu vratabṛndeṣu śāstroktaṃ vratamuttamam
śāstrokteṣu ca sarveṣu śivavratamanuttamam

2.112

śivavrateṣu sarveṣu somavāravrataṃ mahat
somavārādapi varā śivarātrirmunīśvarāḥ

2.113

trikoṭiśivarātraistu tulyā'mā somavāragā
tatrāpyāṣāḍhamāsastho darśaḥ puṇyo viśeṣataḥ

2.114

tasmādavaśyaṃ sānnidhyaṃ śambhoramitatejasaḥ
bhaviṣyati na sandehaḥ kṛtārthāśca vayaṃ dhruvam

2.115

bhaviṣyāmaḥ prasādena śivasya paramātmanaḥ
madhye yogīśvarāṇāṃ tu śivatīrtho mahattaraha

2.116

trikālajñasya tasyāpi vacanaṃ tathyameva hi
ityuktvā muniśārdūlo vasiṣṭhaḥ karuṇākaraḥ

2.117

āgatānviṣṇuvṛddhādīnabhyaṅgasnānapūrvakam
annaiśca ṣaḍrasairyuktaiḥ śarkarāghṛtapāyasaiḥ

2.118

tāmbūlaiśca suvastraiśca santoṣya munipuṅgavān
pratīkṣya tatpuṇyakālamāste sarvairmunīśvaraiḥ

2.119

athāgate puṇyakāle sakalāśca munīśvarāḥ
vasiṣṭhaviṣṇuvṛddhādyāḥ saṃprāpya maṇikarṇikām

2.120

aghamarṣaṇamantraistu śivaṃ dhyātvā śivāmapi
nirvartya vidhinā snānaṃ nityakṛtyaṃ vidhāya ca

2.121

śrīmato viśvanāthasya sannidhiṃ prāpya bhaktitaḥ
nyāyena śāstreṇoktena pañcaśuddhimakurvata

2.122

jyotirmayaṃ mahāliṅgaṃ pañcagavyapurassaraiḥ

2.123

pañcāmṛtaiśca ratnodaiḥ puṣpodairgandhatoyakaiḥ
sthāpitaiḥ svarṇakalaśaiḥ svardhunījalapūritaiḥ

2.124

aṣṭottarasahasraiśca kūrcavastrādisaṃyutaiḥ
snapanoktavidhānena kṣīrādidravyasaṃyutaiḥ

2.125

abhiṣicya daśaikañca vāraṃ pūjāntarāntaram
saṃmṛjya śubhravastreṇa mahāliṅgaṃ sapīṭhakam

2.126

divyagandhena cālipya puṣpairnīlotpalādibhiḥ
dhūpairdīpairanekaiśca naivedyaiśca mahattaraiḥ

2.127

nīrājanairvicitraiśca saṃpūjya parameśvaram
vibhajya pañcavaktraiśca pūjayitvā pinākinam

2.128

śrīmatpañcākṣaraṃ mantraṃ satāraṃ sarvasiddhidam
sarvamantravaraṃ nityaṃ śatarudrīyamadhyagam

2.129

acirātsarvapāpaghnaṃ bhogadaṃ bhogakāminām
mumukṣūṇāṃ muktidañca japitvā tu sahasrakam

2.130

sāntaṃ yāntaṃ triruccārya (haraharahara) praṇavena ṣaḍakṣaram
japitvā sakalīkṛtya sāmbaṃ dhyātvā sadāśivam

2.131

tāraṃ mahāmanuryatra viyatpañcākṣarāṇyapi
procuruccaissamaṃ sarve vasiṣṭhādyā munīśvarāḥ

2.132

athāvirāsīdviśveśo manovācāmagocaraḥ
sarvajñaḥ sarvagaḥ sarvaḥ sarvabhūtahite rataḥ

2.133

anādiḥ saccidānandalakṣaṇaḥ sāmba īśvaraḥ
taṃ dṛṣṭvā vismitāssarve vasiṣṭhādyā munīśvarāḥ

2.134

jayaghoṣaṃ puraskṛtya praṇipatya punaḥ punaḥ
stotumārebhire sarve bhaktyā'vanatakandharāḥ

2.135

śrīviśvanāthastutiḥ
munayaḥ -
namaste devadeveśa namaste jagatāṃ pate
namaste candracūḍāya namaste śūladhāriṇe

2.136

namaste kālakālāya namastrailokyadhāriṇe
namaste vedavedyāya namaste puṇyamūrtaye

2.137

namaste brahmarūpāya namaste viṣṇurūpiṇe
namaste rudrarūpāya nama īśvararūpiṇe

2.138

namaḥ sadāśivāyastu namaḥ paraśivāya te
namo devāya mahate maṅgalāya mahātmane

2.139

namaḥ parvatarājendrakanyakāpataye namaḥ
yogānandāya yogāya yogināṃ pataye namaḥ

2.140

prāṇāyāmaratānāntu pratyakṣāya namo namaḥ
viśvāya viśvanāthāya viśvādhārāya te namaḥ

2.141

namo bhaktabhayaccheda kāraṇāyāma lāya te
namaste rudra bhagavanmanyave te ceṣave namaḥ

2.142

namaste dhanvine tubhyaṃ bāhubhyāmuta te namaḥ
namaste harikeśāya pattīnāṃ pataye namaḥ

2.143

puṣṭānāṃ pataye tubhyaṃ namaste paramātmane
namaśśivāya tridaśārcitāya vinaṣṭadoṣāya guṇārṇavāya

2.144

vimuktimārgapratibodhanāya devādidevāya namaśśivāya
iti stutvā viśvanāthaṃ vasiṣṭhādyāstapodhanāḥ

2.145

praṇemurdaṇḍavadbhūbhau bhaktyā paramayā yutāḥ
atha viśveśvaro devastānvilokya munīśvarān

2.146

prāha gambhīrayā vācā bhagavān karuṇānidhiḥ
prasanno'smi muniśreṣṭhāḥ bhaktyā stotreṇa suvratāḥ

2.147

paraṃ vedāntavijñānaṃ kaivalyaprāptisādhanam
bhavatāṃ bhavatu prājñā bhavaduḥkhānivṛttaye

2.148

paṭhati śraddhayā yastu nityaṃ stotraṃ bhavatkṛtam
tasmai dharmārthakāmāṃśca muktiṃ dāsyāmyahaṃ dhruvam

2.149

iti labdhavarāssantaḥ prāhuritthaṃ munīśvarāḥ
bhagavan pārvatīnātha sarvābhīṣṭapradāyaka

2.150

idamekaṃ prārthitaṃ no varaṃ tvatpādapaṅkaje
niścalā paramā bhaktiḥ satataṃ bhavatu prabho

2.151

ityukto munisaṅghaistu vasiṣṭhapramukhairharaḥ
tathā bhavatu cetyuktvā liṅgamadhye tirodadhe

2.152

atha sarve vasiṣṭhādyā merupāśrvātsamāgataiḥ
munivṛndaistu santuṣṭā viśveśaṃ liṅgarūpiṇam

2.153

praṇipatya viśeṣeṇa stotraiḥ stutvā śrutīritaiḥ
muktimaṇṭapamāsādya tatrasthān devatāgaṇān

2.154

praṇamya ca yathānyāyaṃ kukkuṭānāñcatuṣṭayam
dṛṣṭvā'tha dakṣiṇāmūrterupaviśya ca sannidhau

2.155

vividhairvedavākyaiśca setihāsapurāṇakaiḥ
śāstraiśca vividhairanyaissarvopaniṣadāṃ gaṇaiḥ

2.156

parasparaṃ sallapantaśśambhoścakruḥ parāṃ mudam
tato munīśvarāssarve nāradaṃ munipuṅgavam

2.157

kautūhalasamāyuktāḥ papracchurbrahmaṇaḥ sutam
bhagavan śṛṇu devarṣe tapasā dhūtakalmaṣa

2.158

bhuvaneṣu ca sarveṣu brahmāṇḍāntargateṣu ca
bahiṣṭheṣu ca sarveṣu caratastapaso balāt

2.169

nirodho nāsti bhavataḥ sarvvaṃ tvaṃ vetsi tatvataḥ
teṣu sarveṣu lokeṣu yāni kṣetrāṇi santi tu

2.160

teṣāṃ madhye viśiṣṭaṃ yat kṣetraṃ śambhoḥ cirantanam
vayaṃ tacchrotumicchāmaḥ tasmāttvaṃ vaktumarhasi

2.161

śrī nāradaḥpurā sanatkumāreṇa sarvajñena mahātmanā
kathitaṃ kṣetramāhātmyaṃ vedavyāsāya dhīmate

2.162

sa eva sarvaṃ yuṣmākaṃ vaktumarhati sattamāḥ
ityukte nāradenātha mudā sarve munīśvarāḥ

2.163

samīpasthaṃ mahābhāgaṃ prāhuḥ satyavatīsutam
munayaḥbhagavan sarvadharmajña vedavyāsa mahāmune

2.164

viduṣāṃ śambhubhaktānāmagragaṇyastvameva hi
purāṇāni ca sarvāṇi vedān sāṅgāna mahāmate

2.165

itihāsān bhāratādīn kāvyāni vividhāni ca
alaṅkārāṃśca vividhān nāṭakānyadbhutāni ca

2.166

prahelikāśca vividhā savyaṃgyāḥ sarasāstathā
jñātuṃ vaktuṃ bodhayituṃ tvatsamo nāsti bhūtale

2.167

tasmāt kṣetreṣu sarveṣu cirantanamanuttamam
vaktumarhasi tatkṣetraṃ bhaktānāmanukampayā

2.168

iti śrutvā vacasteṣāṃ vedavyāso mahāmuniḥ
mudā paramayā yuktaḥ prāha sarvānmunīśvarān

2.169-2

śrī vedavyāsaḥśṛṇudhvamṛṣayaḥ sarve yuṣmākaṃ hitamuttamam
agastyaḥ śambhubhaktānāmagragaṇyaḥ purātanaḥ

2.170

sarvajñasūnoḥ ṣaḍvaktrātsarvajñādāptavedanaḥ
purā kailāsaśikhare śambhuṃ nantuṃ samāgatāḥ

2.171

indrādayo lokapālā brahmaviṣṇusamanvitāḥ
tadā bhāreṇa mahatā bhūmiśca vinatottarā

2.172

dakṣiṇā connatiṃ prāptā sarvalokabhayāvahā
tathāvidhāṃ samanvīkṣya dharitrīñca maheśvaraḥ

2.173

svabhaktānāmagragaṇyaṃ tapoyogasamanvitam
agastyaṃ codayāmāsa sthātuṃ malayaparvate

2.174

śivājñāṃ śirasā dhṛtvā kumbhayonistathā'karot
tadāprabhṛti bhūmiśca susamā samavasthitā

2.175

tasmātsa eva mukhyaśca bhaktānāṃ viduṣāmapi
yuṣmākamamulaṃ praśnaṃ śraddhayā vakṣyati dvijāḥ

2.176

iti vyāsavacaśśrutvā munīndrāḥ prītisaṃyutāḥ
puro'gastyaṃ samālokya jaṭābandhavirājitam

2.177

śivadhyānarataṃ śāntaṃ vedaśāstraviśāradam
rudrākṣamālābharaṇaṃ bhasmoddhūlitavigraham

2.178

suprasannamukhāmbhojaṃ svabhāsā sūryasannibham
praṇamya munayaḥ sarve tuṣṭuvuḥ parayā mudā

2.179

jaya tvaṃ bhagavan skandaprasādādāptavedana
jaya tvaṃ bhagavan skandacaraṇāsaktamānasa

2.180

jaya tvaṃ skandabhaktānāmagragaṇya purātana
jaya tvaṃ sarvavedāntapadmākaradivākara

2.181

skandavijñānadīpasya vartībhūta jaya prabho
evaṃ stutvā mahātmānaṃ punaḥ prāhuśca taṃ munim

2.182

maharṣe kumbhayone tvaṃ satyamīśvarasannibhaḥ
susamāsīdyataḥ pṛthvī tvayā malayavāsinā

2.183

ācamya caturaḥ sindhūnyathāsthānaṃ vimuktavān
vindhyasya saṃstambhayitā candrādityavirodhinaḥ

2.184

samastalokabhayadavātāpīlvalabhakṣaka
tāmraparṇījale nityaṃ vidhāya snānamuttamam

2.185

bhasmasnānaṃ tataḥ kṛtvā nityakṛtyaṃ vidhāya ca
ṣoḍaśainopacāreṇa śivaliṅgārcanaṃ yathā

2.186

trikālaṃ niyamenaiva karoṣīśvarapūjanam
tvayā yattvarpitaṃ śuddhaṃ jalaṃ brahmagaṇairvṛtam

2.187

munīśvarāśca pitaro vadantyātmahitāya ca
maheśvarānmūlasūtramadhigamya tvayā purā

2.188

aṅgīkṛtya ca tanmūlaṃ tadgatenaiva vartmanā
bhāṣāṃ drāviḍajātīnāṃ nādotpattiṃ tataḥ param

2.189

varṇotpattiṃ tataḥ paścāttasyārthavivṛtiṃ tataḥ
alaṅkārarasairyuktaṃ vṛttānāṃ lakṣaṇaṃ param

2.190

etatsarvaṃ bhavāneva cakre lokopakārataḥ
tasmāttvameva mukhyaśca sarveṣāṃ tu mahātmanām

2.191

śivakṣetrāṇi sarvāṇi tīrthāni sakalānyapi
svāyambhuvāni liṅgāni vividhāni mahāntyapi

2.192

vetsi śambhoḥ prasādena teṣāṃ madhye mahattaram
kṣetraṃ tīrthaṃ liṅgavaraṃ bhuktimuktipradāyakam

2.193

vaktumarhasi sarvajña mahatkautūhalaṃ hi naḥ
iti teṣāṃ vacaśśrutvā kumbhayonirmahātapāḥ

2.194

aṅgeṣvaśeṣeṣvadhikaṃ samprāptapulakāṅkuraḥ
syandatsalilayā dṛṣṭyā mandasmeramanoharaḥ

2.195

harṣagadgadayā vācā provāca munisattamān
yukto yuṣmābhiradhunā praśnaḥ pṛṣṭo mahattaraḥ

2.196

ahaṃ vakṣyāmi tat sarvaṃ śṛṇudhvamavadhānataḥ
ityuktvā kumbhasambhūtaḥ samāhitamanāstadā

2.197

dhyātvā vighneśvaraṃ devaṃ svaguruñca ṣaḍānanam
śrīhālāsyeśvaraṃ śambhuḥ manojñāṃ śapharekṣaṇām

2.198

bhaktyā praṇamya samprārthya mantramādyaṃ ṣaḍakṣaram
japitvā divyadṛṣṭyā tu nirīkṣya munipuṅgavaḥ

2.199

kṛtapraṇāmo munibhiḥ kumbhayonirmunīśvaraḥ
vaktumārabhate sarvaṃ sarvalokahitāvahm

2.200

praśnādhyāyamidaṃ puṇyaṃ śṛṇuyādyaḥ samāhitaḥ
gaṅgāsnānaphalaṃ labdhvā sarvaiḥ pāpaiḥ pramucyate

First 200 of 202 passages. Read on

Linked texts (6)